ໂຮງແຮມຈໍາກັດບໍລິເວນຜູ້ເດີນທາງມາຈາກຕ່າງປະເທດ  ຍັງມີຫລາຍບັນຫາຈະຕ້ອງໄດ້ເອົາໃຈໃສ່ ແລະ ແກ້ໄຂຢ່າງເດັດຂາດ

ໃນວັນທີ 27 ພະຈິກນີ້, ຄະນະຮັບຜິດຊອບປະສານງານໂຮງແຮມໄດ້ຈັດກອງປະຊຸມ  ປຶກສາຫາລືແລກປ່ຽນຄວາມຄິດເຫັນເພື່ອວາງແຜນຮັບມື ໃນການຈໍາກັດບໍລິເວນຜູ້ເດີນທາງ ມາຈາກຕ່າງປະເທດ  ເພື່ອປ້ອງກັນ, ຄວບຄຸມ ແລະ ແກ້ໄຂພະຍາດ ໂຄວິດ-19 ບໍ່ໃຫ້ໄປຕິດໃສ່ຊຸມຊົນ, ໂດຍການເຂົ້າຮ່ວມຂອງ ທ່ານ ບຸນແຝງ ພູມມະໄລສິດ  ຮອງລັດຖະມົນຕີກະຊວງສາທາລະນະສຸກ,ຫົວໜ້າຄະນະຮັບຜິດຊອບວຽກສະຖານທີ່ຈໍາກັດບໍລິເວນ, ແຍກປ່ຽວ ແລະ ປິ່ນປົວ ໂຄວິດ-19, ທ່ານ ພົນຈັດຕະວາ ສີພອນ ຈັນສົມວົງ  ຄະນະປະຈໍາພັກຫົວໜ້າກອງບັນຊາການ ປກຊ , ຮອງຫົວໜ້າຄະນະ ສະເພາະກິດ ເພື່ອປ້ອງກັນ,ຄວບຄຸມ ແລະ ແກ້ໄຂພະຍາດໂຄວິດ 19  ນະຄອນຫລວງວຽງຈັນ ພ້ອມດ້ວຍຜູ້ຕາງໜ້າໂຮງແຮມຕ່າງໆເຂົ້າຮ່ວມ.

ທ່ານ ຮອງລັດຖະມົນຕີກະຊວງສາທາລະນະສຸກ ໄດ້ກ່າວວ່າ: ໃນສະພາບປັດຈຸບັນ, ເຫັນວ່າ ສປປ ລາວ ຍັງມີຄວາມສ່ຽງທີ່ຈະມີການແຜ່ລະບາດຂອງພະຍາດນີ້ ເນື່ອງຈາກວ່າຢູ່ບັນດາປະເທດໃນທົ່ວໂລກ ແລະ ປະເທດອ້ອມຂ້າງເຮົາ ຍັງມີການແຜ່ລະບາດຢ່າງຕໍ່ເນື່ອງ ແລະ ມີຈໍານວນຫລາຍໃນແຕ່ລະວັນ, ພ້ອມດຽວກັນນັ້ນລັດຖະບານກໍໄດ້ມີມາດຕະການຜ່ອນຜັນເປັນແຕ່ລະໄລຍະມີການອະນຸຍາດໃຫ້ບາງສາຍການບິນສາມາດເຂົ້າມາໄດ້, ການທ່ອງທ່ຽວເປັນກຸ່ມ ແລະ ອື່ນໆ ຈະເຮັດໃຫ້ຈໍານວນຄົນທີ່ເຂົ້າມາລາວ ເພີ່ມຂຶ້ນຫລາຍ ເຊິ່ງຕິດພັນກັບ ວຽກງານການເກັບຕົວຢ່າງຢູ່ສະໜາມບິນ, ການກັກບໍລິເວນ 14 ວັນໃຫ້ຄົບກໍານົດ ພວກເຮົາຈຶ່ງມີຄວາມຈໍາເປັນທີ່ຈະຕ້ອງໄດ້ເຂັ້ມງວດ ແລະ ມີມາດຕະການຢ່າງເຄັ່ງຄັດຂຶ້ນຕື່ມ. ເຊິ່ງ ສພກ ຂັ້ນສູນກາງ ກໍາລັງຈະນໍາໃຊ້ ໂມງ GPS ເພື່ອຕິດຕາມການເຄື່ອນໄຫວຂອງຜູ້ເຂົ້າມາ.

ຜ່ານການຈັດຕັ້ງປະຕິບັດວຽກງານການຄຸ້ມຄອງ ໂຮງແຮມ ຜ່ານມາ ເຫັນວ່າຍັງມີຫລາຍບັນຫາທີ່ຈະຕ້ອງໄດ້ເອົາໃຈໃສ່ ແລະ ແກ້ໄຂຢ່າງເດັດຂາດ ເປັນຕົ້ນແມ່ນບັນຫາຫ້ອງພັກໂຮງແຮມເຕັມ, ການເຄື່ອນຍ້າຍໂຮງແຮມໂດຍບໍ່ໄດ້ຮັບອະນຸຍາດ, ລັກອອກຈາກຫ້ອງພັກ, ມີຄົນນອກເຂົ້າມາພົວພັນ, ໂຮງແຮມບໍ່ໃຫ້ການຮ່ວມມືຕໍ່ເຈົ້າໜ້າທີ່ໃນການສະໜອງຂໍ້ມູນ ແລະ ເຂົ້າປະຈໍາການໃນ ໂຮງແຮມ ແລະ ບັນຫາອື່ນໆອີກ, ເຊິ່ງຍັງບໍ່ທັນມີວິທີການແກ້ໄຂທີ່ເດັດຂາດເທື່ອ ແຕ່ຜ່ານມາກໍ່ໄດ້ມີການເຮັດບົດບັນທຶກ, ຕັກເຕືອນ ແລະ ປັບໃໝໃສ່ໂທດ ເຫັນວ່າຫລຸດໜ້ອຍລົງແຕ່ກໍຍັງພົບເຫັນຢູ່. ແລະ ໃນກອງປະຊຸມຄັ້ງນີ້ ເປັນໂອກາດອັນດີທີ່ພວກເຮົາຈະໄດ້ຮັບຟັງລາຍງານ ຈາກເຈົ້າໜ້າທີ່ ແລະ ບັນດາຜູ້ປະກອບໂຮງແຮມ ເພື່ອພ້ອມກັນ ປຶກສາຫາລື ແລະ ຊອກຫາວິທີການແກ້ໄຂຕື່ມອີກ.