ລັດຖະບານພ້ອມຄູ່ຮ່ວມພັດທະນາຫາລືວຽກງານເສດຖະກິດມະຫາພາກ

ກອງປະຊຸມປຶກສາຫາລືລະດັບສູງລະຫວ່າງລັດຖະບານ ແລະ ຄູ່ຮ່ວມພັດທະນາກ່ຽວກັບວຽກງານເສດຖະກິດມະຫາພາກໄດ້ຈັດຂຶ້ນໃນວັນທີ 29 ມິຖຸນານີ້ທີ່ນະຄອນຫລວງວຽງຈັນ ເພື່ອເປີດເວທີ ແລະ ຊ່ອງທາງໃນການແລກປ່ຽນຄວາມຄິດຄວາມເຫັນຮ່ວມກັນລະຫວ່າງລັດຖະບານ, ຄູ່ຮ່ວມພັດທະນາ ແລະ ພາກເອກະຊົນຮ່ວມກັນຊອກວິທີທາງແກ້ໄຂບັນຫາຕ່າງໆໃຫ້ທ່ວງທັນ.

ກອງປະຊຸມຄັ້ງນີ້ໂດຍການເປັນປະທານຮ່ວມລະຫວ່າງ ທ່ານ ກິແກ້ວ ຈັນທະບູລີ ຮອງລັດຖະມົນຕີກະຊວງແຜນການ ແລະ ການລົງທຶນ, ມີທ່ານ ຢາຊູຊິ ເນກິຊິ ຫົວໜ້າຜູ້ຕ່າງໜ້າທະນາຄານພັດທະນາອາຊີປະຈໍາລາວ ແລະ ທ່ານ ນາງ ແຊລີ ເບີນນິງແຮມ ຫົວໜ້າຜູ້ຕ່າງໜ້າທະນາຄານໂລກ ປະຈໍາ ສປປ ລາວ ມີບັນດາຜູ້ຕ່າງໜ້າຈາກສະຖານທູດ, ອົງການຈັດຕັ້ງສາກົນ ແລະ ພາກສ່ວນທີ່ກ່ຽວຂ້ອງອື່ນໆເຂົ້າຮ່ວມເປັນຈໍານວນຫລາຍ ເພື່ອຮ່ວມກັນປຶກສາຫາລືຫລາຍບັນຫາສຳຄັນຄື: ການລົງເລິກກ່ຽວກັບສະພາບການພັດທະນາເສດຖະກິດ, ທິດທາງ ແລະ ການຄຸ້ມຄອງດ້ານງົບປະມານ ເປັນຕົ້ນ ແມ່ນສະພາບການຂະຫຍາຍຕົວໃນໄລຍະຜ່ານມາ ແລະ ການປ່ຽນວິທີການຄິດໄລ່ລວມຍອດຜະລິດຕະພັນພາຍໃນ. ພ້ອມທັງຫາລືເຖິງທິດທາງໃນການພັດທະນາເສດຖະກິດ ໂດຍສະເພາະການຄາດຄະເນປັດໄຈ ທີ່ສົ່ງຜົນກະທົບຕໍ່ການເຕີບໂຕ ແລະ ມາດຕະການຕ່າງໆໃນການຄຸ້ມຄອງລາຍຮັບ-ລານຈ່າຍ, ສະພາບແວດລ້ອມ ໃນການດໍາເນີນທຸລະກິດ ແລະ ການສົ່ງເສີມການ ລົງທຶນ, ເຊິ່ງເປັນປັດໄຈສໍາຄັນໃນການເອື້ອອໍານວຍໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງ ແລະ ເປັນປັດໄຈກະຕຸກຊຸກຍູ້ການລົງທຶນຂອງເອກະຊົນທັງພາຍໃນ ແລະ ຕ່າງປະເທດ ທີ່ກວມເອົາຫລາຍກວ່າ 50% ຂອງການລົງທຶນທັງໜົດ ໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII (2016-2020) ເພື່ອແນໃສ່ການຮັກສາສະຖຽນລະພາບຂອງເສດຖະກິດ ແລະ ການຄຸ້ມຄອງມະຫາພາກ ແລະ ໄດ້ຮຽກຮ້ອງໃຫ້ທຸກພາກສ່ວນຮ່ວມກັນຊອກວິທີທາງແກ້ໄຂສິ່ງທ້າທາຍ ແລະ ຂໍ້ຄົງຄ້າງຕ່າງໆໃນການພັດທະນາເສດຖະກິດມະຫາພາກບັນລຸໄດ້ຕາມແຜນທີ່ກໍານົດໄວ້.