ຫຼວງນໍ້າທາມອບ-ຮັບໜ້າທີ່ຫົວໜ້າຂອງ 3 ພະແນກການ
ວັນທີ 18 ພະຈິກນີ້, ຢູ່ທີ່ສະໂມສອນແຂວງຫຼວງນໍ້າທາ, ໄດ້ຈັດພິທີ ມອບ – ຮັບໜ້າທີ່ຫົວໜ້າຂອງ 3 ພະແນກການຄື : ພະແນກການເງີນ,ພະແນກສາທາລະນະສຸກ ແລະ ຫົວໜ້າພະແນກ ຖະແຫຼງຂ່າວ,ວັດທະນະທຳ ແລະ ທ່ອງທ່ຽວແຂວງ ລະຫວ່າງ ຜູ້ເກົ່າ ແລະ ຜູ້ໃໝ່, ໂດຍການ ເຂົ້າຮວ່ມຂອງທ່ານ ຄໍາໄຫຼ ສີປະເສີດ ຮັກສາການເຈົ້າແຂວງໆຫຼວງນໍ້າທາ, ມີ ຫົວໜ້າພະແນກ – ຮອງຫົວໜ້າພະແນກ ແບະ ການນໍາເມືອງ ເຂົ້າຮ່ວມນຳດ້ວຍ.
ໃນພິທີຫົວໜ້າຄະນະຈັດຕັ້ງແຂວງ, ໄດ້ຜ່ານຂໍ້ຕົກລົງຂອງກະຊວງທີ່ກ່ຽວຂ້ອງ ແລະ ຂອງທ່ານເຈົ້າແຂວງ ວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ ແລະ ແຕ່ງຕັ້ງວ່າການ ຫົວໜ້າ 3 ພະແນກດັ່ງກ່າວຄື: ໄດ້ຍົກຍ້າຍທ່ານ ອ່ອນຈັນ ຄຳພາວົງ ກຳມະການປະຈຳພັກແຂວງ ຫົວໜ້າພະແນກ ການເງີນແຂວງຜູ້ເກົ່າ ໄປປະຈຳການຢູ່ຫ້ອງວ່າການແຂວງ, ແຕ່ງຕັ້ງທ່ານ ຄຳພັນ ໄຊສີ ຫົວໜ້າສວຍສາອາກອນ ເປັນວ່າການຫົວໜ້າພະແນກການເງີນແຂວງຜູ້ໃຫມ່, ຍົກຍ້າຍທ່ານ ດອກເຕີ ຄຳຈັນ ອີນທອງໄຊ ກຳມະການປະຈຳພັກແຂວງຫົວໜ້າພະແນກສາທາລະນະສຸກແຂວງຜູ້ເກົ່າໄປເປັນ ປະທານ ອົງການແນວລາວສ້າງຊາດແຂວງ, ແຕ່ງຕັ້ງ ທ່ານ ແກ້ວ ອີນທະວົງ ຄະນະພັກຮາກຖານ ຮອງຫົວໜ້າພະແນກສາທາລະນະສຸກແຂວງ,ຂື້ນເປັນວ່າການ ຫົວໜ້າພະແນກສາທາລະນາສຸກແຂວງຜູ້ໃຫມ່ ແລະ ຍົກຍ້າຍທ່ານ ສີວິໄລ ປັນແກ້ວ ກໍາມະການພັກແຂວງ ຫົວໜ້າພະແນກ ຖວທ ແຂວງຜູ້ເກົ່າ ໄປເປັນ ປະທານກວດກາພັກ ອົງການກວດກາລັດແຂວງ, ແຕ່ງຕັ້ງທ່ານໂຫຼຍ ໄຊເມືອງນາມ ຮອງເລຂາຄະນະພັກຮາກຖານ ຮອງຫົວໜ້າພະແນກ ຖວທ ແຂວງ ເປັນວ່າການ ຫົວໜ້າພະແນກ ຖວທ ແຂວງຜູ້ໃຫມ່.
ໃນພິທີທ່ານ ຄໍາໄຫຼ ສີປະເສີດ ຮັກສາການເຈົ້າແຂວງໆຫຼວງນໍ້າທາ ໄດ້ໂອ້ລົມ ແນະນຳໃຫ້ຜູ້ທີ່ຖືກແຕ່ງຕັ້ງໃໝ່ຈົ່ງພ້ອມກັນເອົາໃຈໃສ່ຈັດຕັ້ງປະຕິບັດຫນ້າທີ່ ແລະ ພາລະບົດບາດຂອງຕົນ,ເອົາໃຈໃສ່ສືບຕໍ່ສຶກສາອົບຮົມການເມືອງແນວຄິດເຮັດໃຫ້ພະນັກງານຂອງຕົນມີຄວາມສາມັກຄີແຫນ້ນແຟ້ນເຮັດສຳເລັດວຽກງານວິຊາສະເພາະຂອງຕົນ,ມີຈັນຍາບັນ,ຕັ້ງໜ້າຝຶກຜົນຫຼໍ່ຫຼອມຕົນເອງທາງດ້ານຄຸນສົມບັດສີນທຳປະຕິວັດ,ເອົາໃຈໃສ່ປະຕິບັດໜ້າທີ່ການເມືອງໃຫ້ມີຜົນສຳເລັດ ພັດທະນາວຽກງານກ້າວສູ່ລະບຽບກົດໝາຍ ແລະ ໃຫ້ມີປະສິດທິຜົນສູງຂຶ້ນ.
