ໃນປີ 2019 ທົ່ວໂລກ ມີຜູ້ຕິດເຊື້ອເອັສໄອວີ 38 ລ້ານຄົນ ເສຍຊີວິດແລ້ວ 6 ແສນກວ່າຄົນ

ສູນຕ້ານເອດ ແລະ ພະຍາດຕິດຕໍ່ທາງເພດສຳພັນ ກະຊວງສາທາລະນະສຸກ ໄດ້ລາຍງານໃຫ້ຮູ້ ໃນວັນທີ 1 ທັນວານີ້ ຊຶ່ງເປັນວັນສາກົນຕ້ານເອດວ່າ:  ໃນປີ 2019 ຜ່ານມາ ທົ່ວໂລກມີຄົນຕິດເຊື້ອເອັສໄອວີ (HIV) 38 ລ້ານຄົນ, ໃນນີ້ຜູ້ໃຫຍ່ 36,2 ລ້ານຄົນ ແລະ ເດັກນ້ອຍ 1,8 ລ້ານຄົນ, ໃນນັ້ນ ມີພຽງ 25,4 ລ້ານຄົນ ໄດ້ເຂົ້າເຖິງການປິ່ນປົວດ້ວຍຢາຕ້ານໄວຣັດດັ່ງກ່າວ ແລະ ໃນຂະນະທີ່ມີຜູ້ຕິດເຊື້ອເອັສໄອວີໃໝ່ສູງເຖິງ 1,7 ລ້ານຄົນ ແລະ ມີຜູ້ເສຍຊີວິດຍ້ອນພະຍາດນີ້ 690.000 ກວ່າຄົນ.

ສຳລັບປະເທດເຮົາແຕ່ປີ 1990-2020 ມີຈໍານວນສະສົມຜູ້ຕິດເຊື້ອ HIV ມີ 14.457 ຄົນ, ເປັນພະຍາດເອດ 6.014 ຄົນ ແລະ ເສຍຊີວິດ 4.801 ຄົນ, ປັດຈຸບັນປະຊາຊົນໃນທົ່ວໂລກໄດ້ສາມັກຄີກັນສະແດງການສະໜັບສະໜູນຕໍ່ຕ້ານພະຍາດດັ່ງກ່າວ ແລະ ເພື່ອລະນຶກເຖິງຜູ້ທີ່ສູນເສຍຊີວິດຍ້ອນພະຍາດນີ້. ໃນປີ 2020, ຄວາມສົນໃຈຂອງໂລກໄດ້ຖືກສຸມໃສ່ການປ້ອງກັນສຸຂະພາບ ແລະ ວິທີການຕອບໂຕ້ການລະບາດຂອງພະຍາດໄຂ້ເລືອດອອກ, ພະຍາດເອດ ແລະ ໂຄວິດ-19 ເຊິ່ງພະຍາດດັ່ງກ່າວໄດ້ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນເປັນຈຳນວນບໍ່ຫນ້ອຍ ແລະ ໂຄວິດ-19 ໄດ້ສະແດງໃຫ້ເຫັນວ່າ ສຸຂະພາບເຊື່ອມໂຍງກັບບັນຫາສຳຄັນອື່ນໆ ເຊັ່ນ: ການຫລຸດຜ່ອນຄວາມບໍ່ສະເໝີພາບ, ສິດທິມະນຸດ, ຄວາມສະເໝີພາບລະຫວ່າງຍິງ-ຊາຍ, ການປົກປ້ອງທາງສັງຄົມ ແລະ ການຂະຫຍາຍຕົວທາງເສດຖະກິດ. ດ້ວຍຈິດໃຈດັ່ງກ່າວ, ຫົວຂໍ້ຂອງວັນສາກົນຕ້ານເອດປີນີ້ ຈຶ່ງໄດ້ກຳນົດເອົາ “ຄວາມສາມັກຄີທົ່ວໂລກ, ມີຄວາມຮັບຜິດຊອບຮ່ວມກັນ”.

ສູນດັ່ງກ່າວ, ຍັງໃຫ້ຮູ້ຕື່ມວ່າ: 81% ຂອງຜູ້ທີ່ຕິດເຊື້ອ HIV ທຸກຄົນຮູ້ສະຖານະພາບການຕິດເຊື້ອ HIV ຂອງເຂົາເຈົ້າ ແລະ ມີປະມານ 7,1 ລ້ານຄົນ ບໍ່ຮູ້ວ່າຕົນເອງຕິດເຊື້ອເອັສໄອວີ. ປະຊາກອນທີ່ມີຄວາມສ່ຽງໃນການຕິດເຊື້ອ HIV (ກຸ່ມເປົ້າໝາຍຕົ້ນຕໍ່) ແມ່ນສູງກວ່າ 26 ເທົ່າໃນບັນດາຜູ້ຊາຍທີ່ເປັນກະເທີຍ ແລະ ຜູ້ຊາຍອື່ນໆ ທີ່ຮ່ວມເພດກັບຜູ້ຊາຍ, ສູງກວ່າ 30 ເທົ່າສຳລັບສາວບໍລິການ ແລະ ກວ່າ 13 ເທົ່າ ສຳລັບຄົນທີ່ແປງເພດ (ກະເທີຍຜົມຍາວ). ນອກຈາກນີ້, ວັນນະໂຣກຍັງເປັນສາເຫດຕົ້ນຕໍຂອງການເສຍຊີວິດໃນບັນດາຜູ້ທີ່ຕິດເຊື້ອ HIV ເຊິ່ງກວມເອົາປະມານໜຶ່ງສ່ວນສາມຂອງການເສຍຊີວິດຍ້ອນພະຍາດນີ້. ໃນປີ 2018, ປະຊາກອນປະມານ 10 ລ້ານຄົນໄດ້ຕິດເຊື້ອວັນນະໂຣກ ເຊິ່ງປະມານ 9% ແມ່ນຜູ້ທີ່ຕິດເຊື້ອ HIV ແລະ ຄາດຄະເນວ່າ 44% ຂອງປະຊາຊົນດໍາລົງຊີວິດທີ່ຕິດເຊື້ອເອັສໄອວີ ແລະ ພະຍາດວັນນະໂຣກບໍ່ຮູ້ຈັກວ່າຕົນເອງຕິດເຊື້ອຮ່ວມ (co-infection) ເພາະສະນັ້ນ ຈຶ່ງບໍ່ໄດ້ຮັບການດູແລຮັກສາ.