ຕໍາຫຼວດດູໄບກຽມໃຊ້ລົດຕໍາຫຼວດຫຸ່ນຍົນບໍ່ມີຄົນຂັບທ້າຍປີນີ້
Gulf News ລາຍງານວ່າ: ຕໍາຫຼວດປະເທດດູໄບກຽມຈະນໍາໃຊ້ລົດຫຸ່ນຍົນບໍ່ມີຄົນຂັບມາເຮັດໜ້າທີ່ເປັນໜ່ວຍເຝົ້າລະວັງເຄື່ອນທີ່ຂອງຕໍາຫຼວດ ເຊິ່ງມີຂະໜາດນ້ອຍກວ່າລົດຍົນປົກກະຕິຫຼາຍ ໂດຍມີກ້ອງ 360 ອົງສາ ສໍາລັບກວດຫາຄົນຮ້າຍດ້ວຍເຕັກໂນໂລຊີກວດຈັບໃບໜ້າ ແລະ ມີກ້ອງຖ່າຍມຸມສູງສໍາລັບກວດຫາຄົນຮ້າຍທີ່ແລ່ນອອກນອກເສັ້ນທາງ.
ຫຸ່ນຍົນບໍ່ມີຄົນຂັບນີ້ມີຊື່ວ່າ O-R3 ເຊິ່ງເປັນຜົນງານການຜະລິດຂອງບໍລິສັດ OTSAW Diginal ຈາກປະເທດສິງກະໂປ.
ບໍລິສັດ OTSAW ກ່າວວ່າ: ດູໄບເປັນປະເທດທໍາອິດໃນໂລກທີ່ຈະນໍາ O-R3 ມາໃຊ້ໃນການກວດກາຕາມຖະໜົນເປັນປະຈໍາທຸກມື້ ໂດຍຈະເລີ່ມໃຊ້ໃນພື້ນທີ່ແຫຼ່ງທ່ອງທ່ຽວກ່ອນ, ແຕ່ເຖິງຢ່າງໃດ O-R3 ກໍຍັງບໍ່ສາມາດທົດແທນເຈົ້າໜ້າທີ່ຕໍາຫຼວດທີ່ເປັນມະນຸດໄດ້ຢ່າງສົມບູນແບບ.
ປະເທດດູໄບຕັ້ງເປົ້າໃນການເພີ່ມຈໍານວນຕໍາຫຼວດຫຸ່ນຍົນໃຫ້ຫຼາຍຂຶ້ນເປັນ 25% ຂອງກອງກໍາລັງທັງໝົດພາຍໃນປີ 2030.
