ເຊກອງສໍາຫຼວດຄວາມເປັນໄປໄດ້ໃນການພັດທະນາເຂດພູຈວມ ແລະ ຕາດໄຟໄໝ້ເປັນແຫຼ່ງທ່ອງທ່ຽວ
ພິທີເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາ-ສໍາຫຼວດຄວາມເປັນໄປໄດ້ເພື່ອພັດທະນາເຂດພູຈວມ ແລະ ນໍ້າຕົກຕາດໄຟໄໝ້ ເປັນແຫຼ່ງທ່ອງທ່ຽວທໍາມະຊາດ, ປະຫວັດສາດ, ຊົນເຜົ່າ ຂອງເມືອງທ່າແຕງ ແຂວງເຊກອງ ໄດ້ມີຂຶ້ນໃນວັນທີ 16 ພະຈິກນີ້ ທີ່ຫ້ອງວ່າການປົກຄອງແຂວງ ລະຫວ່າງ ພະແນກແຜນການ ແລະ ການລົງທຶນແຂວງ ແລະ ບໍລິສັດ ເທບວົງສາ ພາວເວີ ຈໍາກັດ ໂດຍການເຂົ້າຮ່ວມເປັນສັກຂີພິຍານຂອງທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ.
ໃນບົດບັນທຶກຄວາມເຂົ້າໃຈດັ່ງກ່າວ ສອງຝ່າຍເຫັນດີເປັນເອກະພາບນໍາກັນວ່າ: ເພື່ອສຶກສາ-ສໍາຫຼວດຄວາມເປັນໄປໄດ້ໃນການພັດທະນາເຂດພູຈວມ ແລະ ນໍ້າຕົກຕາດໄຟໄໝ້ ເປັນແຫຼ່ງທ່ອງທ່ຽວທໍາມະຊາດໃນໄລຍະເວລາສຳຫລວດແມ່ນ 12 ເດືອນ ເຊິ່ງມີໜ້າວຽກທີ່ຈະຕ້ອງໄດ້ປະຕິບັດຄື: ສຶກສາສໍາຫຼວດ, ສ້າງບົດວິພາກເສດຖະກິດ-ເຕັກນິກ, ບົດປະເມີນຜົນກະທົບຕໍ່ສິ່ງແວດລ້ອມ, ບົດປະເມີນຜົນກະທົບຕໍ່ສັງຄົມ, ແຜນການຄຸ້ມຄອງ ແລະ ຕິດຕາມກວດກາດ້ານສິ່ງແວດລ້ອມ, ແຜນການຄຸ້ມຄອງ ແລະ ຕິດຕາມກວດກາດ້ານສັງຄົມ.
ໂອກາດນີ້, ທ່ານເຈົ້າແຂວງໄດ້ເນັ້ນໃຫ້ບໍລິສັດເອົາໃຈໃສ່ສໍາຫຼວດເກັບຂໍ້ມູນລະອຽດ ໂດຍສົມທົບກັບບັນດາຂະແໜງການທີ່ກ່ຽວຂ້ອງ, ອົງການປົກຄອງບ້ານ ເພື່ອສຶກສາຮີດຄອງປະເພນີຂອງບ້ານ, ກໍານົດໜ້າວຽກ ແລະ ບັນດາກິດຈະກໍາໃຫ້ລະອຽດ ເພື່ອພ້ອມກັນປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງ, ສ້າງວຽກເຮັດງານທໍາໃຫ້ແກ່ປະຊາຊົນເຂດດັ່ງກ່າວ, ພ້ອມທັງຮຽກຮ້ອງອົງການປົກຄອງທ້ອງຖິ່ນໃຫ້ການຮ່ວມມືໃນການສໍາຫຼວດ ແລະ ຮຽກຮ້ອງໃຫ້ຄະນະກໍາການຄຸ້ມຄອງການລົງທຶນຂັ້ນແຂວງໃຫ້ຕິດຕາມ, ກວດກາ, ຊຸກຍູ້, ຄຸ້ມຄອງໃຫ້ຖືກຕ້ອງຕາມລະບຽບ, ຮ່ວມກັນພັດທະນາແຂວງເຊກອງໃຫ້ມີຄວາມຮຸ່ງເຮືອງສີວິໄລຂຶ້ນເປັນກ້າວໆ.
