ລັດຖະສະພາຍີ່ປຸ່ນອອກກົດໝາຍປະກັນສິດໃຫ້ຜູ້ອາໄສໃນປະເທດສັກວັກຊີນຕ້ານໂຄວິດ-19 ຟຣີ
ລັດຖະສະພາຍີ່ປຸ່ນອອກກົດໝາຍປະກັນສິດໃຫ້ຜູ້ທີ່ອາໄສຢູ່ພາຍໃນປະເທດສັກວັກຊີນຕ້ານໂຄວິດ-19 ຟຣີ ໂດຍລັດຖະບານຈະເປັນຜູ້ເບິ່ງແຍງຄ່າໃຊ້ຈ່າຍໃຫ້ທັງໝົດ ຫລັງນາຍົກລັດຖະມົນຕີ ຊູງະ ໂຢຊິຮິເດະ ປະກາດຈະປະກັນໂກຕ້າວັກຊີນສຳລັບພົນລະເມືອງຊາວຍີ່ປຸ່ນທັງໝົດປະມານ 126 ລ້ານຄົນ ພາຍໃນເຄິ່ງທຳອິດຂອງປີ 2021.
ໂດຍທາງລັດຖະບານຍີ່ປຸ່ນໄດ້ຕົກລົງກັບຜູ້ຜະລິດ ແລະ ທົດລອງວັກຊີນຕ້ານໂຄວິດ-19 ບໍລິສັດສຳຄັນຂອງໂລກຄື Pfizer, Moderna ລວມທັງ AstraZeneca ເລື່ອງສັ່ງຈອງວັກຊີນຕ້ານໂຄວິດ-19 ເພື່ອສຳລັບ 145 ລ້ານຄົນ ຫລື ປະມານ 290 ລ້ານໂດສ ເຊິ່ງຄາດວ່າອາດໃຊ້ງົບປະມານ 6,7 ແສນລ້ານເຢນ.
ທາງດ້ານຜູ້ຜະລິດວັກຊີນຕ້ານໂຄວິດ-19 ບໍລິສັດຕ່າງໆ ກໍທະຍອຍເດີນໜ້າຂໍອະນຸຍາດໃຫ້ມີການນຳໃຊ້ວັກຊີນເປັນການທົ່ວໄປຈາກສຳນັກງານຄະນະກຳມະການອາຫານ ແລະ ຢາ (FDA) ຫລື ໜ່ວຍງານຮັບຜິດຊອບແລ້ວ ໂດຍສະເພາະຢູ່ອາເມລິກາ, ສະຫະຣາຊະອານາຈັກ ລວມທັງສະຫະພາບເອີຣົບ ໂດຍສະຫະຣາຊະອານາຈັກຖືເປັນປະເທດທຳອິດໃນໂລກທີ່ອະນຸຍາດໃຫ້ມີການນຳໃຊ້ວັກຊີນຕ້ານໂຄວິດ-19 ໃນວົງກວ້າງເປັນຄັ້ງທຳອິດ (For Widespread Use) ໂດຍວັກຊີນຕ້ານໂຄວິດ-19 ຈາກ Pfizer-BioNTech ຈະເລີ່ມນຳໃຊ້ຢູ່ສະຫະຣາຊະອານາຈັກ ນັບແຕ່ອາທິດໜ້າເປັນຕົ້ນໄປ.
ແຕ່ເຖິງຢ່າງໃດກໍຕາມ, ຍັງບໍ່ມີຂໍ້ມູນທີ່ແນ່ນອນວ່າ: ກົດໝາຍດັ່ງກ່າວຈະຄວບຄຸມສິດຂອງຄົນຕ່າງປະເທດທີ່ອາໄສຢູ່ຍີ່ປຸ່ນນຳ ຫລື ບໍ່ ໂດຍທາງການຍີ່ປຸ່ນກຳລັງເດີນໜ້າຮວບຮວມຂໍ້ມູນທີ່ເປັນປະໂຫຍດໃນການວາງແຜນຮັບມືໂຄວິດ-19 ແລະ ເຖິງວ່າທາງການຈະແນະນຳໃຫ້ພົນລະເຮືອນທຸກຄົນຮັບການສັກວັກຊີນ, ແຕ່ຍັງໃຫ້ສິດປະຊາຊົນທຸກຄົນສາມາດປະຕິເສດບໍ່ຂໍຮັບການສັກວັກຊີນໄດ້ ຖ້າປະສິດທິພາບ ແລະ ຄວາມປອດໄພຂອງວັກຊີນຕ້ານໂຄວິດ-19 ບໍ່ໄດ້ຮັບການຢືນຢັນ ຫລື ອະນຸຍາດພາຍໃນໄລຍະເວລາທີ່ກຳນົດ. ອີກທັງລັດຖະບານຈະເປັນຜູ້ເບິ່ງແຍງຄ່າໃຊ້ຈ່າຍທັງໝົດ ທີ່ເກີດຂຶ້ນຈາກຜົນຂ້າງຄຽງຂອງການສັກວັກຊີນຕ້ານໂຄວິດ-19.
ຫລ້າສຸດ ຍີ່ປຸ່ນມີຜູ້ຕິດເຊື້ອໂຄວິດ-19 ສະສົມແລ້ວ 153.416 ຄົນ, ເສຍຊີວິດແລ້ວ 2.141 ຄົນ ຫລັງການແຜ່ລະບາດຜ່ານມາແລ້ວ 11 ເດືອນ ໂດຍໂຕກຽວຍັງເປັນພື້ນທີ່ທີ່ພົບຜູ້ຕິດເຊື້ອໃໝ່ຢ່າງຕໍ່ເນື່ອງ.
