ງານຜະລິດຕະພັນລາວ ປະຈຳປີ 2020 ຈະເປີດຂຶ້ນເປັນເວລາ 10 ມື້ (25/12/2020-03/01/2021)

ພິທີຖະແຫລງຂ່າວງານຜະລິດຕະພັນລາວ ປະຈຳປີ 2020 (Made in laos 2020) ໄດ້ມີຂຶ້ນໃນວັນທີ 10 ທັນວານີ້ ຢູ່ສູນການຄ້າລາວ-ໄອເຕັກ ນະຄອນຫລວງວຽງຈັນ, ເພື່ອເປັນການກະຕຸ້ນເສດຖະກິດພາຍໃນ, ຊຸກຍູ້ໃຫ້ມີການໃຊ້ຈ່າຍ, ການບໍລິການ  ແລະ ສົ່ງເສີມການຜະລິດເປັນສິນຄ້າພາຍໃນປະເທດໃຫ້ຫຼາຍຂຶ້ນ.

ທ່ານ ນາງ ຈັນທະຈອນ ວົງໄຊ ຮອງປະທານ ສຄອຊ ໃຫ້ຮູ້ວ່າ: ດັ່ງພວກເຮົາໄດ້ຮັບຮູ້ນຳກັນແລ້ວວ່າ, ປະເທດເຮົາແມ່ນໄດ້ຮັບຜົນກະທົບໜັກໜ່ວງຈາກການລະບາດຂອງເຊື້ອພະຍາດ COVID-19, ດັ່ງນັ້ນ, ໂດຍອີງຕາມນະໂຍບາຍຂອງລັດຖະບານ ແນໃສ່ກະຕຸ້ນເສດຖະກິດພາຍໃນ, ຊຸກຍູ້ໃຫ້ມີການໃຊ້ຈ່າຍ, ການບໍລິການພາຍ ແລະ ການຜະລິດເປັນສິນຄ້າພາຍໃນປະເທດໃຫ້ຫລາຍຂຶ້ນ ເພື່ອເສີມສ້າງຄວາມເຂັ້ມແຂງໃຫ້ຜູ້ປະກອບການ, ສະພາການຄ້າ ແລະ ອຸດສາຫະກໍາ ແຫ່ງຊາດລາວ ຮ່ວມກັບ ສະພາການຄ້າ ແລະ ອຸດສາຫະກໍາ ນະຄອນຫຼວງວຽງຈັນ, ແຂວງ, ສະມາຄົມ, ກຸ່ມທຸລະກິດ ຈະໄດ້ຈັດງານຜະລິດຕະພັນລາວ 2020 Made in Laos 2020 ຂຶ້ນໃນລະຫວ່າງວັນທີ 25/12/2020-03/01/2021.

ງານປີນີ້ນອກຈາກເປັນການກະຕຸ້ນເສດຖະກິດພາຍໃນທີ່ໄດ້ຮັບຜົນກະທົບຈາກ COVID-19 ແລ້ວ ກໍເພື່ອເປັນການສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 45 ປີ ແລະ ລະນຶກວັນເກີດ ຂອງພະນະທ່ານ ໄກສອນ ພົມວິຫານ ຄົບຮອບ 100 ປີ, ສ້າງເວທີໂຄສະນາສົ່ງເສີມຜະລິດຕະພັນລາວ ແລະ ກະຕຸ້ນຜູ້ປະກອບການ, ພ້ອມສົ່ງເສີມ ແລະ ສ້າງຈິດສໍານຶກໃຫ້ຜູ້ຊົມໃຊ້ຫັນມາໃຊ້ຜະລິດຕະພັນລາວ, ລາວທ່ຽວລາວ, ລາວ ຟັງ ລາວ ແລະ ອື່ນໆ.

ພາຍໃນງານຈະມີການວາງສະແດງສິນຄ້າທີ່ຫຼາກຫຼາຍຈາກ 100 ກ່ວາບໍລິສັດມາຈາກແຂວງຕ່າງໆ ແລະ ຫຼາຍກ່ວາ 220 ຫ້ອງວາງສະແດງ, ເຊິ່ງຈະມີຜະລິດຕະພັນເຄື່ອງເປັນເອກະລັກ ແລະ ຜະລິດຕະພັນໃໝ່ໆທີ່ຈະມານໍາສະເຫນີພາຍໃນງານ ແລະ ຈະມີກິດຈະກໍາແຈກແຖມຄັ້ງຍິ່ງໃຫຍ່ຈາກຫຼາຍຫຼາຍບໍລິສັດ ທີ່ເຂົ້າ ຮ່ວມໃນງານຄັ້ງນີ້, ພ້ອມນັ້ນ ກໍຈະມີກິດຈະກໍາຕ່າງໆເຊັ່ນ: ກອງປະຊຸມສໍາມະນາໃຫ້ຄວາມຮູ້ແກ່ ຜູ້ປະກອບການ ທາງດ້ານ E-Commerce, ການເຂົ້າຫາແຫຼ່ງທຶນ, ການປັບຕົວໃນສະພາບ New Normal, ກອງປະຊຸມພົບປະທຸລະກິດ ແລະ ອື່ນໆ.