ກອງປະຊຸມສຸດຍອດ CLMV ຄັ້ງທີ 10 ເນັ້ນຍົກສູງການເຊື່ອມໂຍງພາກພື້ນ
ກອງປະຊຸມສຸດຍອດຂອບການຮ່ວມມື ກໍາປູເຈຍ-ລາວ-ມຽນມາ-ຫວຽດນາມ (CLMV) ຄັ້ງທີ 10 ແບບທາງໄກ ໄດ້ຈັດຂຶ້ນໃນວັນທີ 9 ທັນວານີ້, ພາຍໃຕ້ຄໍາຂວັນ “ຍົກສູງປະສິດທິພາບການເຊື່ອມຈອດ ເພື່ອການເຊື່ອມໂຍງພາກພື້ນ ໂດຍການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ຊຶ່ງມີປະມຸກລັດ ແລະ ຫົວໜ້າລັດຖະບານຈາກ 4 ປະເທດສະມາຊິກ ແລະ ທ່ານເລຂາທິການໃຫຍ່ອາຊຽນ ເຂົ້າຮ່ວມນຳດ້ວຍ.
ກອງປະຊຸມໄດ້ຕີລາຄາຄືນໝາກຜົນການຈັດຕັ້ງປະຕິບັດຖະແຫລງການຮ່ວມຂອງກອງປະຊຸມສຸດຍອດ CLMV ຄັ້ງທີ 9 ແລະ ແຜນປະຕິບັດງານ CLMV (2019-2020) ໂດຍສະເພາະແມ່ນການຈັດຕັ້ງປະຕິບັດຄຳໝັ້ນສັນຍາກ່ຽວກັບການຍົກສູງວຽກງານເຊື່ອມຈອດພາກພື້ນ ແລະ ການພັດທະນາພື້ນຖານໂຄງລ່າງ ກໍຄືການພັດທະນາແລວເສດຖະກິດຕາເວັນອອກ-ຕາເວັນຕົກ, ແລວເສດຖະກິດໃຕ້ ແລະ ເສັ້ນທາງດ່ວນອາຊຽນ, ການປັບປຸງພື້ນຖານໂຄງບົນ ແລະ ການສ້າງຂີດຄວາມສາມາດຂອງບຸກຄະລາກອນ ເພື່ອເຊື່ອມໂຍງທາງດ້ານເສດຖະກິດໃຫ້ມີປະສິດທິພາບ ແລະ ປະສິດທິຜົນ.
ພ້ອມນີ້, ກອງປະຊຸມໄດ້ຮັບຮອງເອົາຖະແຫລງການຮ່ວມ ແລະ ໂຄງການບູລິມະສິດຂອງ CLMV ເພື່ອເປັນເອກະສານພື້ນຖານໃນການກໍານົດທິດທາງການຮ່ວມມືໃນຕໍ່ໜ້າ, ພ້ອມທັງໄດ້ຮັບຮອງເອົາຂອບວຽກເພື່ອການພັດທະນາປະເທດ CLMV ໃຫ້ເປັນແຜນຍຸດທະສາດລວມໃນການຊຸກຍູ້ປະເທດ CLMV ໃຫ້ກາຍເປັນສູນກາງທາງດ້ານເສດຖະກິດທີ່ກ້າວໜ້າຂອງໂລກ ແລະ ສາມາດກາຍເປັນປະເທດທີ່ມີລາຍຮັບປານກາງສູງ ຮອດປີ 2030.
ໃນໂອກາດນີ້, ບັນດາຜູ້ນຳໄດ້ສະແດງຄວາມຊົມເຊີຍຕໍ່ຜົນສຳເລັດຢ່າງຈົບງາມໃນການປະຕິບັດໜ້າທີ່ເປັນປະທານ CLMV ຂອງ ສປປ ລາວ (2018-2020), ຂະນະດຽວກັນ ທ່ານ ທອງລຸນ ສີສຸລິດ ກໍໄດ້ສະແດງຄວາມຂອບໃຈຕໍ່ການຊ່ວຍເຫລືອ, ການສະໜັບສະໜູນ ແລະ ການຮ່ວມມືທີ່ດີຈາກບັນດາປະເທດສະມາຊິກ ຕະຫລອດໄລຍະ 2 ປີຜ່ານມາ ແລະ ໄດ້ມອບການເປັນປະທານ CLMV ໃຫ້ແກ່ ມຽນມາ ເພື່ອສືບຕໍ່ປະຕິບັດໜ້າທີ່ອັນມີກຽດດັ່ງກ່າວໃນໄລຍະ 2 ປີຕໍ່ໜ້າ.
