ຈັດສຳມະນາກ່ຽວກັບການປູກມອນ-ລ້ຽງມ້ອນເພື່ອຫັນເປັນອຸດສາຫະກຳທັນສະໄຫມ

ສະຖາບັນນິເວດວິທະຍາ ແລະ ເຕັກໂນໂລຊີ ຊີວະພາບ ກະຊວງວິທະຍາສາດ ແລະ ເຕັກໂນໂລຊີ (ກວຕ) ຮ່ວມ ກັບ ບໍລິສັດ ສອງມືນາງ ຈຳກັດ ແລະ ມະຫາວິທະຍາໄລ ຊູໂຈ ໄດ້ຈັດກອງປະຊຸມສຳມະນາວິທະຍາສາດກ່ຽວກັບການປູກມອນ-ລ້ຽງມ້ອນ ໃນໂຄງການຮ່ວມມືພັດທະນາການປູກມອນ-ລ້ຽງມ້ອນເປັນອຸດສາຫະກຳ ແລະ ທັນສະໄໝ ຂຶ້ນໃນວັນທີ 15-17 ທັນວານີ້ ທີ່ນະຄອນຫລວງວຽງຈັນ, ໂດຍການເປັນປະທານຮ່ວມຂອງທ່ານ ນາງ ແກ້ວສາຍໃຈ ໄຊຍະສອນ ປະທານບໍລິສັດ ສອງມືນາງ ແລະ ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ພ້ອມດ້ວຍທ່ານ ຮວາງ ຊິງ (Huang Xing) ຮອງອະທິການບໍດີມະຫາວິທະຍາໄລຊູໂຈລາວ, ມີທ່ານ ກິແກ້ວ ໄຂຄຳພິທູນ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ຜູ້ຕາງຫນ້າຂະແຫນງການກ່ຽວຂ້ອງ ແລະ  ສະມາຄົມຫັດຖະກຳ, ນັກທຸລະກິດ, ກຸ່ມຜູ້ຜະລິດ, ຊາວສວນມອນ ແລະ ລ້ຽງມ້ອນເຂົ້າຮ່ວມເປັນຈຳນວນຫລາຍ.

ເພື່ອເປັນໂອກາດອັນດີໃຫ້ແກ່ການຖ່າຍທອດຄວາມຮູ້, ສົນທະນາ ແລະ ແລກປ່ຽນບົດຮຽນ ລະຫວ່າງບັນດາຜູ້ທີ່ດຳເນີນທຸລະກິດ, ນັກວິຊາການ ແລະ ຊ່ຽວຊານດ້ານການປູກມອນ-ລ້ຽງມ້ອນ ທັງສູນກາງ ແລະ ທ້ອງຖິ່ນ. ນອກຈາກນັ້ນ, ຍັງໄດ້ຮັບຟັງການນໍາສະເໜີບົດຮຽນຈາກຊ່ຽວຊານສະເພາະດ້ານ ການປູກມອນ-ລ້ຽງມ້ອນຈາກມະຫາວິທະຍາໄລຊູໂຈ ສປ ຈີນ, ຈາກວິຊາການປູກມອນ-ລ້ຽງມ້ອນ ສະຖາບັນນິເວດວິທະຍາ ແລະ ເຕັກໂນໂລຊີຊີວະພາບ ແລະ ບໍລິສັດສອງມືນາງ, ບໍລິສັດ ປູກມອນ-ລ້ຽງມ້ອນ ແຂວງຊຽງຂວາງ ແລະ ແຂວງວຽງຈັນອີກ.

ພ້ອມກັນນັ້ນ, ຜູ້ເຂົ້າຮ່ວມຍັງໄດ້ແລກປ່ຽນທັດສະນະສຶກສາທີ່ສວນສາທິດປູກມອນ-ລ້ຽງມ້ອນຫລັກ 18 ຂອງບໍລິສັດ ສອງມືນາງ ຊຶ່ງສວນປູກມອນດັ່ງກ່າວມີເນື້ອທີ່ຫລາຍກວ່າ 8 ເຮັກຕາ ແລະ ມີເຮືອນ 7 ຫລັງສຳລັບລ້ຽງມ້ອນ, ສາວໄໝ ແລະ ເຮັດແຜ່ນຜ້າຫົ່ມອີກດ້ວຍ.