ເປີດໄຟ ໄວ້ຊີວິດ
ໂດຍ: ມຶກບໍ່ແຫ້ງ
ອຸບັດເຫດເທິງທ້ອງຖະໜົນຂອງພວກເຮົາເກີດຂຶ້ນບໍ່ເວັ້ນແຕ່ລະມື້, ແນ່ນອນລະມັນມີຫຼາຍສາເຫດ ແຕ່ໜຶ່ງໃນນັ້ນເສັ້ນທາງໃນຕົວເມືອງທີ່ມີລົດຂ້ອນຂ້າງຫຼາຍຍາມຄໍ່າຄືນແຕ່ມືດມິດນັ້ນອາດມີຄວາມສ່ຽງບໍ່ໜ້ອຍຕໍ່ການເກີດອຸບັດເຫດ.
ຜູ້ຂຽນໄດ້ຍິນມາກັບຫູ ຈາກເພື່ອນຮ່ວມງານເວົ້າສູ່ຟັງວ່າລາວຂີ່ລົດໄປຕຳກົ້ນລົດເຂົາເຈົ້າທີ່ຈອດໄວ້ຂ້າງທາງຢ່າງຈັງ ຢູ່ເສັ້ນທາງທີ່ເອີ້ນໄດ້ວ່າຂອບເຂດໃນເມືອງແຫ່ງໜຶ່ງຂອງນະຄອນຫຼວງວຽງຈັນ ເຊິ່ງຜູ້ກ່ຽວກໍອະທິບາຍສູ່ຟັງດ້ວຍຄວາມຢາກຮ້າຍວ່າເຂດນັ້ນ ແມ່ນເສັ້ນທາງຂ້ອນຂ້າງໂຄ້ງມີໄຟເຍືອງທາງທີ່ເປັນເສົາສູງງາມ ແຕ່ດອກໄຟພັດບໍ່ໄດ້ໄຕ້ເລີຍເຮັດໃຫ້ຕົນບໍ່ສາມາດແນມເຫັນໄດ້ໄລຍະໄກພໍປານໃດ ເພາະລົດຈັກທີ່ຂີ່ກໍຂ້ອນຂ້າງເກົ່າໝັງ ແລະຕາກໍຮຸ່ງຊໍ່າໃດຊໍ່າໜຶ່ງເລີຍເຮັດໃຫ້ຫລົບຫຼີກບໍ່ທັນ, ກໍລະນີຂອງເພິ່ນຜູ້ນີ້ຍັງດີທີ່ວ່າບໍ່ໄດ້ເລັ່ງລົດໄວຈຶ່ງເຮັດໃຫ້ບາດເຈັບເລັກໜ້ອຍ ແລະ ເຈົ້າຂອງລົດທີ່ຈອດໄວ້ຖືກຄົນໃຈດີແນ່ທີ່ຟ້າວອອກມາເບິ່ງ ແລະ ໂຈມລາວຂຶ້ນເພື່ອກວດກາເບິ່ງວ່າຈຳເປັນຊິໄດ້ໂທໃສ່ໜ່ວຍກູ້ໄພທີ່ເຮັດວຽກແບບອາສາສະໝັກນັ້ນຟ້າວມາເອົາບໍ່ ແຕ່ ເປັນຈັ່ງໂຊກຜູ້ກ່ຽວມີແຕ່ຂາເລີ້ນ ແລະ ແຂນສອກແຕກເລັກນ້ອຍ.
ມາສັງເກດເບິ່ງກໍຫາກແມ່ນແທ້, ເສັ້ນທາງຊອຍ ແລະທາງໃຫຍ່ບາງສາຍໃນຂອບເຂດຕົວເມືອງພວກເຮົານັ້ນຫຼາຍກໍລະນີກໍຄືເຫັນແຕ່ເສົາຫຼັກໄຟທີ່ສ້າງຂຶ້ນ ເພື່ອແນໃສ່ໃຫ້ມີໄຟເຍືອງທາງທີ່ຮຸ່ງແຈ້ງ ເຊິ່ງມັນກໍແມ່ນມາດຖານໜຶ່ງທີ່ນອນໃນເວລາອອກແບບເສັ້ນທາງທີ່ເພິ່ນໄດ້ວາງໄວ້ຢ່າງຄັກແນ່ແຕ່ພັດບໍ່ຖືກໃຊ້ງານດັ່ງປະສົງ, ຫຼາຍຫຼັກກໍຢືນໂຊແຕ່ຫຸ່ນລ້າໆແຕ່ບໍ່ມີຮອດແສງໄຟເລີຍເຮັດໃຫ້ເສັ້ນທາງອັນແຈ້ງໃສທີ່ວາດຫວັງໄວ້ນັ້ນກັບຕ້ອງມືດມິດສະໜິດຕາເລີຍພາໃຫ້ຫຼາຍຄົນພາດຄືດັ່ງຜູ້ທີ່ກ່າວມາຂ້າງເທິງນັ້ນແລ.
ເມື່ອກັບມາເບິ່ງວ່າເປັນຫຍັງຄືມີແຕ່ເສົາໄຟ ແຕ່ບໍ່ເຫັນໄຕ້? ມັນອາດມີສາເຫດຫຼາຍອັນ ແຕ່ສິ່ງທີ່ຜູ້ຂຽນໄດ້ຮູ້ມາກໍຄືມີໂຈນມາລັກຕັດເອົາສາຍໄຟຂອງໄຟເຍືອງທາງທີ່ເພິ່ນເຮັດໄວ້ຢ່າງດີນັ້ນໄປຂາຍ! ຜູ້ໃດຮູ້ເລື່ອງນີ້ມາກໍຈົນອອກປາກວ່າ: ຈັ່ງແມ່ນພິລຶກເນາະ ອັນໂຈນນີ້ກະດາຍ, ລັກຝາອັດຮ່ອງນໍ້າແລ້ວຍັງບໍ່ພໍຍັງມາລັກຮອດສາຍໄຟອີກ! ເລີຍເຮັດໃຫ້ໄຟເຍືອງທາງນັ້ນພິການເອົາຊື່ໆ.
ແລ້ວເປັນຫຍັງພວກເຮົາຄວນເອົາໃຈໃສ່ເລື່ອງໄຟເຍືອງທາງຫຼາຍຂຶ້ນ? ແນ່ນອນລະ ເມື່ອນຶກເຫັນກໍລະນີຂອງເພື່ອນຮ່ວມງານຂອງຜູ້ຂຽນແລ້ວຖ້າຈິນຕະນາການວ່າຖ້າມີໄຟເຍືອງທາງລາວກໍບໍ່ຕຳກົ້ນລົດເຂົາເຈົ້າ ແຕ່ຖ້າລາວເລັ່ງລົດໄວກວ່ານັ້ນມັນອາດເອົາຊີວິດລາວໄປກໍໄດ້, ເພາະສະນັ້ນການມີໄຟເຍືອງທາງແມ່ນອົງປະກອບໜຶ່ງທີ່ສຳຄັນທີ່ຊ່ວຍໃຫ້ຜູ້ຂັບຂີ່ປອດໄພ, ພ້ອມກັນນັ້ນການມີໄຟເຍືອງເສັ້ນທາງທີ່ຮຸ່ງແຈ້ງໃນຍາມຄໍ່າຄືນມັນອາດບໍ່ສະເພາະແຕ່ປ້ອງກັນການຕຳກົ້ນລົດຜູ້ອື່ນ ຫຼື ສະເພາະຜູ້ຂັບຂີ່ແຕ່ອາດຍັງ ເຮັດໃຫ້ຜູ້ທີ່ຍ່າງຕາມເສັ້ນທາງຕອນອ່າວເດິກຮູ້ສຶກອຸ່ນໃຈຄືກັນ ໂດຍສະເພາະແມ່ຍິງເພາະເຮັດໃຫ້ຜູ້ປອງຮ້າຍຄິດເກງໃຈແສງສະຫວ່າງແນ່ຈັກໜ້ອຍ.
ເພາະສະນັ້ນ, ພວກເຮົາຄວນມີໄຟເຍືອງທາງໄດ້ແນວໃດ? ເລື່ອງໂຈນນັ້ນເຮົາບໍ່ສາມາດໄປຈັບກຸມໄດ້ທຸກເທື່ອ ແຕ່ເຮົາສາມາດກວດກາໄດ້ຢ່າງປົກກະຕິ ຫຼື ມີວິທີປ້ອງກັນແບບຄັກແນ່, ນອກເໜືອຈາກເລື່ອງໂຈນລັກສາຍໄຟແລ້ວຖ້າກ່າວເຖິງເງິນໃນຖົງເພື່ອໃຊ້ຈ່າຍໃນການໄຕ້ໄຟເຍືອງທາງນັ້ນ, ຜູ້ຂຽນເຊື່ອວ່າເຮົາມີຄວາມສາມາດເຮັດໄດ້ ໃຫ້ສົມຊື່ກັບຜູ້ຜະລິດໄຟຟ້າຂາຍ ແລະ ສິ່ງສຳຄັນ ແມ່ນຮັກສາຊີວິດຂອງພົນລະເມືອງໃຫ້ ຕະຫຼອດປອດໄພໃນຍາມຄໍ່າຄືນນັ້ນເປັນສິ່ງທີ່ຈຳເປັນຄູ່ຄວນແກ່ການລົງທຶນ ແລະ ເອົາໃຈໃສ່ຢ່າງຈິງຈັງ.
