ໂຄງການຢູເອສເອດ ໃຫ້ການຊ່ວຍເຫລືອລາວຫລາຍດ້ານ
ໂຄງການຢູເອສເອດ ແມ່ນໂຄງການໜຶ່ງທີ່ໄດ້ຮ່ວມກັບລັດຖະບານລາວ ແຕ່ປີ 2016 ເປັນຕົ້ນມາ, ໃນນັ້ນມີໂຄງການຊ່ວຍເຫລືອທາງດ້ານສາທາລະນະສຸກ, ສຶກສາທິການ ແລະ ກິລາ, ໂດຍມີເປົ້າໝາຍເພື່ອຊ່ວຍ ສປປ ລາວ ບັນລຸເປົ້າໝາຍສະຫະສະວັດເພື່ອການພັດທະນາ.
ຜູ້ຕາງໜ້າອົງການພັດທະນາສາກົນຂອງ ສ.ອາເມລິກາ (USAID) ໄດ້ຖະແຫລງຕໍ່ສື່ມວນຊົນລາວໃນວັນທີ 19 ພະຈິກນີ້ ທີ່ນະຄອນຫລວງວຽງຈັນ ວ່າ: ໂຄງການຢູເອສເອດ ແມ່ນໂຄງການໜຶ່ງທີ່ໄດ້ເຊັນສັນຍາຮ່ວມກັບລັດຖະບານ ແຫ່ງ ສປປ ລາວ ໃນປີ 2016, ເຊິ່ງແມ່ນອາດີດປະທານາທິບໍດີບາຣັກໂອບາມາ ເຊັນກັບ ພະນະທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ, ໃນນັ້ນມີໂຄງການຊ່ວຍເຫລືອທາງດ້ານສາທາລະນະສຸກ, ສຶກສາທິການ ແລະ ກິລາ, ການສ້າງປະເທດໃຫ້ຈະເລີນກ້າວໜ້າ ໂດຍມີເປົ້າໝາຍເພື່ອຊ່ວຍ ສປປ ລາວ ບັນລຸເປົ້າໝາຍສະຫະສະວັດເພື່ອການພັດທະນາ (ສຳລັບປະເທດກຳລັງພັດທະນາ).
ໂຄງການດັ່ງກ່າວ, ໄດ້ເນັ້ນເຖິງການຊ່ວຍເຫລືອດ້ານໂພຊະນາການແກ່ເດັກ ໃນເຂດຫ່າງໄກສອກຫລີກ, ຄົນພິການ, ການຂະຫຍາຍຕົວທາງເສດຖະກິດຂອງປະເທດ, ການສຶກສາ, ສາທາລະນະສຸກໂດຍສະເພາະໂຄງການແມ່-ເດັກ ລວມເຖິງການປິ່ນປົວພະຍາດໄຂ້ເລືອດອອກ ແລະ ໂລກເອດ, ສຳລັບ ສປປ ລາວ ພວກເຮົາຈະໄດ້ສຸມໃສ່ຊ່ວຍເຫລືອ ຜູ້ປະກອບການດ້ານທຸລະກິດຂະໜາດນ້ອຍ ແລະ ກາງ, ຊາວນາ, ຊາວກະສິກອນ ໃຫ້ເຂົ້າເຖິງຕະຫລາດຈຳໜ່າຍສິນຄ້າໄດ້ງ່າຍຂຶ້ນ.
ນອກຈາກນີ້, ໂຄງການດ້ານໂພຊະນາການຜ່ານມາ ແມ່ນໄດ້ດຳເນີນຢູ່ທາງພາກໃຕ້ຂອງ ລາວ ໂດຍສະເພາະແມ່ນແຂວງສະຫວັນນະເຂດ, ພ້ອມດຽວກັນ USAID ກໍ່ໄດ້ເຊັນສັນຍາກັບອົງການຢູນິເຊບ ເພື່ອຊ່ວຍເຫລືອດ້ານໂພຊະນາການໃຫ້ແກ່ເດັກນ້ອຍຢູ່ພາກໃຕ້ ແລະ ພາກເໜືອຂອງລາວຕື່ມອີກ,ພາຍຫລັງສິ້ນສຸດການແຜ່ລະບາດຂອງພະຍາດໂຄວິດ-19 ທາງໂຄງການ US AID ກໍ່ຈະໄດ້ໃຫ້ການຊ່ວຍເຫລືອ ສປປ ລາວ ໃນການຟື້ນຟູເສດຖະກິດຂອງປະເທດ ຕື່ມອີກ.
