Sinopharm ວັກຊີນໂຄວິດຈາກຈີນ ສະແດງປະສິດທິພາບ 86%
ວັນທີ 9 ທັນວານີ້, ສຳນັກຂ່າວ PA ລາຍງານວ່າ: ກະຊວງສາທາລະນະສຸກຂອງສະຫະລັດ ອາຣັບ ເອມິເຣດ ຫລື UAE ໄດ້ເປີດເຜີຍຜົນການທົດລອງເບື້ອງຕົ້ນຂອງວັກຊີນປ້ອງກັນພະຍາດໂຄວິດ-19 ທີ່ພັດທະນາໂດຍ Sinopharm ຜູ້ພັດທະນາວັກຊີນຂອງຈີນ ໂດຍລະບຸວ່າມີປະສິດທິພາບໃນການປ້ອງກັນການຕິດເຊື້ອຢູ່ທີ່ 86%.
ໃນການທົດລອງທີ່ UAE ຄັ້ງນີ້ມີອາສາສະໝັກເຂົ້າຮ່ວມຈຳນວນ 31.000 ຄົນ ຈາກ 125 ປະເທດ ອາຍຸລະຫວ່າງ 18 ເຖິງ 60 ປີ ທັງໝົດໄດ້ຮັບວັກຊີນຈຳນວນ 2 ໂດສໃນໄລຍະເວລາ 28 ວັນ ໂດຍລະບຸວ່າຜົນການວິເຄາະບໍ່ໄດ້ສະແດງເຖິງຜົນຂ້າງຄຽງອັນຕະລາຍໃດໆ.
ປັດຈຸບັນ ວັກຊີນຂອງ Sinopharm ໄດ້ຮັບອະນຸມັດໃຫ້ນຳໃຊ້ໃນກໍລະນີສຸກເສີນແລ້ວຢູ່ບາງປະເທດ ລະຫວ່າງລໍຖ້າຜົນການທົດລອງໄລຍະສຸດທ້າຍທີ່ກຳລັງດຳເນີນຢູ່ໃນ 10 ປະເທດ.
ຕາມລາຍງານລະບຸວ່າ: ວັກຊີນຊະນິດນີ້ໃຊ້ໄວຣັສຕາຍ ແບບດຽວກັບທີ່ໃຊ້ໃນວັກຊີນໂປລິໂອ ເຊິ່ງເປັນເຕັກໂນໂລຊີທີ່ຜ່ານການທົດລອງມາແລ້ວ.
ສ່ວນສາເຫດທີ່ຕ້ອງເປີດການທົດລອງນອກປະເທດຈີນ ຄາດວ່າເປັນຜົນມາຈາກການທີ່ໃນປະເທດຈີນມີການຄວບຄຸມການຕິດເຊື້ອໄວຣັສໄດ້ເປັນຢ່າງດີ ເຮັດໃຫ້ບໍ່ຢູ່ໃນສະພາບທີ່ເໝາະສົມຕໍ່ການທົດລອງປະສິດທິພາບຂອງວັກຊີນ.
