ອົງການອະນາໄມໂລກສົ່ງທີມກວດຕົ້ນຕໍ ພະຍາດໂຄວິດ-19 ຢູ່ເມືອງອູ່ຮັ່ນຂອງຈີນ
ອົງການອະນາໄມໂລກຈະສົ່ງທີມນັກວິທະຍາສາດເຂົ້າກວດຫາຕົ້ນຕໍການລະບາດພະຍາດໂຄວິດ-19 ຢູ່ເມືອງອູ່ຮັ່ນຂອງຈີນເດືອນໜ້າ ລະບຸເປົ້າໝາຍເພື່ອປ້ອງກັນພະຍາດລະບາດໃນອະນາຄົດ ບໍ່ຕ້ອງການກ່າວໂທດໃຜ.
ວັນທີ 17 ທັນວານີ້, ສຳນັກຂ່າວຣອຍເຕີ ລາຍງານວ່າ: ອົງການອະນາໄມໂລກກຳລັງຈະສົ່ງທີມນັກວິທະຍາສາດຈາກນາໆຊາດຈຳນວນ 10 ຄົນ ເຂົ້າໄປກວດສອບຕົ້ນຕໍການແຜ່ລະບາດຂອງພະຍາດໂຄວິດ-19 ຢູ່ເມືອງອູ່ຮັ່ນຂອງປະເທດຈີນ ໂດຍຈະເລີ່ມເຂົ້າໄປກວດສອບໃນອາທິດທຳອິດຂອງເດືອນມັງກອນປີໜ້າ ແລະ ອາດຈະໃຊ້ເວລາປະມານ 4-5 ອາທິດ.
ຂະນະທີ່ສຳນັກຂ່າວ AP ລາຍງານອ້າງໜຶ່ງໃນນັກວິທະຍາສາດທີ່ຈະຮ່ວມທີມສຳຫລວດຕົ້ນຕໍພະຍາດໂຄວິດ-19 ກັບອົງການອະນາໄມໂລກວ່າ: ການເຂົ້າໄປກວດສອບຕົ້ນຕໍການລະບາດໃນປະເທດຈີນຄັ້ງນີ້ ບໍ່ໄດ້ມີເປົ້າໝາຍເພື່ອກ່າວໂທດຈີນວ່າເປັນຈຸດເລີ່ມຕົ້ນຂອງພະຍາດລະບາດ, ແຕ່ຕ້ອງການສຶກສາ ແລະ ປ້ອງກັນພະຍາດລະບາດຮຸນແຮງທີ່ອາດເກີດຂຶ້ນໄດ້ໃນອະນາຄົດ.
ອົງການອະນາໄມໂລກຍັງເປີດເຜີຍອີກວ່າ: ຜ່ານມາມີການຕິດຕໍ່ກັບລັດຖະບານຈີນມາໂດຍຕະຫລອດ ແລະ ລັດຖະບານຈີນມີຄວາມຍິນດີໃຫ້ທີມນັກວິທະຍາສາດຈາກອົງການອະນາໄມໂລກເຂົ້າໄປກວດສອບຕົ້ນຕໍຂອງພະຍາດໂຄວິດ-19 ເຖິງເມືອງອູ່ຮັ່ນ.
ຜ່ານມາເມືອງອູ່ຮັ່ນຂອງຈີນຖືກລະບຸວ່າເປັນຈຸດເລີ່ມຕົ້ນການແຜ່ລະບາດຂອງພະຍາດໂຄວິດ-19 ໂດຍມີຂໍ້ສັນນິຖານວ່າ: ການແຜ່ລະບາດອາດເລີ່ມຕົ້ນມາຈາກຕະຫລາດອາຫານທະເລຢູ່ເມືອງອູ່ຮັ່ນ ເຊິ່ງຈຳໜ່າຍສັດປ່າຫລາຍຊະນິດສຳລັບນຳໄປປຸງແຕ່ງເປັນອາຫານ. ຂະນະທີ່ນັກວິທະຍາສາດຕັ້ງສົມມຸດຖານວ່າ: ໄວຣັສໂຄວິດ-19 ອາດຈະຢູ່ໃນໂຕເຈຍມາດົນແລ້ວ ແຕ່ຫາກໍແຜ່ເຊື້ອເຂົ້າສູ່ມະນຸດຜ່ານສັດຕົວກາງທີ່ຂາຍຢູ່ໃນຕະຫລາດ.
ເຖິງຢ່າງໃດກໍຕາມ, ໃນໄລຍະການລະບາດມີຂໍ້ຖົກຖຽງເຖິງຕົ້ນຕໍຂອງໄວຣັສໂຄວິດ-19 ຈຳນວນຫລາຍ ທັງຂໍ້ກ່າວຫາວ່າໄວຣັສຊະນິດນີ້ອາດຫລຸດອອກມາຈາກຫ້ອງທົດລອງໃນປະເທດຈີນ ລວມທັງຂໍ້ສັນນິຖານທີ່ວ່າໄວຣັສໂຄວິດ-19 ອາດເລີ່ມແຜ່ລະບາດມາກ່ອນແລ້ວໃນປະເທດອື່ນ ຈົນກະທັງເລີ່ມພົບການແຜ່ລະບາດທີ່ຊັດເຈນຢູ່ເມືອງອູ່ຮັ່ນຂອງຈີນເມື່ອທ້າຍປີຜ່ານມາ.
ສຳລັບສະຖານະການການລະບາດຂອງພະຍາດໂຄວິດ-19 ໃນຕອນນີ້ ກັບມາໜ້າເປັນຫ່ວງອີກ ເນື່ອງຈາກເປັນໄລຍະທີ່ພົບຜູ້ຕິດເຊື້ອໃໝ່ຕໍ່ມື້ເພີ່ມສູງອີກ. ຂະນະທີ່ຫລາຍຝ່າຍກຳລັງຕິດຕາມການອະນຸມັດ ແລະ ແຈກຢາຍວັກຊີນໂຄວິດ-19 ທີ່ເປັນຄວາມຫວັງໃນການສິ້ນສຸດການລະບາດຮຸນແຮງ ໂດຍປັດຈຸບັນມີຜູ້ຕິດເຊື້ອໂຄວິດ-19 ສະສົມທົ່ວໂລກ 74,5 ລ້ານກວ່າຄົນ ແລະ ມີຜູ້ເສຍຊີວິດແລ້ວ 1,6 ລ້ານກວ່າຄົນ.
