ຝຣັ່ງເປັນປະເທດທຳອິດໃນເອີຣົບ ຕິດໂຄວິດ-19 ເຖິງ 2 ລ້ານຄົນ
ຫລັງຈາກສະຖານະການການແຜ່ລະບາດຂອງໂຄວິດ-19 ຮອບໃໝ່ທີ່ຮຸນແຮງຂຶ້ນ ເຮັດໃຫ້ຫລາຍປະເທດຢູ່ເອີຣົບຈະຕ້ອງກຽມຮັບມືວິກິດຄັ້ງນີ້ອີກ. ຝຣັ່ງກາຍເປັນປະເທດທຳອິດໃນເອີຣົບທີ່ມີຜູ້ຕິດເຊື້ອສະສົມເຖິງ 2 ລ້ານຄົນແລ້ວ ຫລັງການແຜ່ລະບາດກຳລັງກ້າວເຂົ້າສູ່ເດືອນທີ 11 ພົບຜູ້ຕິດເຊື້ອກຳລັງເຂົ້າຮັບການປິ່ນປົວຫລາຍທີ່ສຸດໃນແຄວ້ນອິລ ເດິ ຟຣ໊ອງ ອັນເປັນທີ່ຕັ້ງຂອງນະຄອນຫລວງປາຣີ (ປະມານ 6,2 ໝື່ນຄົນ), ຖັດມາແມ່ນແຄວ້ນໂອແວນ-ໂຣນາລ (ປະມານ 3 ໝື່ນຄົນ) ແລະ ແຄວ້ນກຣ໊ອງແຕ໊ສ (ປະມານ 2,3 ໝື່ນຄົນ) ເສຍຊີວິດແລ້ວປະມານ 4,5 ໝື່ນຄົນທົ່ວປະເທດ.
ຫລ້າສຸດທົ່ວໂລກມີຜູ້ຕິດເຊື້ອສະສົມແລ້ວ 55,5 ລ້ານກວ່າຄົນ (55.547.836 ຄົນ), ປິ່ນປົວຫາຍແລ້ວ 38,4 ລ້ານກວ່າຄົນ (38.949.388 ຄົນ) ຫລື ປະມານ 70% ຂອງຜູ້ຕິດເຊື້ອທັງໝົດ, ເສຍຊີວິດແລ້ວ 1.336.670 ຄົນ ອັດຕາການເສຍຊີວິດຢູ່ປະມານ 2,4%.
ນອກຈາກຝຣັ່ງແລ້ວ ຫລາຍປະເທດໃນເອີຣົບກຳລັງປະສົບວິກິດໂຄວິດ-19 ທີ່ຮຸນແຮງຂຶ້ນອີກ ບໍ່ວ່າຈະເປັນອິຕາລີ ທີ່ພົບຜູ້ຕິດເຊື້ອໃໝ່ເພີ່ມຂຶ້ນ 3,2 ໝື່ນກວ່າຄົນໃນມື້ດຽວ, ເຢຍລະມັນ ແລະ ໂປແລນ ພົບຜູ້ຕິດເຊື້ອເພີ່ມ 1,9 ໝື່ນຄົນພາຍໃນ 24 ຊົ່ວໂມງ.
