ລາວຫາລືຮ່າງແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX
ກະຊວງແຜນການ ແລະ ການລົງທຶນ ໄດ້ຈັດກອງປະຊຸມປຶກສາຫາລືລະດັບສູງກ່ຽວກັບຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025) ເພື່ອກະກຽມໃຫ້ແກ່ກອງປະຊຸມໂຕະມົນລະດັບສູງ ຄັ້ງທີ 13 ໄດ້ຈັດຂຶ້ນໃນວັນທີ 11 ທັນວານີ້ ເພື່ອພ້ອມກັນຄົ້ນຄວ້າ, ປຶກສາຫາລື ແລະ ປະກອບຄຳຄິດເຫັນໃສ່ຮ່າງແຜນພັດທະນາດັ່ງກ່າວໃຫ້ມີຄວາມເໝາະສົມ, ສອດຄ່ອງ, ແທດເໝາະ ແລະ ສາມາດຈັດຕັ້ງປະຕິບັດໄດ້ຢ່າງມີປະສິດທິພາບ ແລະ ປະສິດທິຜົນ.
ໂດຍການເປັນປະທານຮ່ວມຂອງທ່ານ ກິແກ້ວ ຈັນທະບູຣີ ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ນາງ ຊາລາ ຊັກກິເນສ ຜູ້ປະສານງານອົງການສະຫະປະຊາຊາດປະຈຳ ສປປ ລາວ, ມີຕົວແທນຈາກບັນດາກະຊວງ-ຂະແໜງການ, ຄູ່ຮ່ວມພັດທະນາ ແລະ ບັນດາທູຕານຸທູດ, ຜູ້ຕາງໜ້າຈາກອົງການຈັດຕັ້ງສາກົນປະຈຳລາວເຂົ້າຮ່ວມນຳດ້ວຍ.
ກອງປະຊຸມໄດ້ປຶກສາຫາລື 6 ເປົ້າໝາຍ ແລະ 25 ແຜນວຽກຈຸດສຸມ ຂອງຮ່າງແຜນພັດທະນາເສດຖະກິດ-ສັງຄົມແຫ່ງຊາດຄັ້ງໃຫມ່ນີ້ໃຫ້ມີຄວາມເໝາະສົມ ແລະ ສອດຄ່ອງກັບບູລິມະສິດການພັດທະນາ ສຳລັບປີ 2021-2025.
6 ເປົ້າໝາຍດັ່ງກ່າວປະກອບມີ: ເສດຖະກິດ, ພັດທະນາຊັບພະຍາກອນມະນຸດ, ຊີວິດການເປັນຢູ່ທີ່ດີ, ການປົກປັກຮັກສາສິ່ງແວດລ້ອມ, ການພັດທະນາໂຄງລ່າງເຊື່ອມໂຍງ ແລະ ເຊື່ອມຈອດ ແລະ ການຄຸ້ມຄອງບໍລິຫານລັດ ແລະ ຈະໄດ້ສຸມໃສ່ປະຕິຮູບໂຄງສ້າງເສດຖະກິດໃຫ້ມີການຫັນປ່ຽນຢ່າງຮອບດ້ານກ້າວໄປສູ່ການເຕີບໂຕທີ່ມີຄຸນນະພາບຕາມທິດຍືນຍົງ ແລະ ສີຂຽວ; ການພັດທະນາຊັບພະຍາກອນມະນຸດ ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ; ພ້ອມທັງແກ້ໄຂສິ່ງທ້າທາຍ ແລະ ຂໍ້ຄົງຄ້າງຕ່າງໆ ໃນການຈັດຕັ້ງປະຕິບັດແຜນການ 5 ປີຄັ້ງຜ່ານມາ ໂດຍສະເພາະແມ່ນການຮັບມືກັບບັນດາສິ່ງທ້າທາຍທີ່ເກີດຂຶ້ນໃໝ່ ລວມທັງຜົນກະທົບຈາກການລະບາດຂອງພະຍາດໂຄວິດ-19, ບັນຫາການປ່ຽນແປງດິນຟ້າອາກາດ, ຂໍ້ຂັດແຍ່ງທາງການຄ້າ ແລະ ບັນຫາອື່ນໆ ເພື່ອຫລຸດຜ່ອນຜົນກະທົບຕໍ່ການພັດທະນາຂອງປະເທດເຮົາ ແລະ ສາມາດນຳພາປະເທດຊາດຫລຸດພົ້ນອອກຈາກສະຖານະພາບປະເທດດ້ອຍພັດທະນາ.
ນອກຈາກນີ້, ກອງປະຊຸມຍັງໄດ້ປຶກສາຫາລືກ່ຽວກັບກົນໄກການຈັດຕັ້ງປະຕິບັດ ໂດຍສະເພາະການກຳນົດຂອບການຕິດຕາມ ແລະ ປະເມີນຜົນ, ຍຸດທະສາດການເງິນ ແລະ ການປະເມີນຄ່າໃຊ້ຈ່າຍຂອງແຜນການ 5 ປີ ຄັ້ງທີ IX ເພື່ອຮັບປະກັນໃຫ້ແຜນການດັ່ງກ່າວສາມາດຈັດຕັ້ງປະຕິບັດຢ່າງມີປະສິດທິພາບ ແລະ ປະສິດທິຜົນ.
