ສປ ຈີນ ມີນະໂຍບາຍໃຫ້ເກີດລູກເພີ່ມ

ຂະນະນີ້ຈີນມີພົນລະເມືອງຢູ່ທີ່ 1,4 ຕື້ຄົນ ແຕ່ກໍຍັງມີນະໂຍບາຍຊຸກຍູ້ໃຫ້ປະຊາຊົນສາມາດເກີດລູກເພີ່ມໄດ້ອີກ ທັງນີ້ກໍເພື່ອຮອງຮັບໃຫ້ແກ່ສັງຄົມອາຍຸສູງນັບມື້ຫຼາຍຂຶ້ນ.

ໜັງສືພິມ China Daily ໂດຍອ້າງອີງຄຳເຫັນຂອງບັນດາຜູ້ຊ່ຽວຊານໃນວັນທີ 23 ພະຈິກວ່າ ຈີນຈະມີນະໂຍບາຍທາງດ້ານການເງິນຕໍ່ປະຊາຊົນທີ່ຈະເກີດລູກເພີ່ມ.

ຈີນມີນະໂຍບາຍໃຫ້ເກີດລູກໄດ້ພຽງ 1 ຄົນໃນປີ 1978 ແລະ ເມື່ອມາເຖິງປີ 2016 ມີນະໂຍບາຍໃຫ້ຄູ່ຜົວ-ເມຍໜຶ່ງໆ ສາມາດເກີດລູກໄດ້ 2 ຄົນ ທັງນີ້ກໍເພື່ອເປັນການທົດແທນໃຫ້ແກ່ສັງຜູ້ອາຍຸສູງ ແລະ ການຂາດແຄນແຮງງານ.

ເຖິງຢ່າງໃດກໍຕາມ, ອັດຕາການເກີດໃນປີ 2019 ມີເດັກເກີດໃໝ່ພຽງ 10,48 ຄົນຕໍ່ປະຊາກອນ 1.000 ຄົນ ຊຶ່ງເປັນຕົວເລກທີ່ຫຼຸດລົງຫຼາຍເມື່ອທຽບໃສ່ ອັດຕາການເກີດເມື່ອປີ 2018 10,94 ຄົນຕໍ່ 1.000 ຄົນ.