ແຂວງສະຫວັນນະເຂດຮ່ວມໃຈປ່ອຍປາສູ່ທຳມະຊາດ
ວັນທີ 30 ມິຖຸນາ ຜ່ານມານີ້, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ແລະ ພະແນກການຕ່າງໆ ອ້ອມຂ້າງ ແຂວງພ້ອມດ້ວຍອຳນາດການ ປົກຄອງເມືອງຈຳພອນ, ນັກທຸລະກິດ, ສະມາຄົມຊາວຈີນ-ຊາວ ຫວຽດນາມ ແລະ ມວນຊົນຈຳ ນວນຫລາຍຕ່າງກໍໄດ້ພ້ອມໃຈກັນນຳເອົາລູກປາ 1 ແສນໂຕປ່ອຍ ລົງສູ່ໜອງລວມຂອງບ້ານຄຳປ່າ ແໜ, ເນື່ອງ ໃນວັນປ່ອຍປາ ແລະ ອະນຸລັກສັດນ້ຳ-ສັດປ່າແຫ່ງຊາດ.
+ ແຂວງສະຫວັນນະເຂດພົບຜູ້ຕິດເຊື້ອພະຍາດໄຂ້ເລືອດອອກ 300 ກວ່າຄົນ
+ ແຂວງບໍ່ແກ້ວປ່ອຍປາລົງສູ່ວັງສະຫງວນ
+ ເຈົ້າແຂວງສະຫວັນນະເຂດເຂົ້າຮ່ວມງານສະເຫລີມສະຫລອງ ວັນສ້າງຕັ້ງສາຍພົວພັນມິດຕະພາບຫວຽດນາມ-ທີ່ແຂວງເຊິນລາ
ທ່ານເຈົ້າເມືອງຈຳພອນ ໃຫ້ຮູ້ວ່າ: ພັກ ແລະ ລັດຖະບານເຮົາ ໄດ້ກຳນົດເອົາວັນທີ 13 ກໍລະກົດຂອງທຸກໆປີເປັນວັນປ່ອຍປ່າ ແລະ ອະນຸລັກສັດນ້ຳ-ສັດປ່າແຫ່ງຊາດເພື່ອແນ່ ໃສ່ສ້າງຈິດ ສຳນຶກໃຫ້ປະຊາຊົນຮູ້ຈັກປົກປັກຮັກສາສັດນ້ຳ-ສັດປ່າ ແລະ ສະພາບແວດລ້ອມຂອງທຳມະຊາດ, ຮູ້ໄດ້ວ່າພໍເຖິງເດືອນກໍລະກົດແມ່ນລະດູການສັດນ້ຳ-ສັດປ່າແຜ່ຂະຫຍາຍພັນຕາມ ແຫລ່ງທຳມະຊາດຕ່າງໆ ດັ່ງນັ້ນໄລຍະນີ້ຫ້າມມີການລ່າສັດ, ຕັນແລວນ້ຳການຂຶ້ນລົງຂອງປາເພື່ອວາງໄຂ່. ແລະ ຜ່ານມາສະເພາະເມືອງຈຳພອນກໍສາມາດກຳນົດເຂດປ່າສະຫງວນ, ວັງນ້ຳສະຫງວນ, ໜອງປາລວມຂອງບ້ານ ແລະ ອອກລະບຽບການຫ້າມລ່າສັດໃນລະດູເຂົ້າພັນສາ, ຫ້າມລ່າສັດຫວງຫ້າມ ແລະ ສັດປ່າທີ່ຂຶ້ນບັນຊີຄຸ້ມຄອງ.
ສຳລັບປາທີ່ມວນຊົນນຳມາປ່ອຍຄັ້ງນີ້ມີປານິນ, ປາປາກ, ປາເກັດແລບ ແລະ ປາອື່ນໆ.
ຂ່າວແຈ້ງຕື່ມວ່າ: ພາຍຫລັງທີ່ການນຳຂອງແຂວງ ແລະ ນັກທຸລະກິດປ່ອຍປາລົງສູ່ໜອງສຳເລັດແລ້ວກໍໄດ້ລົງຢ້ຽມ ຢາມເບິ່ງການດຳລົງຊີວິດຂອງປະຊາຊົນ, ເບິ່ງການສ້າງພື້ນຖານ ໂຄງລ່າງທີ່ໂຮງງານຜະລິດນ້ຳດື່ມ ແລະ ນ້ຳກ້ອນໂລມາຄຳໃຫ້ການຊ່ວຍເຫລືອພັດທະນາມາແຕ່ຕົ້ນປີ 2016 ເຫັນວ່າ ມີສະພາບປ່ຽນແປງດີຂຶ້ນ.
