ອິຕາລີພົບເຊື້ອໂຄວິດ-19 ກາຍພັນ ຊະນິດດຽວກັບພົບຢູ່ອັງກິດ
ທະວີບເອີຣົບກຳລັງເຝົ້າຕິດຕາມເຊື້ອກາຍພັນຊະນິດໃໝ່ຢ່າງໃກ້ຊິດ ຫລັງທະຍອຍໂຈະການເດີນທາງຈາກອັງກິດທີ່ມີລາຍງານຜູ້ຕິດເຊື້ອຊະນິດນີ້.
ວັນທີ 20 ທັນວາ, ສຳນັກຂ່າວຣອຍເຕີ (Reuters) ລາຍງານການຖະແຫລງຂ່າວຂອງກະຊວງສາທາລະນະສຸກອິຕາລີ ທີ່ກວດພົບຜູ້ຕິດເຊື້ອໄວຣັສໂຄວິດ-19 ກາຍພັນຊະນິດໃໝ່ ເຊິ່ງເປັນສາຍພັນດຽວກັນກັບທີ່ພົບຢູ່ອັງກິດ.
ຜູ້ຕິດເຊື້ອ ແລະ ຄູ່ຂອງລາວເດີນທາງກັບຈາກອັງກິດເຂົ້າສູ່ອິຕາລີຫລາຍມື້ກ່ອນ ດ້ວຍການໂດຍສານເຮືອບິນມາລົງສະໜາມບິນນະຄອນຫລວງໂຣມ ໂດຍທາງການອິຕາລີຢືນຢັນວ່າທັງສອງຄົນໄດ້ຖືກແຍກຕົວອອກໄປແລ້ວ.
ປະເທດໃກ້ຄຽງຢູ່ເອີຣົບຕ່າງພາກັນປິດການເດີນທາງຈາກອັງກິດນັບແຕ່ວັນທີ 20 ທັນວາ ຫລັງຈາກມີລາຍງານເຊື້ອກາຍພັນທີ່ສາມາດແຜ່ລະບາດໄດ້ໄວກວ່າເກົ່າອອກມາ.
ສ່ວນຢູ່ເຢຍລະມັນ, ທ່ານ ເຍນ ສະປານ ລັດຖະມົນຕີສາທາລະນະສຸກ ເປີດເຜີຍວ່າ: ຍັງບໍ່ພົບເຊື້ອກາຍພັນແບບດຽວກັບທີ່ພົບຢູ່ອັງກິດ ໂດຍຫລ້າສຸດໄດ້ປະກາດໂຈະຖ້ຽວບິນຈາກອັງກິດທັງໝົດແລ້ວ ແລະ ເຝົ້າຕິດຕາມລາຍງານເລື່ອງນີ້ຢ່າງໃກ້ຊິດ.
