ເປີດການແຂ່ງຂັນຖາມ-ຕອບຄວາມຮູ້ກ່ຽວກັບອາຊຽນຄັ້ງທີ 9 ປະຈຳປີ 2020 ນັກຮຽນນະຄອນຫລວງສາມາດຍາດໄດ້ແຕ່ອັນດັບ 1-3
ການແຂ່ງຂັນຖາມ-ຕອບຄວາມຮູ້ກ່ຽວກັບອາຊຽນລະດັບຊາດຄັ້ງທີ 9 ປະຈຳປີ 2020 ໄດ້ມີຂຶ້ນໃນວັນທີ 4 ທັນວານີ້, ທີນະຄອນຫລວງວຽງຈັນໂດຍການເຂົ້າຮ່ວມຂອງທ່ານ ໂພສີ ແກ້ວມະນີວົງ ຜູ້ອໍານວຍການໃຫຍ່ ວິທະຍຸກະຈາຍສຽງແຫ່ງຊາດລາວ, ທັງເປັນຮອງຫົວຫນ້າຄະນະຮັບຜິດຊອບຈັດຕັ້ງການແຂ່ງຂັນຖາມ-ຕອບຄວາມຮູ້ດັ່ງກ່າວໃນການແຂ່ງຂັນ, ໄດ້ມີຕົວແທນຈາກແຂວງຫລວງພະບາງ, ສະຫວັນນະເຂດ, ຈໍາປາສັກ ແລະ ນະຄອນຫລວງວຽງຈັນເຂົ້າຮ່ວມເປັນຈຳນວນຫລາຍ.
ເຊິ່ງຜ່ານການແຂ່ງຂັນ ອັນດັບທີ 1 ໄດ້ແກ່ທ້າວກິດສະໄນ ພົມມະວົງສາ ອາຍຸ 18 ປີ ຈາກໂຮງຮຽນກຽດຕິສັກ ນະຄອນຫລວງວຽງຈັນ, ອັນດັບທີ 2 ໄດ້ແກ່ທ້າວ ອາມະນາ ສຸດທິຈັກ ອາຍຸ 15 ປີ ມາຈາກໂຮງຮຽນນານາຊາດ ແສງດາລາ ນະຄອນຫລວງວຽງຈັນ, ສ່ວນອັນດັບທີ 3 ໄດ້ແດ່ ນາງ ປາວີນາ ສໍລະຈຳປາ ອາຍຸ 17 ປີ ຈາກໂຮງຮຽນປາຖະໜາ ນະຄອນຫລວງວຽງຈັນ ແລະ ອັນດັບທີ 4 ໄດ້ແກ່ ນາງ ຈິນດາວັນ ຈັນທະວິສຸກ ອາຍຸ 16 ປີຈາກໂຮງຮຽນປາກເຊ ແຂວງຈຳປີສັກ.
ໃນໂອກາດນີ້, ທ່ານ ວິລະສັກ ປຣະວົງວຽງຄໍາ ຄະນະຮັບຜິດຊອບໂຄງການ ASEAN Quiz ແຫ່ງ ສປປ ລາວ ໄດ້ມີຄຳເຫັນວ່າ: ໂຄງການການແຂ່ງຂັນຖາມ-ຕອບຄວາມຮູ້ກ່ຽວກັບອາຊຽນ ເປັນໂຄງການໜຶ່ງທີ່ລິເລີ່ມຂຶ້ນໂດຍຄະນະກໍາມະການວັດທະນະທໍາ ແລະ ຖະແຫລງຂ່າວຂອງອາຊຽນ, ເປັນການແຂ່ງຂັນທົດສອບຄວາມຮູ້ກ່ຽວກັບອາຊຽນ ຊຶ່ງຈັດຂຶ້ນໂດຍການເຂົ້າຮ່ວມຂອງບັນດານ້ອງນັກຮຽນຈາກໂຮງຮຽນມັດທະຍົມຕອນປາຍທັງພາກລັດ ແລະ ເອກະຊົນໃນ 10 ປະເທດສະມາຊິກອາຊຽນ. ເພື່ອແນໃສ່ ໂຄສະນາເຜີຍແຜ່ ແລະ ສົ່ງເສີມນ້ຳໃຈອັນດີງາມ ເພື່ອມິດຕະພາບ ແລະ ຄວາມສາມັກຄີລະຫວ່າງບັນດາຊາວໜຸ່ມອາຊຽນ ແລະ ທັງເປັນການສ່ອງແສງໃຫ້ເຫັນກ່ຽວກັບຄວາມເປັນມາ ແລະ ວິວັດທະນາການທາງດ້ານປະຫວັດສາດ, ສັງຄົມ, ວັດທະນະທໍາ, ການເມືອງ ແລະ ເສດຖະກິດ ພາຍໃນພາກພື້ນອາຊີຕະເວັນອອກສ່ຽງໃຕ້ຂອງພວກເຮົາ.
ຊຶ່ງການແຂ່ງຂັນນີ້ ແມ່ນໄດ້ຈັດຂຶ້ນທຸກໆສອງປີ ນັບແຕ່ປີ 2002 ເປັນຕົ້ນມາ, ໂດຍໄດ້ເລັ່ງໃສບັນດານ້ອງນັກຮຽນໃນລະດັບການສຶກສາຂັ້ນມັດທະຍົມ ຕອນປາຍທີ່ມີອາຍຸສະເລ່ຍລະຫວ່າງ 14-18 ປີ ເພື່ອຂັດເລືອກເອົານ້ອງນັກຮຽນຜູ້ເກັ່ງທີ່ ສຸດຈໍານວນສາມຄົນເປັນຕົວແທນຂອງຊາດເພື່ອຈະ ເຂົ້າຮ່ວມການແຂ່ງຂັນ ASEAN QUIZ ລະດັບພາກພື້ນຮ່ວມກັບບັນດານ້ອງນັກຮຽນຄົນເກັ່ງທີ່ເປັນຕົວແທນຂອງອີກ 9 ປະເທດ ສະມາຊິກອາຊຽນ,ແຕ່ສໍາລັບປີນີ້ ເນື່ອງຈາກສະພາບການແຜ່ລະບາດຂອງພະຍາດໂຄວິດ-19 ໃນໂລກ, ກໍຄືໃນພາກພື້ນເຮົາໃນປະຈຸບັນ, ການແຂ່ງຂັນແບບປົກກະຕິດັ່ງທີ່ເຄີຍເຮັດໃນທຸກຄັ້ງຜ່ານມາຈຶ່ງບໍ່ອາດສາມາດຈັດຂຶ້ນໄດ້, ຈຶ່ງມີຄວາມຈໍາເປັນຕ້ອງໄດ້ຫາທາງອອກ ໂດຍໄດ້ຕົກລົງທີ່ຈະຈັດຂຶ້ນ ໂດຍຜ່ານລະບົບ Video Conference ຊຶ່ງໄດ້ຮັບ ຄວາມເຫັນດີເປັນເອກະພາບຈາກບັນດາປະເທດສະມາຊິກອາຊຽນທັງຫມົດ.ໂດຍປະເທດສິງກະໂປເປັນ ເຈົ້າພາບ, ຄາດວ່າ ຈະຈັດຂຶ້ນໃນລະຫວ່າງວັນທີ 15 – 16 ທັນວານີ້ ແລະ ສໍາລັບລາວເຮົາ, ມາຮອດປະຈຸບັນ ທາງຄະນະຮັບຜິດຊອບກໍ່ໄດ້ປະຊຸມປຶກສາຫາລື ແລະ ເລີ່ມກະກຽມເງື່ອນໄຂຕ່າງໆເພື່ອເຂົ້າຮ່ວມ ການແຂ່ງຂັນໃນເທື່ອນີ້ໃຫ້ບັນລຸຜົນສຳເລັດເປັນຢ່າງດີ.
