ການາດາເລີ່ມສັກວັກຊີນຕ້ານໂຄວິດ-19 ຊຸດທຳອິດແລ້ວ
ວັນທີ 15 ທັນວານີ້, ທາງການການາດາເລີ່ມຕົ້ນວັກຊີນຕ້ານໂຄວິດ-19 ຊຸດທຳອິດຈາກ Pfizer-BioNTech ແລ້ວ ຫລັງໜ່ວຍງານດ້ານສາທາລະນະສຸກທີ່ຮັບຜິດຊອບອະນຸມັດການນຳໃຊ້ວັກຊີນເປັນກໍລະນີສຸກເສີນ ເມື່ອທ້າຍອາທິດຜ່ານມາ ໂດຍເຈົ້າໜ້າທີ່ທີ່ປະຕິບັດໃກ້ຊິດຄວາມສ່ຽງໃນການຕິດເຊື້ອ 5 ຄົນໃນລັດອອນແທຣີໂອ ຄືຊາວການາດາກຸ່ມທຳອິດຂອງເມືອງໂທຣອນໂຕ ທີ່ໄດ້ຮັບການສັກວັກຊີນຊຸດທຳອິດນີ້, ຄາດວ່າວັກຊີນປະມານ 2,5 ແສນໂດສ ຈະສົ່ງເຖິງການາດາພາຍໃນເດືອນທັນວານີ້.
ທ່ານ ແພດຕີ ຮັດດູ ລັດຖະມົນຕີສາທາລະນະສຸກຂອງການາດາ ທີ່ເດີນທາງໄປຮ່ວມເປັນສັກຂີພິຍານໃນການສັກວັກຊີນຕ້ານໂຄວິດ-19 ເຂັມທຳອິດຂອງລັດຄວິເບກ ເປີດເຜີຍວ່າ: “ນີ້ເປັນພຽງບາດກ້າວທຳອິດ, ພວກເຮົາຍັງມີວຽກອີກຫລາຍທີ່ລໍຖ້າຢູ່ຂ້າງໜ້າ ຍັງມີໄລຍະເວລາທີ່ຍາກລຳບາກອີກຫລາຍ ແຕ່ຊາວການາດາຈະປົກປ້ອງກັນ ແລະ ກັນ”.
ວັກຊີນຕ້ານໂຄວິດ-19 ສົ່ງໄປເຖິງລັດອອນແທຣີໂອແຕ່ວັນທີ 13 ທັນວາຜ່ານມາ ຈຳນວນ 6.000 ໂດສ ຄາດວ່າຈະສັກໃຫ້ເຈົ້າໜ້າທີ່ດ້ານສາທາລະນະສຸກ, ນັກສັງຄົມສົງເຄາະ ແລະ ເຈົ້າໜ້າທີ່ເບິ່ງແຍງຜູ້ອາຍຸສູງປະມານ 2.500 ຄົນ ໂດຍການາດາຖືເປັນໜຶ່ງໃນປະເທດທີ່ເລີ່ມຕົ້ນຂະບວນການສັກວັກຊີນຕ້ານໂຄວິດ-19 ໃນວົງກວ້າງ ເປັນກໍລະນີສຸກເສີນແລ້ວ ເຊັ່ນດຽວກັບອັງກິດ ແລະ ອາເມລິກາ, ຄາດວ່າທາງການການາດາຈະອະນຸມັດການນຳໃຊ້ວັກຊີນຈາກ Moderna ມໍ່ໆນີ້.
ໂດຍທາງການການາດາໄດ້ສັ່ງຈອງວັກຊີນຕ້ານໂຄວິດ-19 ກັບຜູ້ຜະລິດ ແລະ ທົດລອງວັກຊີນປະມານ 7 ແຫ່ງໃນຕະຫລາດໂລກ ແລະ ສົ່ງຜົນໃຫ້ການາດາສັ່ງຈອງວັກຊີນພຽງພໍຕໍ່ປະຊາກອນແລ້ວ (ປະມານ 38 ລ້ານຄົນ) ສັ່ງຈອງໄປຫລາຍກວ່າຈຳນວນປະຊາກອນທົ່ວປະເທດເກືອບ 4 ເທົ່າ. ລັດຖະບານນາຍົກລັດຖະມົນຕີ ທຣູໂດ ກຽມຊຸກຍູ້ແຜນສົ່ງວັກຊີນຕ້ານໂຄວິດ-19 ຈຳນວນໜຶ່ງໃຫ້ປະເທດກຳລັງພັດທະນາ ແລະ ຂາດເຂີນທຶນໃນການຕໍ່ສູ້ກັບວິກິດໂຄວິດ-19 ຢ່າງໜັກ.
ຫລ້າສຸດ, ການາດາຕິດເຊື້ອສະສົມ 472.820 ຄົນ, ເສຍຊີວິດແລ້ວ 13.539 ຄົນ, ທົ່ວໂລກມີຜູ້ຕິດເຊື້ອສະສົມແລ້ວ 72,7 ລ້ານກວ່າຄົນ (72.702.555 ຄົນ), ປິ່ນປົວຫາຍ 51,3 ລ້ານກວ່າຄົນ (51.310.141 ຄົນ) ຫລື ປະມານ 69% ຂອງຜູ້ຕິດເຊື້ອທັງໝົດ, ເສຍຊີວິດແລ້ວ 1.619.399 ຄົນ ອັດຕາການເສຍຊີວິດຢູ່ປະມານ 2,3%.
ປະເທດທີ່ມີຜູ້ຕິດເຊື້ອສະສົມຫລາຍທີ່ສຸດ 5 ອັນດັບທຳອິດຄື: ອາເມລິກາ (16.432.408 ຄົນ), ຮອງລົງມາແມ່ນອິນເດຍ (9.884.100 ຄົນ), ບຣາຊິລ (6.901.952 ຄົນ), ຣັດເຊຍ (2.656.601 ຄົນ) ແລະ ຝຣັ່ງ (2.433.859 ຄົນ), ພົບຜູ້ຕິດເຊື້ອແລ້ວຢ່າງໜ້ອຍ 185 ຈາກ 193 ປະເທດທົ່ວໂລກ.
