ປູກຈິດສຳນຶກສຸຂະພາບທາງເພດ ແລະ ການຈະເລີນພັນໃຫ້ແກ່ໄວໜຸ່ມ

ໃນທ້າຍອາທິດຜ່ານມາ, ອົງການສະຫະປະຊາຊາດສໍາລັບປະຊາກອນ ຮ່ວມກັບ ອົງການມະຫາວິທະຍາໄລທີ່ໃຊ້ພາສາຝຣັ່ງ, ສະຖາບັນຄົ້ນຄວ້າເພື່ອການພັດທະນາ, ສູນຝຣັ່ງໂກໂຟນ, ບໍລິສັດສະແດງລະຄອນ The Beasts On The Moon Theatre ແລະ ບໍລິສັດ ຟັງລາວ ໄດ້ຈັດການສະແດງສິລະປະ ແລະ ລະຄອນ ກ່ຽວກັບ “ ຮ່າງກາຍ, ຊີວິດ, ອະນາຄົດຂອງຂ້ອຍ” ພາຍໃຕ້ຫົວຂໍ້ “ສ້າງຄວາມເຂັ້ມແຂງໃຫ້ຊາວໜຸ່ມ ເພື່ອການພັດທະນາຢ່າງສະເໝີພາບ ແລະ ມີສ່ວນຮ່ວມ” ທີ່ມະຫາວິທະຍາໄລແຫ່ງຊາດ ໃນນະຄອນຫລວງວຽງຈັນເພື່ອແນໃສ່ປູກຈິດສຳນຶກ ໃຫ້ບັນດານັກສຶກສາມະຫາ ວິທະຍາໄລຢູ່ໃນແຂວງຕ່າງໆ ໄດ້ຮູ້ ແລະ ເຂົ້າໃຈກ່ຽວກັບສຸຂະພາບທາງເພດ ແລະ ການຈະເລີນພັນຂອງຊາວໜຸ່ມ, ສະພາບຂອງໄວໜຸ່ມຍິງ ແລະ ການຕໍ່ສູ້ຕ້ານກັບການດູຖູກ ແລະ ການຈຳແນກ. ການ ສະແດງສິລະປະ ແລະ ການສະແດງລະຄອນ ໃນຄັ້ງນີ້ ໄດ້ເນັ້ນເຖິງສະພາບການເປັນຢູ່, ຄວາມບໍ່ຍອມຮັບໃນສັງຄົມ ແລະ ຄວາມຮຸນແຮງຂອງຄູ່ຮັກ, ການປະຕິບັດການຂາຍບໍລິການທາງເພດ ແລະ ອື່ນໆ.

ຜູ້ຕາງໜ້າອົງການມະຫາວິທະຍາໄລທີ່ໃຊ້ພາສາຝຣັ່ງ ປະຈໍາລາວໃຫ້ຊາບວ່າ: ກຸ່ມນັກສິລະປິນ ແລະ ຊ່ຽວຊານ ແມ່ນຈະໄດ້ດຳເນີນການສະແດງ, ແລກປ່ຽນກັບຊາວໜຸ່ມຄື: ໃນວັນທີ 4 ທັນວານີ້ ແມ່ນຈັດຂຶ້ນຢູ່ມະຫາວິທະຍາໄລແຫ່ງຊາດ, ໃນວັນທີ 8 ທັນວາ ຈະໄປສະແດງຢູ່ທີ່ມະຫາວິທະຍາໄລວິທະຍາສາດສຸຂະພາບ, ໃນວັນທີ 15 ທັນວາ ຢູ່ໂຮງຮຽນວິທະຍາໄລຄູນະຄອນຫລວງພະບາງ, ວັນທີ 12 ມັງກອນຈະໄປສະແດງຢູ່ທີ່ວິທະຍາໄລສະຫວັນນະເຂດ ແລະ ວັນທີ 14 ມັງກອນ ຈະສະແດງຢູ່ໂຮງຮຽນ ວິທະຍາໄລຄູແຂວງ ຈໍາປາສັກ.

ຜູ້ຕາງໜ້າ ອົງການສະຫະປະຊາຊາດສໍາລັບປະຊາກອນ ປະຈຳ ສປປ ລາວ ກ່າວວ່າ: ໃນເວລາທີ່ຊາວໜຸ່ມໄດ້ເຂົ້າຮ່ວມໃນການພັດທະນາວິທີແກ້ໄຂສຳລັບຊຸມຊົນຂອງພວກເຂົາແລ້ວແມ່ນເຂົາເຈົ້າກໍຈະສາມາດນຳໄປສູ່ເສັ້ນທາງເພື່ອບັນລຸວາລະການພັດທະນາແບບຍືນຍົງ 2030. ສາມາດຕັດສິນໃຈໃນທາງບວກສຳລັບຕົນເອງ, ສຳລັບການຮຽກຮ້ອງສິດທິຂອງເຂົາເຈົ້າ ແລະ ສະໜັບສະໜູນສິດທິຂອງແມ່ຍິງ ແລະ ເດັກຍິງທີ່ຢູ່ອ້ອມຂ້າງເຂົາເຈົ້າ ເພື່ອປະກອບສ່ວນໃຫ້ອະນາຄົດທີ່ສະເໝີພາບກັນ. ພ້ອມກັນນີ້, ພາຍໃນງານຍັງໄດ້ເປີດແອັບນ້ອຍຢາກຮູ້ (Noi Yakhoo Mobile App) ແລະ ການໃຫ້ຄໍາປຶກສາ ຊ່ວຍເຫລືອດ້ານສຸຂະພາບທາງຈິດ ໂດຍຜ່ານໂທລະສັບສາຍດ່ວນ 1362 ເພື່ອຊຸກຍູ້ໃຫ້ໄວໜຸ່ມໄດ້ເຂົ້າເຖິງຂໍ້ມູນຂ່າວສານ ແລະ ການບໍລິການໄດ້ໄວ ແລະ ຫລາຍຂຶ້ນ. ສ່ວນແອັບນ້ອຍຢາກຮູ້ ແມ່ນໄດ້ເປີດເປັນທາງການໃນເດືອນພຶດສະພາ ຜ່ານມານີ້ ໂດຍມີຜູ້ເຂົ້າສະໝັກແລ້ວຫລາຍກວ່າ 1.200 ຄົນ.