ຜູ້ຕິດເຊື້ອໂຄວິດ-19 ຢູ່ມຽນມາ ຮອດ 1 ແສນຄົນແລ້ວ
ກະຊວງສາທາລະນະສຸກ ແລະ ການກິລາຂອງມຽນມາ ຖະແຫລງລາຍງານຄວາມຄືບໜ້າສະຖານະການການລະບາດຂອງໂຄວິດ-19 ປະຈຳວັນທີ 7 ທັນວາ ໂດຍກວດພົບຜູ້ຕິດເຊື້ອໃໝ່ເພີ່ມຂຶ້ນ 1.276 ຄົນ ແລະ ມີຜູ້ເສຍຊີວິດອີກ 22 ຄົນ.
ສົ່ງຜົນໃຫ້ຈຳນວນຜູ້ຕິດເຊື້ອສະສົມສູງເຖິງ 100.431 ຄົນ ແຊງໜ້າຈຳນວນຜູ້ຕິດເຊື້ອທົ່ວປະເທດຈີນ ເຊິ່ງມີພຽງ 92.993 ຄົນ. ຂະນະທີ່ຜູ້ເສຍຊີວິດມີທັງໝົດ 2.132 ຄົນ.
ໃນອາທິດຜ່ານມາ, ສະຖານະການການແຜ່ລະບາດຢູ່ມຽນມາເຂົ້າຂັ້ນວິກິດ ພົບຜູ້ຕິດເຊື້ອໃໝ່ຫລາຍກວ່າ 10.000 ຄົນໃນອາທິດດຽວ ເຊິ່ງລັດຖະບານຊີ້ວ່າເປັນຜົນມາຈາກປະຊາຊົນບໍ່ໃສ່ໃຈຄຳເຕືອນຂອງລັດຖະບານໃຫ້ຢູ່ແຕ່ເຮືອນ.
ມີຫລັກຖານເປັນຮູບໃນສັງຄົມອອນລາຍທີ່ກຳລັງຈຸດວິພາກວິຈານຢ່າງກວ້າງຂວາງ ເພາະສະແດງໃຫ້ເຫັນວ່າປະຊາຊົນຈຳນວນຫລາຍຍັງໃຊ້ຊີວິດຕາມປົກກະຕິ ທັງຜ່ອນຄາຍ, ປິກນິກ ແລະ ນັ່ງຫລິ້ນຕາມສະຖານທີ່ສາທາລະນະ ຫລາຍຄົນຍັງບໍ່ໃສ່ຜ້າປິດປາກ-ດັງນຳອີກ ທັງທີ່ຈຳນວນຜູ້ຕິດເຊື້ອກຳລັງເພີ່ມສູງຂຶ້ນ.
ດ້ວຍເຫດນີ້, ນັບແຕ່ວັນທີ 7 ທັນວາຜ່ານມາ, ລັດຖະບານນະຄອນຢາງກຸ້ງຈຶ່ງສັ່ງປິດສະຖານທີ່ພັກຜ່ອນຢ່ອນໃຈສ່ວນຫລາຍທົ່ວເມືອງເປັນການຊົ່ວຄາວ ໂດຍສະເພາະສວນສາທາລະນະຕ່າງໆ.
ໃນວັນທີ 5 ທັນວາ, ນາງ ອອງ ຊານ ຊູຈີ ທີ່ປຶກສາແຫ່ງລັດ ຖະແຫລງການຖ່າຍທອດສົດທົ່ວປະເທດ ເປີດເຜີຍວ່າ: ລັດຖະບານຕ້ອງໃຊ້ເງິນປິ່ນປົວຜູ້ຕິດເຊື້ອທີ່ມີອາການໜັກ ປະມານ 2,5 ລ້ານຈ໊າດ – 5 ລ້ານຈ໊າດຕໍ່ຄົນ ເພື່ອເນັ້ນເຖິງພາລະທາງການເງິນມະຫາສານ ເຊິ່ງຈະຍິ່ງເພີ່ມຂຶ້ນອີກຖ້າຜູ້ຕິດເຊື້ອເພີ່ມຂຶ້ນເລື້ອຍໆ.
ນາງ ຊູຈີ ຍັງເຕືອນປະຊາຊົນໃນນະຄອນຢາງກຸ້ງວ່າ: ຈຳນວນຜູ້ຕິດເຊື້ອ ແລະ ເສຍຊີວິດເພີ່ມຂຶ້ນນັບແຕ່ອາທິດຜ່ານມາ ເປັນຜົນມາຈາກການທີ່ປະຊາຊົນໄປລວມຕົວກັນເປັນຈຳນວນຫລາຍໃນຊ່ວງມື້ພັກ ເພື່ອສະເຫລີມສະຫລອງ “ເທສະການແຫ່ງແສງ” (Tazaungdaing) ເຊິ່ງປີນີ້ມີຂຶ້ນລະຫວ່າງວັນທີ 27-30 ພະຈິກຜ່ານມາ.
ພັກສັນນິບາດແຫ່ງຊາດເພື່ອປະຊາທິປະໄຕ ຫລື NLD ເຊິ່ງເປັນພັກລັດຖະບານຂອງນາງ ຊູຈີ ຕ້ອງຮັບພາລະໜັກທັນທີ ຫລັງຊະນະການເລືອກຕັ້ງທົ່ວໄປເມື່ອວັນທີ 8 ພະຈິກ ດ້ວຍຄະແນນສຽງຢ່າງຫລວງຫລາຍ.
ເພາະໃນໄລຍະກ່ອນການເລືອກຕັ້ງ ຈຳນວນຜູ້ຕິດເຊື້ອແຕ່ລະວັນສະເລ່ຍມີ 1.300 ຄົນ, ແຕ່ບໍ່ເທົ່າໃດອາທິດຫລັງສຳເລັດການເລືອກຕັ້ງ ຈຳນວນຜູ້ຕິດເຊື້ອເພີ່ມເປັນ 1.600 ຄົນຕໍ່ວັນ.
ດັ່ງນັ້ນ, ກະຊວງສາທາລະນະສຸກ ແລະ ການກິລາ ຈຶ່ງຮຽກຮ້ອງໃຫ້ປະຊາຊົນພະຍາຍາມຢູ່ແຕ່ເຮືອນ ນັບແຕ່ວັນທີ 19 ພະຈິກເປັນຕົ້ນມາ, ແຕ່ຈາກຮູບທີ່ເຜີຍແຜ່ໃນອິນເຕີເນັດ ເປັນຫລັກຖານວ່າປະຊາຊົນສ່ວນໜຶ່ງບໍ່ສົນໃຈຄຳເຕືອນ ແລະ ຍັງອອກມາພັກຜ່ອນຢ່ອນໃຈຄືປົກກະຕິ.
ວິກິດໂຄວິດ-19 ຢູ່ມຽນມາລະບາດໜັກເປັນຮອບທີ 2 ນັບແຕ່ວັນທີ 16 ສິງຫາ ຫລັງກວດພົບປະຊາຊົນຈຳນວນຫລາຍຕິດເຊື້ອ ທັງທີ່ບໍ່ມີປະຫວັດການເດີນທາງອອກນອກປະເທດ ຫລື ໃກ້ຊິດກັບຜູ້ຕິດເຊື້ອທີ່ຢູ່ໃນລະບົບ.
