ທ່ານ ຮຸນ ເຊນ ຢືນຢັນແຈກວັກຊີນ ຕ້ານໂຄວິດ-19 ໃຫ້ຊາວກຳປູເຈຍຟຣີ
ທ່ານ ຮຸນ ເຊນ ນາຍົກລັດຖະມົນຕີກຳປູເຈຍ ເປີດເຜີຍໃນວັນທີ 7 ທັນວາວ່າ: ກຳປູເຈຍຈະຈັດສັນວັກຊີນປ້ອງກັນພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ໃຫ້ປະຊາຊົນໂດຍບໍ່ຄິດຄ່າໃຊ້ຈ່າຍ ເມື່ອວັກຊີນພ້ອມສຳລັບການນຳໃຊ້ແລ້ວ.
ທ່ານ ຮຸນ ເຊນ ໂພສໃນເຟສບຸກວ່າ: ທ່ານໄດ້ແນະນຳໃຫ້ທ່ານ ແມມ ບຸນເຮັງ ລັດຖະມົນຕີກະຊວງສາທາລະນະສຸກຂອງກຳປູເຈຍ ປຶກສາຫາລືກັບພັນທະມິດເພື່ອການພັດທະນາ ໂດຍສະເພາະອົງການອະນາໄມໂລກ (WHO) ເພື່ອຄັດເລືອກວ່າກຳປູເຈຍຄວນຈັດຊື້ວັກຊີນຈາກປະເທດຜູ້ຜະລິດໃດ.
ຂະນະດຽວກັນ, ທ່ານ ຮຸນ ເຊນ ແຈ້ງຕໍ່ທ່ານ ອຸນ ພອນມົນນິໂຣ ລັດຖະມົນຕີກະຊວງເສດຖະກິດ ແລະ ການເງິນຂອງກຳປູເຈຍ ໃຫ້ດຳເນີນການກະກຽມງົບປະມານຈັດຊື້ວັກຊີນໄລຍະທຳອິດ ຈຳນວນ 1 ລ້ານໂດສ ເພື່ອຈັດສັນໃຫ້ກຸ່ມປະຊາກອນທີ່ມີຄວາມສ່ຽງຕິດເຊື້ອສູງ ໂດຍວັກຊີນຈຳນວນດັ່ງກ່າວສາມາດໃຊ້ໄດ້ໃນປະຊາຊົນ 500.000 ຄົນ ເນື່ອງຈາກແຕ່ລະຄົນຕ້ອງໄດ້ຮັບວັກຊີນຈຳນວນ 2 ໂດສ.
ກຳປູເຈຍທຸ້ມເທຄວາມພະຍາຍາມຢ່າງຍິ່ງໃນການຢັບຢັ້ງພະຍາດໂຄວິດ-19 ທີ່ແຜ່ລະບາດລະດັບຊຸມຊົນຄັ້ງທຳອິດເມື່ອວັນທີ 28 ພະຈິກຜ່ານມາ ຫລັງກວດພົບການຕິດເຊື້ອຂອງສະມາຊິກຄອບຄົວ 6 ຄົນທີ່ອາໄສຢູ່ໃນນະຄອນຫລວງພະນົມເປັນ ແລະ ແຂວງສຽມລຽບ ທາງຕາເວັນຕົກສຽງເໜືອ.
ຖະແຫລງການຈາກກະຊວງສາທາລະນະສຸກເມື່ອວັນທີ 7 ທັນວາ ລະບຸວ່າ: ປະຊາຊົນໃນພະນົມເປັນມີຜົນກວດໂຄວິດ-19 ເປັນບວກຢ່າງໜ້ອຍ 32 ຄົນ.
ທັງນີ້, ກຳປູເຈຍສັ່ງປິດໂຮງຮຽນ, ພິພິທະພັນ, ໂຮງໜັງ ແລະ ສະຖານຈັດສະແດງສິລະປະທົ່ວປະເທດ ຕະຫລອດຈົນຫ້າມການລວມຕົວຂະໜາດໃຫຍ່ ແລະ ຈັດງານແຕ່ງດອງໃນນະຄອນຫລວງພະນົມເປັນ ແລະ ແຂວງສຽມລຽບ ເພື່ອຢັບຢັ້ງການລະບາດຂອງພະຍາດໂຄວິດ-19 ໂດຍນັບແຕ່ເດືອນມັງກອນ 2020 ຈົນຮອດປັດຈຸບັນ ກຳປູເຈຍລາຍງານການກວດພົບຜູ້ຢືນຢັນຜົນສະສົມ 348 ຄົນ ໂດຍໄດ້ຮັບການປິ່ນປົວຈົນຫາຍດີແລ້ວ 306 ຄົນ ແລະ ຍັງບໍ່ມີລາຍງານຜູ້ເສຍຊີວິດ.
