ອາເມລິກາຍົກເລີກຫ້າມໂນດບຸກ ຂຶ້ນເຮືອບິນຂອງສາຍການບິນອີຕິຮັດ
ອາເມລິກາສັ່ງຍົກເລີກຄຳສັ່ງຫ້າມເອົາເຄື່ອງຄອມພິວເຕີພົກພາໂນດບຸກຈາກອາບູດາບີໃນຖ້ຽວບິນເດີນທາງເຂົ້າມາປະເທດອາເມລິກາ ໂດຍອ້າງວ່າການກວດກາດ້ານຄວາມປອດໄພຢ່າງເຂັ້ມງວດຂອງສາຍການບິນອີຕິຮັດຂອງສະຫະນະຄອນ ເອເມຣັດ ອາຣັບນັ້ນພຽງພໍແລ້ວ.
ສຳນັກຂ່າວຕ່າງປະເທດລາຍງານຈາກສະຫະນະຄອນ ເອເມຣັດ ອາຣັບ ໃນວັນທີ 3 ກໍລະກົດນີ້ວ່າ: ທາງການອາເມລິກາໄດ້ສັ່ງຍົກເລີກຄຳສັ່ງຫ້າມເລື່ອງການເອົາເຄື່ອງຄອມພິວເຕີແບບພົກພາຂຶ້ນເຮືອບິນໂດຍສານຂອງສາຍການບິນອີຕິຮັດຂອງສະຫະນະຄອນ ເອເມຣັດ ອາຣັບ ເດີນທາງຈາກອາບູດາບີເຂົ້າມາປະເທດອາເມລິກາ ເພາະການກວດກາດ້ານການຮັກສາຄວາມປອດໄພຢ່າງເຂັ້ມງວດຂອງສາຍການບິນອີຕິຮັດນັ້ນພຽງພໍຕໍ່ຄວາມຕ້ອງການແລ້ວ.
ທັງນີ້, ສາຍການບິນອີຕິຮັດເປັນສາຍການບິນດຽວທີ່ມີເສັ້ນທາງບິນກົງຈາກອາບູດາບີໄປປະເທດອາເມລິກາ. ໃນເດືອນມີນາຜ່ານມາ, ທາງການອາເມລິກາສັ່ງຫ້າມເອົາເຄື່ອງຄອມພິວເຕີແບບພົກພາຂຶ້ນເຮືອບິນເດີນທາງເຂົ້າໄປປະເທດອາເມລິກາ ໂດຍຫ້າມສະເພາະສະໜາມບິນ 10 ແຫ່ງຈາກ 8 ປະເທດຄື: ເອຢິບ, ມາຣົກ, ຊອກດານີ, ສະຫະນະຄອນ ເອເມຣັດ ອາຣັບ, ອາຣັບບີ ຊາອຸດິດ, ກູເວດ, ກາຕາ ແລະ ຕວກກີ ທັງນີ້ເພາະຢ້ານວ່າອາດຖືກນຳວົງຈອນໄຟຟ້າໃນເຄື່ອງຄອມພິວເຕີໃຊ້ປະກອບລະເບີດ. ຈາກນັ້ນອັງກິດກໍອອກຄຳສັ່ງໃນລັກສະນະດຽວກັນ.
