ນາຍົກລັດຖະມົນຕີ ທອງລຸນ ສີສຸລິດ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 37 ແລະ ກອງປະຊຸມສຸດຍອດອື່ນໆ ແບບທາງໄກ
ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 37 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງແບບທາງໄກ (ຜ່ານວີດີໂອອອນລາຍ) ເຊິ່ງໄດ້ເປີດຂຶ້ນຢ່າງເປັນທາງການ ໃນຕອນເຊົ້າວັນທີ 12 ພະຈິກນີ້ ພາຍໃຕ້ການເປັນປະທານຂອງທ່ານ ຫງວຽນ ຊວນ ຟຸກ ນາຍົກລັດຖະມົນຕີ ແຫ່ງ ສສ ຫວຽດນາມ ໃນຖານະປະທານໝູນວຽນອາຊຽນ ປີ 2020. ຄະນະຜູ້ແທນລາວນຳໂດຍທ່ານ ທອງລຸນ ສີສຸລິດ ນາຍົກລັດຖະມົນຕີ.
ໃນກອງປະຊຸມ, ບັນດາຜູ້ນໍາອາຊຽນໄດ້ຕີລາຄາສູງຕໍ່ຄວາມພະຍາຍາມ ແລະ ຄວາມສາມັກຄີເປັນປຶກແຜ່ນຂອງອາຊຽນໃນການສືບຕໍ່ສະກັດກັ້ນ, ຄວບຄຸມ, ແກ້ໄຂ ແລະ ຟື້ນຟູຜົນກະທົບຕ່າງໆ ຈາກພະຍາດໂຄວິດ-19 ໂດຍສະເພາະການສ້າງຕັ້ງກອງທຶນຕອບໂຕ້ພະຍາດດັ່ງກ່າວ, ສ້າງຄັງແຮຢາປົວພະຍາດ ແລະ ອຸປະກອນການແພດສຳລັບພາວະສຸກເສີນສາທາລະນະສຸກພາກພື້ນອາຊຽນ. ພ້ອມນັ້ນ, ກໍໄດ້ສະແດງຄວາມຊົມເຊີຍຕໍ່ການຜັນຂະຫຍາຍບູລິມະສິດໃນການເປັນປະທານອາຊຽນຂອງຫວຽດນາມ ໂດຍສະເພາະການຮັດແໜ້ນຄວາມສາມັກຄີ, ຄວາມເປັນເອກະພາບຂອງອາຊຽນ, ສົ່ງເສີມຄວາມເປັນແກນກາງຂອງອາຊຽນ ແລະ ການປະກອບສ່ວນເຂົ້າໃນການປົກປັກຮັກສາສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາຂອງພາກພື້ນ ໃນທ່າມກາງສະພາບການທີ່ຜັນແປຢ່າງໄວວາ ແລະ ສະຫລັບສັບຊ້ອນຂອງໂລກ, ການສົ່ງເສີມເອກກະລັກຂອງອາຊຽນ, ການຮັດແຄບຄວາມແຕກໂຕນດ້ານການພັດທະນາຂອງປະເທດອາຊຽນດ້ວຍກັນ, ການທົບທວນກາງສະໄໝແຜນແມ່ບົດວິໄສທັດປະຊາຄົມອາຊຽນ 2025 ແລະ ແຜນປະຕິບັດງານວ່າດ້ວຍການເຊື່ອມຈອດອາຊຽນ 2025. ຜູ້ນໍາອາຊຽນຍັງໄດ້ພ້ອມກັນປຶກສາຫາລື ແລະ ແລກປ່ຽນຄຳຄິດຄຳເຫັນກ່ຽວກັບການສືບຕໍ່ສ້າງປະຊາຄົມອາຊຽນໃຫ້ມີຄວາມເຂັ້ມແຂງ ແລະ ຍືນຍົງໃນຕໍ່ໜ້າບົນຈິດໃຈ “ອາຊຽນທີ່ໜຽວແໜ້ນ ແລະ ຕອບສະໜອງຕໍ່ສະພາບການ” ແລະ ໄດ້ເຫັນດີເປັນເອກະພາບໃນການສືບຕໍ່ຮັດແໜ້ນການຮ່ວມມືຢ່າງໃກ້ຊິດກັບບັນດາຄູ່ຮ່ວມເຈລະຈາ ກໍຄືຄູ່ຮ່ວມມືພາຍນອກອາຊຽນ ແນໃສ່ສົ່ງເສີມການຮ່ວມມືເພື່ອການພັດທະນາ ໂດຍຜ່ານບັນດາກົນໄກທີ່ອາຊຽນເປັນຜູ້ນຳພາ.
ໂອກາດນີ້, ຜູ້ນຳອາຊຽນກໍໄດ້ສະແດງຄວາມຍິນດີຕໍ່ການຮັບເອົາກູບາ, ໂກໂລມບີ ແລະ ອາຟຣິກາໃຕ້ ເຂົ້າເປັນພາຄີຂອງສົນທິສັນຍາໄມຕີຈິດ ແລະ ການຮ່ວມມື ຢູ່ອາຊີຕາເວັນອອກສຽງໃຕ້ ຫລື ທີເອຊີ. ພ້ອມກັນນັ້ນ, ບັນດາຜູ້ນໍາອາຊຽນຍັງໄດ້ແລກປ່ຽນທັດສະນະຕໍ່ບັນຫາທີ່ພົ້ນເດັ່ນຢູ່ພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.
ໃນໂອກາດນີ້, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ປະກອບຄໍາເຫັນ ໂດຍໄດ້ຕີລາຄາສູງຕໍ່ຜົນສຳເລັດຂອງອາຊຽນຜ່ານມາ ແລະ ການເປັນປະທານອາຊຽນຂອງຫວຽດນາມ ໃນປີ 2020, ພ້ອມທັງສະເໜີຊຸກຍູ້ໃຫ້ອາຊຽນສືບຕໍ່ເລັ່ງຟື້ນຟູບັນດາຂົງເຂດທີ່ໄດ້ຮັບຜົນກະທົບຈາກພະຍາດໂຄວິດ-19 ເປັນຕົ້ນແມ່ນສືບຕໍ່ຮ່ວມມືໃນການຄົ້ນຄວ້າ ແລະ ພັດທະນາ, ຜະລິດຢາປິ່ນປົວພະຍາດໂຄວິດ ກໍຄືຢາວັກແຊັງໃຫ້ໄດ້ໂດຍໄວ, ສືບຕໍ່ຊຸກຍູ້ການເຮັດວຽກຮ່ວມກັນ ແນໃສ່ສົ່ງເສີມເສດຖະກິດພາຍໃນອາຊຽນ, ການສະໜອງແບບຕ່ອງໂສ້ດ້ານການຄ້າ, ການສ້າງເງື່ອນໄຂເອື້ອອຳນວຍໃຫ້ແກ່ຈຸລະວິສາຫະກິດ, ວິສາ ຫະກິດຂະໜາດນ້ອຍ ແລະ ກາງ (MSMEs) ໂດຍສະເພາະການເຂົ້າເຖິງແຫລ່ງທຶນ ແລະ ເຕັກໂນໂລຊີທີ່ທັນສະໄໝ ເພື່ອສາມາດຂັບເຄື່ອນທຸລະກິດ ແລະ ການຜະລິດສິນຄ້າໄດ້ຢ່າງເຕັມສ່ວນ ລວມທັງຫັນໄປສູ່ການເປັນດີຈີຕອນ ແລະ ຟື້ນຟູການສະໜອງແບບຕ່ອງໂສ້ດ້ານການເຊື່ອມຈອດ ແລະ ການຄົມມະນາຄົມຂົນສົ່ງທາງບົກ, ທາງນ້ຳ ແລະ ທາງອາກາດ ລວມທັງການບໍລິການ ແລະ ການສະໜອງສິນຄ້າອຸປະໂພກ ແລະ ບໍລິໂພກ ເປັນຕົ້ນ.
ພິເສດ, ໃນໂອກາດກອງປະຊຸມສຸດຍອດອາຊຽນຄັ້ງທີ 37, ບັນດາຜູ້ນຳອາຊຽນ ໄດ້ເຂົ້າຮ່ວມເປັນສັກຂີພິຍານໃນພິທີປະກາດເປັນທາງການການທົບທວນກາງສະໄໝແຜນແມ່ບົດວິໄສທັດປະຊາຄົມອາຊຽນ 2025, ພິທີປະກາດເປັນທາງການແຜນຟື້ນຟູຮອບດ້ານອາຊຽນ ແລະ ແຜນຈັດຕັ້ງປະຕິບັດ ແລະ ພິທີປະກາດສ້າງຕັ້ງຄັງແຮຢາປົວພະຍາດ ແລະ ອຸປະກອນການແພດສໍາລັບພາວະສຸກເສີນດ້ານສາທາລະນະສຸກພາກພື້ນອາຊຽນ. ກອງປະຊຸມໄດ້ຮັບຮອງເອົາ 6 ເອກະສານສຳຄັນຄື: (1). ຖະແຫລງການຮ່າໂນ້ຍ ວ່າດ້ວຍປະຊາຄົມອາຊຽນ ຫລັງປີ 2025. (2). ຖະແຫລງການຮ່າໂນ້ຍ ວ່າດ້ວຍການຮັບຮອງເອົາຂໍ້ລິເລີ່ມເພື່ອການເຊື່ອມໂຍງອາຊຽນ ສະບັບທີ 4 (2021-2025). (3). ຖະແຫລງການອາຊຽນວ່າດ້ວຍການສ້າງແລວການເດີນທາງພິເສດພາຍໃນອາຊຽນ. (4). ຖະແຫລງການອາຊຽນ ວ່າດ້ວຍການທ່ອງທ່ຽວໃນຮູບແບບດີຈີຕອນ. (5). ການຍົກສູງເອກະລັກອາຊຽນ ແລະ (6). ຖະແຫລງການຮ່າໂນ້ຍວ່າດ້ວຍການສ້າງຄວາມເຂັ້ມແຂງວຽກງານສັງຄົມສົງເຄາະ ເພື່ອກ້າວໄປສູ່ປະຊາຄົມອາຊຽນທີ່ເຂັ້ມແຂງ ແລະ ຕອບສະໜອງຕໍ່ສະພາບການ.
ໃນຕອນບ່າຍວັນທີ 12 ພະຈິກ 2020 ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໄດ້ສືບຕໍ່ນຳພາຄະນະຜູ້ແທນເຂົ້າຮ່ວມກອງປະຊຸມສຸດຍອດອາຊຽນ-ຈີນ ຄັ້ງທີ 23, ກອງປະຊຸມສຸດຍອດອາຊຽນ-ຍີ່ປຸ່ນ ຄັ້ງທີ 23, ກອງປະຊຸມສຸດຍອດອາຊຽນ-ສ.ເກົາຫລີ ຄັ້ງທີ 21 ແລະ ກອງປະຊຸມສຸດຍອດອາຊຽນ-ອິນເດຍ ຄັ້ງທີ 17 ໃນຮູບແບບທາງໄກ.
