ວັກຊີນໂຄວິດ-19 ຂອງອ໊ອກຟອດໄດ້ຜົນ 70%
ມະຫາວິທະຍາໄລອ໊ອກຟອດ ແລະ AstraZeneca ບໍລິສັດຢາ ແລະ ເຕັກໂນໂລຊີຊີວະພາບຊັ້ນນຳໃນສະຫະຣາຊະອານາຈັກ ເປີດເຜີຍຄວາມຄືບໜ້າໃນການພັດທະນາ ແລະ ທົດລອງວັກຊີນໂຄວິດ-19 ໃນຄົນ (ໄລຍະທີ 3) ໂດຍພົບວ່າ: ມີປະສິດທິພາບໃນການປ້ອງກັນໄວຣັສ 70%.
ການປະກາດຂໍ້ມູນດັ່ງກ່າວມີຂຶ້ນຫລັງຈາກ Pfizer ແລະ Moderna ສອງບໍລິສັດຢາຊັ້ນນຳໃນອາເມລິກາ ເປີດເຜີຍຜົນການທົດລອງວັກຊີນວ່າມີປະສິດທິພາບໃນການປ້ອງກັນໄວຣັສສູງເຖິງ 95%.
ເຖິງຢ່າງໃດກໍຕາມ, BBC ລາຍງານວ່າ: ວັກຊີນຂອງອ໊ອກຟອດມີລາຄາຖືກກວ່າ 2 ບໍລິສັດເບື້ອງຕົ້ນ. ອີກທັງສາມາດເກັບຮັກສາ ແລະ ຂົນສົ່ງກະຈາຍໄປປະເທດອື່ນໆທົ່ວໂລກໄດ້ງ່າຍກວ່າ. ດັ່ງນັ້ນ ຈຶ່ງອາດເປັນອີກທາງເລືອກທີ່ສຳຄັນໃນການຮັບມືກັບພະຍາດລະບາດ ຖ້າວັກຊີນຊະນິດນີ້ໄດ້ຮັບການອະນຸມັດຈາກໜ່ວຍງານທີ່ກ່ຽວຂ້ອງ.
ກ່ອນໜ້ານີ້ ລັດຖະບານສະຫະຣາຊະອານາຈັກໄດ້ສັ່ງຊື້ວັກຊີນຂອງອ໊ອກຟອດລ່ວງໜ້າຈຳນວນ 100 ລ້ານໂດສ ເຊິ່ງພຽງພໍຈະສັກໃຫ້ປະຊາຊົນ 50 ລ້ານຄົນ (ຄົນລະ 2 ໂດສ).
ການທົດລອງວັກຊີນຂອງອ໊ອກຟອດມີອາສາສະໝັກເຂົ້າຮ່ວມ 20.000 ກວ່າຄົນ ໂດຍເຄິ່ງໜຶ່ງທົດລອງຢູ່ສະຫະຣາຊະອານາຈັກ ແລະ ອີກເຄິ່ງໜຶ່ງຢູ່ບຣາຊິລ ເຊິ່ງຈາກກຸ່ມຜູ້ຕິດເຊື້ອທີ່ພົບໃນລະຫວ່າງການທົດລອງພົບວ່າ: ມີຢູ່ 30 ກໍລະນີຢູ່ໃນກຸ່ມຜູ້ທີ່ໄດ້ຮັບວັກຊີນ 2 ໂດສ ສ່ວນອີກ 101 ຄົນເປັນກຸ່ມທີ່ໄດ້ຮັບຢາຂີ້ຕົວະ ເຊິ່ງຖືວ່າມີປະສິດທິພາບ 70%.
ເຖິງຢ່າງໃດກໍຕາມ, ຂໍ້ມູນພົບວ່າວັກຊີນນີ້ອາດໃຫ້ປະສິດທິພາບແຕກຕ່າງກັນ ນັບແຕ່ລະດັບ 62-90% ຂຶ້ນຢູ່ກັບສູດການໃຫ້ວັກຊີນ ໂດຍຜົນການທົດລອງໂດຍໃຊ້ສູດໃຫ້ວັກຊີນໂດສທຳອິດໃນປະລິມານເຄິ່ງໜຶ່ງ ຈາກນັ້ນສັກໂດສທີ 2 ໃນລະດັບມາດຕະຖານ (ປະລິມານສູງ) ນັ້ນພົບວ່າມີປະສິດທິພາບໃນການປ້ອງກັນໄວຣັສ 90%, ສ່ວນອີກສູດທີສັກທັງ 2 ໂດສທີ່ລະດັບມາດຕະຖານພົບວ່າມີປະສິດທິພາບ 62%.
ອ໊ອກຟອດເຜີຍວ່າ: ຈາກການທົດລອງຍັງບໍ່ພົບຜົນຂ້າງຄຽງ ຫລື ອັນຕະລາຍຮ້າຍແຮງທີ່ເກີດກັບຜູ້ໄດ້ຮັບວັກຊີນ ແລະ ທີ່ສຳຄັນ ວັກຊີນນີ້ສາມາດເກັບຮັກສາໄດ້ໃນອຸນຫະພູມ 2-8 ອົງສາ. ດັ່ງນັ້ນ ຈຶ່ງບໍ່ຈຳເປັນຕ້ອງໃຊ້ຕູ້ແຊ່ຊະນິດພິເສດສຳລັບເກັບຮັກສາວັກຊີນໃນອຸນຫະພູມ -90 ເຖິງ -70 ອົງສາ ຄືກັບວັກຊີນຂອງ Pfizer ແລະ Moderna.
