ຮອງນາຍົກລັດຖະມົນຕີ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຄຳມ່ວນ
ໃນວັນທີ 14 ທັນວານີ້ , ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຄຳມ່ວນ ເພື່ອຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ທິດທາງຈຸດສຸມສຳລັບ ປີ 2021.
ໂອກາດນີ້, ທ່ານຮອງນາຍົກລັດຖະມົນຕີ ກໍໄດ້ເນັ້ນໃຫ້ການນໍາສືບຕໍ່ເອົາໃຈໃສ່ວຽກງານປ້ອງກັນຊາດ, ປ້ອງກັນຄວາມສະຫງົບ ແລະ ບໍ່ໃຫ້ຖືເບົາ, ການເຝົ້າລະວັງສະກັດກັ້ນການແຜ່ລະບາດຂອງພະຍາດບາດຕາມລະດູການ ແລະ ພະຍາດໂຄວິດ-19 ລວມທັງການເຝົ້າລະວັງໄພທຳມະຊາດຕ່າງໆທີ່ອາດຈະເກີດຂຶ້ນ ແລະ ສືບຕໍ່ພັດທະນາເສດຖະກິດໃຫ້ມີການຂະຫຍາຍຕົວດີຂຶ້ນ ແລະ ສົມດູນກັບທ່າແຮງບົ່ມຊ້ອນຂອງແຂວງຢ່າງແຂງແຮງ, ປະຕິບັດນະໂຍບາຍການຫັນເປັນອຸດສາຫະກຳທີ່ທັນສະໄໝຕິດພັນກັບການປຸງແຕ່ງ ແລະ ການຜະລິດສິນຄ້າ, ພັດທະນາກະສິກຳໄປຕາມທິດການຫັນເປັນກະສິກຳສະອາດ ແລະ ເປັນມິດກັບສິ່ງແວດລ້ອມ, ເອົາໃຈໃສ່ພັດທະນາຊັບພະຍາກອນມະນຸດໃຫ້ແຂງແຮງກວ່າເກົ່າ ເພື່ອເປັນປັດໄຈຕັດສິນໃນການພັດທະນາເສດຖະກິດ-ສັງຄົມ ແລະ ການແກ້ໄຂຄວາມທຸກຍາກຂອງປະຊາຊົນໃຫ້ດີຂຶ້ນ. ພ້ອມເອົາໃຈໃສ່ຂົນຂວາຍ ແລະ ດຶງດູດການລົງທຶນຈາກສາກົນ ແລະ ປະເທດເພື່ອນມິດໃຫ້ຫລາຍຂຶ້ນ.
ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ລາຍງານໃຫ້ຮູ້ວ່າ: ໃນປີ 2020 ເສດຖະກິດແຂວງຂະຫຍາຍຕົວຢູ່ໃນລະດັບ 6,76%, ລວມຍອດຜະລິດຕະພັນພາຍໃນໃຫ້ບັນລຸ 9.000 ກວ່າຕື້ກີບ ແລະ ສະເລ່ຍລາາຍຮັບຕໍ່ຫົວຄົນບັນລຸໄດ້ 2.343 ໂດລາສະຫະລັດ. ໃນປີນີ້ ແຂວງຄຳມ່ວນ ໄດ້ຮັບການອະນຸມັດໂຄງການລົງທຶນຂອງລັດຕາມສະພາໄດ້ຮັບຮອງມີ 332 ໂຄງການ ລວມມູນຄ່າ 250 ຕື້ກີບ, ໃນນັ້ນ ເປັນທຶນພາຍໃນ 83,14 ຕື້ກີບ ເຊິ່ງມາຮອດປັດຈຸບັນສາມາດຈັດຕັ້ງປະຕິບັດສໍາເລັດແລ້ວ 223 ໂຄງການ ເທົ່າກັບ 74% ຂອງທຶນອະນຸມັດທັງໝົດ. ຂະນະດຽວກັນ, ຍັງມີໂຄງການລົງທຶນຂອງກະຊວງກະສິກຳ ແລະ ປ່າໄມ້ອີກ 28 ໂຄງການ ລວມມີມູນຄ່າທັງໝົດ 5.671 ຕື້ກີບ ແລະ ສາມາດຈັດຕັ້ງປະຕິບັດສຳເລັດແລ້ວ 52% ຂອງແຜນການ. ການລົງທຶນພາກເອກະຊົນພາຍໃນ ແລະ ຕ່າງປະເທດ ທຽບໃສ່ໄລຍະດຽວກັນຂອງຊຸມປີຜ່ານມາ ແມ່ນມີລັກສະນະຄົງຕົວຄືມີທັງໝົດ 78 ໂຄງການ ລວມມູນຄ່າ 22.440 ຕື້ກີບ.
ທ່ານເຈົ້າແຂວງ ໃຫ້ຮູ້ອີກວ່າ: ໃນປີ 2020 ຈະສູ້ຊົນເກັບລາຍຮັບໃຫ້ໄດ້ຫລາຍກວ່າ 674 ຕື້ກີບ ແລະ ຜ່ານການຈັດຕັ້ງປະຕິບັດຕົວຈິງມາຮອດວັນທີ 10 ທັນວາ ບັນລຸແລ້ວ 84,11% ຂອງແຜນ ໃນນີ້ ພູດສູນກາງປະຕິບັດໄດ້ 83,97% ແລະ ພູດທ້ອງຖິ່ນ 84,37%, ສ່ວນດ້ານລາຍຈ່າຍຕ່າງໆປະຕິບັດໄດ້ 85,55% ຂອງແຜນການ.
ໃນໂອກາດດຽວກັນ, ທ່ານຮອງນາຍົກລັດຖະມົນຕີ ກໍໄດ້ມອບເງິນສົດ ຈຳນວນ 100 ລ້ານກີບ ໃຫ້ແຂວງຄຳມ່ວນ ເພື່ອເປັນກອງທຶນພັດທະນາ ແລະ ນຳໃຊ້ເຂົ້າໃນການແກ້ໄຂຄວາມທຸກຍາກຂອງປະຊາຊົນໃຫ້ມີຊີວິດການເປັນຢູ່ດີຂຶ້ນເທື່ອລະກ້າວ.
