ຫວຽດນາມພົບເຫັນກໍລະນີເປັນໂຄວິດຫາຍດີແລ້ວ ເປັນຄືນໃໝ່

ສຳນັກຂ່າວຕ່າງປະເທດ ລາຍງານຈາກ ຮ່າໂນ້ຍ ນະຄອນຫຼວງຫວຽດນາມ ເມື່ອວັນທີ 16 ພະຈິກວ່າ ມີຊາຍໜຸ່ມຄົນໜຶ່ງ ອາຍຸ 21 ປີ ຕິດເຊື້ອໂຄວິດ-19 ໃນເດືອນສິງຫາທີ່ຜ່ານມາ ມາຈາກລັດເຊຍ. ພາຍຫຼັງປົວຫາຍດີເປັນເວລາ 2 ເດືອນ ກັບຄືນມາເປັນໃໝ່.

ສູນຄວບຄຸມພະຍາດ(CDC) ຮ່າໂນ້ຍ ລາຍງານເມື່ອວັນທີ 15 ພະຈິກນີ້ວ່າ ຊາຍຄົນດັ່ງກ່າວເປັນຜູ້ຕິດເຊື້ອກໍລະນີທີ 1032 ຊຶ່ງໄດ້ຮັບການປິ່ນປົວຢູ່ໂຮງໝໍເຂດຮ້ອນສູນກາງສາຂາ 2. 25 ຄົນທີ່ໃກ້ສິດສຳຜັດກັບເຂົາ ກໍລ້ວນແຕ່ຖືກກັກຕົວທັງໝົດ. ມາເຖິງເວລານີ້ ທິມແພດໝໍຍັງບໍ່ທັນສະຫຼຸບໄດ້ວ່າແມ່ນ ເປັນຄືນ ຫຼື ຕິດໃໝ່ .

ເປັນຄືນ : ໝາຍຄວາມວ່າ ພາຍຫຼັງປິ່ນປົວດີແລ້ວ, ຊາກເສດເຫຼືອຂອງເຊື້ອໄວຣັດຍັງຕົກຄ້າງຢູ່ໃນຮ່າງກາຍຂອງຄົນເຮົາ ຈຶ່ງເຮັດໃຫ້ຜົນກວດເປັນບວກ. ມາເຖິງຂະນະນີ້ ຫວຽດນາມໄດ້ພົບເຫັນກໍລະນີແບບນີ້ຫຼາຍສິບຄົນແລ້ວ ແລະ ບໍ່ທັນເຫັນວ່າມັນແຜ່ເຊື້ອໃສ່ຄົນອື່ນໄດ້.

ຕິດໃໝ່ : ໝາຍຄວາມວ່າ ພາຍຫຼັງປິ່ນປົວດີແລ້ວ, ກັບມາຕິດ ຢີນ(gene) ເຊື້ອໂຄວິດໃໝ່ອີກ. ຄົນຜູ້ໜຶ່ງສາມາດຕິດໃໝ່ໄດ້ຫຼາຍເທື່ອ ແລະ ສາມາດແຜ່ເຊື້ອໃສ່ຄົນອື່ນໄດ້ ແຕ່ບໍ່ທັນຮູ້ວ່າ ການຕິດເຊື້ອຄັ້ງໃໝ່ນີ້ຈະມີອາການໜັກເບົາສໍ່າໃດ.