ສະເຫລີມສະຫລອງວັນສັບປະດາສາກົນແຫ່ງການ ປູກຈິດສຳນຶກການນໍາໃຊ້ຢາຕ້ານເຊື້ອຈຸລະຊີບ

ໃນວັນທີ 17 ພະຈິກນີ້, ກະຊວງສາທາລະນະສຸກ ຮ່ວມກັບ ກະຊວງກະສິກຳ ແລະ ປ່າໄມ້, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ອົງການອາຫານ ແລະ ການກະເສດ ແຫ່ງ ສະຫະປະຊາຊາດ, ອົງການອະນາໄມໂລກ ແລະ ຄູ່ຮ່ວມພັດທະນາອື່ນໆ ໄດ້ຈັດພິທີສະເຫລີມສະຫລອງວັນສັບປະດາສາກົນແຫ່ງການປູກຈິດສຳນຶກໃນການນໍາໃຊ້ຢາຕ້ານເຊື້ອຈຸລະຊີບ ປະຈຳປີ 2020 ຂຶ້ນ ທີ່​ນະຄອນຫລວງ​ວຽງ​ຈັນ ເພື່ອປູກ​ຈິດ​ສຳນຶກກ່ຽວກັບການນໍາໃຊ້ຢາຕ້ານເຊື້ອຢ່າງຮອບຄອບ.

​     ໃນ​ພິທີ, ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ​ໄດ້​ມີ​ຄຳ​ເຫັນວ່າ : ຢາຕ້ານເຊື້ອຈຸລະຊີບ ເຊັ່ນຢາຕ້ານເຊື້ອຈຸລິນຊີ ແມ່ນມີຄວາມສຳຄັນໃນການຕໍ່ສູ້ກັບພະຍາດຮ້າຍແຮງຕ່າງໆ ໃນຄົນ, ສັດ ແລະ ພືດ. ​ແຕ່​ຄຽງ​ຄູ່​ກັນນັ້ນ, ການນໍາໃຊ້ຢາເຫລົ່ານີ້ໃນເວລາທີ່ບໍ່ຈຳເປັນ, ໃຊ້ຜິດຢາ ຫລື ໃຊ້ຢາຄຸນນະພາບຕໍ່າ, ໃຊ້ບໍ່ຄົບຕາມກຳນົດທີ່ແພດສັ່ງ ຈະນຳໄປສູ່ການຕ້ານຕໍ່ຢາຕ້ານເຊື້ອຈຸລະຊີບ. ສິ່ງນີ້ເກີດຂຶ້ນເມື່ອເຊື້ອແບັກທີເຣຍ, ເຊື້ອໄວຣັສ, ເຊື້ອເຫັດ ແລະ ແມ່ກາຝາກ ສາມາດພັດທະນາຕົນເອງຕາມການເວລາ ແລະ ບໍ່ຕອບສະໜອງຕໍ່ຢາທີ່ຈະໄປຂ້າ ຫລື ຢຸດການຈະເລີນເຕີບໂຕຂອງມັນ​ໄດ້ ນຳໄປສູ່ການປິ່ນປົວບໍ່ໄດ້ຜົນ, ມີຄ່າປິ່ນປົວສູງ ແລະ ໃຊ້ເວລາດົນນານກວ່າທີ່ຄົນເຈັບຈະຫາຍດີຈາກການເຈັບເປັນ ແລະ ບາງຄົນກໍເສຍຊີວິດຍ້ອນການຕິດເຊື້ອທີ່ສາມາດປິ່ນປົວໄດ້. ນອກຈາກນີ້, ມີຄວາມສຳຄັນຫລາຍທີ່ຈະຕ້ອງຍົກລະດັບຄວາມຮັບຮູ້ ກ່ຽວກັບການຕ້ານຕໍ່ຢາຕ້ານເຊື້ອຈຸລະຊີບ ແລະ ຊຸກຍູ້ໃຫ້ທຸກຄົນນໍາໃຊ້ຢາຕ້ານເຊື້ອຢ່າງຮອບຄອບ ບໍ່ວ່າຈະເປັນປະຊາຊົນທົ່ວໄປ, ພະນັກງານສາທາລະນະສຸກ ຫລື ຜູ້ວາງນະໂຍບາຍ. ທັງນີ້ຈະຊ່ວຍຫລີກລ່ຽງການເກີດການຕ້ານຕໍ່ຢາຕ້ານເຊື້ອຈຸລະຊີບ ແລະ ການແຜ່ກະຈາຍຂອງການຕິດເຊື້ອທີ່ຕ້ານຕໍ່ຢາທີ່ເປັນອັນຕະລາຍ.

ໃນປີ 2015, ລັດຖະບານ​ເຮົາ​ໄດ້ຮ່ວມກັບບັນດາປະເທດຕ່າງໆໃນທົ່ວໂລກ ໄດ້ຮັບຮອງເອົາ ແຜນປະຕິບັດງານສາກົນ ກ່ຽວກັບການຄວບຄຸມເຊື້ອຈຸລະຊີບທີ່ຕ້ານຕໍ່ຢາຕ້ານເຊື້ອ ແລະ ໄດ້ໃຫ້ຄຳໝັ້ນສັນຍາວ່າຈະຕໍ່ສູ້ກັບບັນຫາເຊື້ອຈຸລະຊີບທີ່ຕ້ານຕໍ່ຢາຕ້ານເຊື້ອພາຍໃນປະເທດ ແລະ ຈະປະກອບສ່ວນເຂົ້າໃນການຄວບຄຸມເຊື້ອຈຸລະຊີບທີ່ຕ້ານຕໍ່ຢາຕ້ານເຊື້ອໃນຂົງເຂດພາກພື້ນ ແລະ ທົ່ວໂລກ. ບັນຫາໜຶ່ງທີ່ຍັງພົບເຫັນຢ່າງກວ້າງຂວາງແມ່ນຄົນຈຳນວນໜຶ່ງປິ່ນປົວຕົນເອງດ້ວຍຢາຕ້ານເຊື້ອ ໂດຍບໍ່ໄດ້ຮັບຄຳແນະນຳຈາກແພດ. ການຊື້-ຂາຍຢາຕ້ານເຊື້ອໂດຍບໍ່ມີໃບສັ່ງຈາກແພດເປັນສິ່ງທີ່ຜິດກົດໝາຍ. ການກະທຳດັ່ງກ່າວກໍ່ໃຫ້ເກີດການສູນເສຍເງິນຄຳ ແລະ ຊ່ວຍເພີ່ມທະວີການຕ້ານຕໍ່ຢາຕ້ານເຊື້ອ ແລະ ອາດຈະເປັນອັນຕະລາຍໄດ້.

ຜູ້ຕາງໜ້າອົງການອະນາໄມໂລກ ປະຈຳ ສປປ ລາວ ກ່າວວ່າ: ຢາຕ້ານເຊື້ອມີຄຸນຄ່າມະຫາສານ. ໃນແຕ່ລະມື້, ຢາຕ້ານເຊື້ອໄດ້ຊ່ວຍຮັກສາຊີວິດຄົນໃນທົ່ວໂລກ. ​ແຕ່ມັນຂຶ້ນກັບພວກເຮົາທຸກຄົນທີ່ຈະຕ້ອງເຮັດໃຫ້ໝັ້ນໃຈວ່າ ຢາຕ້ານເຊື້ອເຫລົ່ານັ້ນສືບຕໍ່ປິ່ນປົວໄດ້ຜົນ ແລະ ຊ່ວຍຮັກສາຊິວິດຄົນ ບໍ່ພຽງແຕ່ໃນປັດຈຸບັນ ແຕ່ຍັງລວມເຖິງອະນາຄົດ.

ວັນສັບປະດາດັ່ງກ່າວ ຍັງຈະມີການເຜີຍແຜ່ຂໍ້ມູນຜ່ານສື່ສັງຄົມອອນລາຍ ເປັນຕົ້ນແມ່ນເຟສບຸກຂອງສູນສື່ສານເພື່ອສຸຂະພາບ ແລະ ສຸຂະສຶກສາ ກະຊວງສາທາລະນະສຸກ. ໃນແຕ່ລະມື້, ຂໍ້ ຄວາມສໍາຄັນທີ່ແຕກຕ່າງກັນກ່ຽວກັບການຕ້ານຕໍ່ຢາຕ້ານເຊື້ອຈຸລະຊີບຈະຖືກໂພສລົງເຟສບຸກດັ່ງກ່າວ ເພື່ອໃຫ້ຜູ້ຕິດຕາມໄດ້ຮັບຂໍ້ຄວາມສຳຄັນດັ່ງກ່າວຜ່ານສື່ອອນລາຍອີກ​ດ້ວຍ.