ພາຍຸວາມກໍພັດຖະຫລົ່ມຟີລິບປິນ ເຮັດໃຫ້ນ້ຳຖ້ວມໜັກ ມີເສຍຊີວິດແລ້ວ 7 ຄົນ
ວັນທີ 13 ພະຈິກນີ້, ສື່ມວນຊົນລາຍງານວ່າ: ພາຍຸວາມກໍຖິ້ມຮ່ອງຮອຍຄວາມເສຍຫາຍ ຫລັງພັດຖະຫລົ່ມເກາະລູຊອນຂອງຟີລິບປິນ ເຮັດໃຫ້ເກີດນ້ຳຖ້ວມໜັກຢູ່ນະຄອນຫລວງມະນິລາ ແລະ ອີກຫລາຍແຂວງ, ໜ່ວຍງານບັນເທົາສາທາລະນະໄພລະດົມເຈົ້າໜ້າທີ່ເຂົ້າຊ່ວຍເຫລືອ ແລະ ອົບພະຍົບປະຊາຊົນທີ່ຕົກຄ້າງຢູ່ຕາມເຮືອນໃນຈຸດນ້ຳຖ້ວມສູງ. ນອກຈາກນີ້ ຝົນທີ່ຕົກໜັກຍັງເຮັດໃຫ້ເກີດດິນເຈື່ອນ ແລະ ນ້ຳຖ້ວມຖະໜົນຫລາຍເສັ້ນຈົນຕັດຂາດການສັນຈອນ.
ທາງການຟີລິບປິນເປີດເຜີຍຕົວເລກຜູ້ເສຍຊີວິດຈາກພາຍຸວາມກໍ ຫລ້າສຸດເພີ່ມເປັນ 7 ຄົນ ແລະ ສູນຫາຍອີກ 10 ຄົນ. ຂະນະທີ່ປະຊາຊົນປະມານ 180.000 ຄົນອົບພະຍົບໄປອາໄສຢູ່ສູນອາໄສຊົ່ວຄາວຫລາຍແຫ່ງເພື່ອຄວາມປອດໄພ.
ຂະນະທີ່ເຈົ້າໜ້າທີ່ຂອງສູນປ້ອງກັນພົນລະເຮືອນ ເຕືອນວ່າ: ສະຖານະການນ້ຳຖ້ວມອາດຍິ່ງຮຸນແຮງ ເນື່ອງຈາກປະລິມານນ້ຳທີ່ໄຫລມາຈາກພູຈະມາເພີ່ມໃສ່ແມ່ນ້ຳສາຍຕ່າງໆ ເຊິ່ງປັດຈຸບັນລົ້ນຕາຝັ່ງແລ້ວ ແລະ ມີລາຍງານວ່າ: ເຈົ້າໜ້າທີ່ໄດ້ເລີ່ມປ່ອຍນ້ຳອອກຈາກເຂື່ອນບາງແຫ່ງ ເພື່ອປ້ອງກັນເຂື່ອນແຕກ.
ທ່ານ ໂຣດຣິໂກ ດູເຕີເຕ ປະທານາທິບໍດີຟີລິບປິນ ນັ່ງເຮລິກົບແຕບິນສຳຫລວດຄວາມເສຍຫາຍຈາກນ້ຳຖ້ວມ ກ່ອນກ່າວຕໍ່ປະຊາຊົນທາງໂທລະພາບວ່າ: ໄດ້ສັ່ງໃຫ້ໜ່ວຍງານຂອງລັດເລັ່ງໃຫ້ການຊ່ວຍເຫລືອຜູ້ປະສົບໄພທີ່ໄດ້ຮັບຜົນກະທົບຈາກພາຍຸວາມກໍແລ້ວ.
ສໍາລັບພາຍຸວາມກໍ ເປັນພາຍຸຫົວທີ 8 ທີ່ພັດຖະຫລົ່ມຟີລິບປິນໃນໄລຍະ 2 ເດືອນຜ່ານມາ ໂດຍພັດຖະຫລົ່ມເກາະລູຊອນ ຊ້ຳຕື່ມຄວາມເສຍຫາຍຈາກພາຍຸໂຄນີທີ່ພັດຖະຫລົ່ມຟີລິບປິນໃນຕົ້ນເດືອນພະຈິກຜ່ານມາ ເຮັດໃຫ້ມີຜູ້ເສຍຊີວິດຢ່າງໜ້ອຍ 25 ຄົນ, ເຮືອນເປ່ເພເສຍຫາຍຫລາຍພັນຫລັງ.
