ນະຄອນຫຼວງ ເຊອູນ ແຈ້ງໝົດຕຽງໃຫ້ຄົນເຈັບໂຄວິດ-19 ນອນແລ້ວ

ວັນທີ 16 ທັນວານີ້ ນາຍົກລັດຖະມົນຕີຂອງເກົາຫຼີໃຕ້ Chung Sye Kyun ໄດ້ຊີ້ນຳໃຫ້ຈັດຫາຕຽງນອນໃຫ້ຄົນເຈັບໂຄວິດ-19 ເພີ່ມເຕີມ ອັນເນື່ອງຈາກວ່າ ເກົາຫຼີໃຕ້ ກຳລັງປະເຊີນໜ້າກັບການລະບາດຂອງພະຍາດຢ່າງຮ້າຍແຮງ.

ອີງຕາມການລາຍງານຂອງສຳນັກຂ່າວ AFP ເມື່ອວັນທີ 16 ທັນວານີ້ວ່າ ບັນດາໂຮງໝໍຢູ່ໃນນະຄອນຫຼວງ ເຊອູນ ແມ່ນໝົດຕຽງໃຫ້ຄົນເຈັບນອນແລ້ວ, ຍັງພຽງແຕ່ 3 ຕຽງເທົ່ານັ້ນ ເພື່ອໄວ້ປິ່ນປົວຄົນເຈັບພິເສດພິເສດທີ່ສຸດ. ຊຶ່ງຢູ່ໃນຂອບເຂດນະຄອນຫຼວງເຊອູນ ມີພົນລະເມືອງເຖິງ 26 ລ້ານຄົນ.

ປັດຈຸບັນ ເກົາຫຼີໃຕ້ ມີຜູ້ຕິດເຊື້ອສະສົມທັງໝົດ 45.442 ຄົນ, ໃນນີ້ ມີຜູ້ຕິດເຊື້ອໃໝ່ 1.078 ຄົນ ແລະ ເສຍຊີວິດ 612 ຄົນ. ເຖິງຢ່າງໃດກໍຕາມ ເກົາຫຼີໃຕ້ ມີຄວາມສ່ຽງເກີດການລະບາດເປັນຄັ້ງທີ 3 ເມື່ອລະດູໜາວກ້າວເຂົ້າມາເຖິງ.