ສິງກະໂປເປັນປະເທດທຳອິດໃນອາຊີ ໄດ້ຮັບວັກຊີນ Pfizer-BioNTech
ວັກຊີນປ້ອງກັນພະຍາດໂຄວິດ-19 ຜະລິດໂດຍບໍລິສັດ Pfizer ຂອງອາເມລິກາ ຮ່ວມກັບບໍລິສັດ BioNTech ຂອງເຢຍລະມັນ ເດີນທາງເຖິງສິງກະໂປເປັນປະເທດທຳອິດໃນທະວີບອາຊີ.
ສຳນັກຂ່າວຕ່າງປະເທດລາຍງານວ່າ: ຖ້ຽວບິນພິເສດຂອງສາຍການບິນສິງກະໂປ ແອຣລາຍ ລຳລຽງວັກຊີນປ້ອງກັນພະຍາດໂຄວິດ-19 ຜະລິດໂດຍບໍລິສັດ Pfizer ຂອງອາເມລິກາ ຮ່ວມກັບບໍລິສັດ BioNTech ຂອງເຢຍລະມັນ ເດີນທາງງຈາກເບລຢ້ຽມເຖິງສະໜາມບິນນາໆຊາດຊາງງີ ໃນຄືນວັນທີ 21 ທັນວາ ຕາມເວລາທ້ອງຖິ່ນ ໂດຍວັກຊີນທັງໝົດທີ່ຍັງບໍ່ມີການເປີດເຜີຍຢ່າງເປັນທາງການວ່າມີຈຳນວນ ແລະ ມູນຄ່າເທົ່າໃດ ໄດ້ຮັບການບັນຈຸ ແລະ ເກັບຮັກສາເປັນຢ່າງດີໃນຕູ້ແຊ່ແຂງພິເສດ ເຊິ່ງມີອຸນຫະພູມຕໍ່າກວ່າ -70 ອົງສາ.
ນາຍົກລັດຖະມົນຕີ ຫລີຊຽນລຸງ ຜູ້ນຳສິງກະໂປ ເຊິ່ງປັດຈຸບັນມີອາຍຸ 68 ປີ ເຂົ້າເກນກຸ່ມສ່ຽງຄວນໄດ້ຮັບວັກຊີນກ່ອນ ກ່າວວ່າ: ວັກຊີນມີພຽງພໍສຳລັບປະຊາຊົນທຸກຄົນ, ແຕ່ລັດຖະບານ “ບໍ່ບັງຄັບ” ວ່າທຸກຄົນຕ້ອງເຂົ້າຮັບການສັກວັກຊີນ ໂດຍຈະມີການປະກາດກຳນົດເວລາ ແລະ ຈັດລຳດັບກຸ່ມການຮັບວັກຊີນໃຫ້ຮູ້ໃນມໍ່ໆນີ້. ເຖິງຢ່າງໃດກໍຕາມ, ກະຊວງສາທາລະນະສຸກຂອງສິງກະໂປເຄີຍປະເມີນສະຖານະການໃນເບື້ອງຕົ້ນວ່າ: ອາດຈະເກີດຂຶ້ນໄດ້ “ພາຍໃນ 2-3 ອາທິດ” ຫລັງໄດ້ຮັບວັກຊີນຊຸດທຳອິດ.
ນອກຈາກນີ້, ລັດຖະບານສິງກະໂປຍັງສັ່ງຊື້ວັກຊີນຈາກບໍລິສັດອີກຫລາຍແຫ່ງ ລວມທັງ Moderna ຂອງອາເມລິກາ ແລະ ຊິໂນແວກຂອງຈີນ ໂດຍຕັ້ງງົບປະມານໄວ້ສູງກວ່າ 1.000 ລ້ານໂດລາສິງກະໂປ. ຂະນະທີ່ ການເດີນທາງເຖິງສິງກະໂປຂອງວັກຊີນ Pfizer-BioNTech ເກີດຂຶ້ນພຽງອາທິດດຽວ ຫລັງກະຊວງສາທາລະນະສຸກຂອງສິງກະໂປປະກາດຂຶ້ນທະບຽນວັກຊີນດັ່ງກ່າວ ແລະ ສົ່ງຜົນໃຫ້ສິງກະໂປເປັນປະເທດທຳອິດໃນທະວີບອາຊີ ທີ່ໄດ້ຮັບວັກຊີນຂອງ Pfizer-BioNTech.
