ການາດາສະຫຼອງວັນຊາດ ສ້າງຕັ້ງປະເທດຄົບຮອບ 150 ປີ
ການາດາຈັດງານຢ່າງຍິ່ງໃຫຍ່ສະເຫຼີມສະຫຼອງເນື່ອງໃນຄົບຮອບ 150 ປີການສະຖາປະນາປະເທດ.
ສຳນັກຂ່າວຕ່າງປະເທດລາຍງານຈາກນະຄອນຫລວງອອດຕາວາ ປະເທດການາດາ ໃນວັນທີ 1 ກໍລະກົດວ່າ: ນາຍົກລັດຖະມົນຕີ ຈັດສຕິນ ທຣູໂດ ເປີດງານວັນຊາດການາດາ ຫລື “ວັນການາດາ” ຢູ່ອາຄານລັດຖະສະພາ ໃນນະຄອນຫລວງອອດຕາວາ ໃນວັນທີ 1 ກໍລະກົດນີ້ ເຊິ່ງການສະເຫຼີມສະຫຼອງໃນປີນີ້ມີຄວາມຍິ່ງໃຫຍ່ ແລະ ສຳຄັນຫລາຍກວ່າປີຜ່ານມາ ເນື່ອງຈາກກົງກັບວາລະຄົບຮອບ 150 ປີແຫ່ງການສະຖາປະນາປະເທດ ເຊິ່ງຜູ້ນຳອາຍຸ 45 ປີ ກ່າວປາໄສວ່າ: ວັນຊາດເປັນໂອກາດອັນດີທີ່ທຸກຄົນຈະໄດ້ລະນຶກເຖິງອະດີດ ລວມທັງປຸກໃຈໃຫ້ມີຄວາມເຂັ້ມແຂງກັບປັດຈຸບັນ ແລະ ເນັ້ນກັບຕົນເອງອີກເຖິງຄວາມມຸ່ງໝັ້ນໃນພັນທະກິດສູ່ອະນາຄົດ.
ເຖິງຢ່າງໃດກໍຕາມ, ປັດຈຸບັນນີ້ການາດາຈະໄດ້ຮັບການຍອມຮັບຫຼາຍຂຶ້ນໃນເວທີໂລກ, ແຕ່ໃນວາລະການສ້າງຕັ້ງປະເທດຄົບ 150 ປີນີ້, ການາດາຍັງມີບັນຫາພາຍໃນທີ່ຈະຕ້ອງແກ້ໄຂອີກຫຼາຍບັນຫາ ລວມທັງບັນຫາໃຫຍ່ຄືການປອງດອງກັບຊົນເຜົ່າພື້ນເມືອງ ເຊິ່ງບໍ່ໄດ້ຮັບຄວາມເປັນທຳທັງເລື່ອງສິດທິຖືຄອງທີ່ດິນ, ການເປັນຢູ່ທາງເສດຖະກິດ ແລະ ບັນຫາທາງສັງຄົມອື່ນໆມາເປັນເວລາດົນນານ ໂດຍລັດຖະບານການາດາພາຍໃຕ້ການນຳຂອງນາຍົກລັດຖະມົນຕີ ທຣູໂດ ໃຫ້ຄຳໝັ້ນວ່າ: ຈະແກ້ໄຂບັນຫານີ້ໃຫ້ໄດ້ໂດຍໄວ.
