ສິງກະໂປ-ຮົງກົງ ກຽມເປີດ Air Travel Bubble ລະຫວ່າງກັນ ເລີ່ມ 22 ພະຈິກນີ້
ທາງການສິງກະໂປ ແລະ ທາງການຮົງກົງ ຕົກລົງຈະເປີດ Air Travel Bubble ລະຫວ່າງກັນເປັນຄັ້ງທຳອິດ ເລີ່ມ 22 ພະຈິກນີ້ ແທນການກັກຕົວ 14 ວັນ ແລະ ກວດຫາເຊື້ອໂຄວິດ-19 ໂດຍສານການບິນ Singapore Airlines ແລະ Cathay pacific Airways ຈະເລີ່ມຕົ້ນເປີດຖ້ຽວບິນລະຫວ່າງກັນຫລາຍຖ້ຽວບິນຕໍ່ອາທິດ ກ່ອນຈະເລີ່ມຕົ້ນເພີ່ມຖ້ຽວບິນທຸກວັນ ນັບແຕ່ວັນທີ 7 ທັນວາເປັນຕົ້ນໄປ.
ຂໍ້ຕົກລົງດັ່ງກ່າວມີຂຶ້ນ ຫລັງຈາກທັງສອງສະແດງທ່າທີຈະເປີດພື້ນທີ່ Travel Bubble ລະຫວ່າງກັນປະມານ 1 ເດືອນກ່ອນ ໂດຍສິງກະໂປ-ຮົງກົງ ຖືເປັນ 1 ໃນ 10 ເສັ້ນທາງບິນທີ່ໄດ້ຮັບຄວາມນິຍົມຫລາຍທີ່ສຸດໃນໂລກ ເມື່ອປີ 2019 ຜ່ານມາ ຈາກການຈັດອັນດັບຂອງ OAG Aviation Worldwide Ltd. ມີຜູ້ໂດຍສານຫລາຍກວ່າ 3,8 ລ້ານຄົນ. ອີກທັງສິງກະໂປ ແລະ ຮົງກົງຍັງສາມາດຄວບຄຸມສະຖານະການການແຜ່ລະບາດຂອງໂຄວິດ-19 ໄດ້ແລ້ວ ມີຜູ້ຕິດເຊື້ອໃໝ່ພຽງຫລັກໜ່ວຍ ຫລື ຫລັກສິບຕົ້ນໆຕໍ່ວັນ.
ຫລ້າສຸດ ສິງກະໂປມີຜູ້ຕິດເຊື້ອສະສົມ 58.073 ຄົນ, ປິ່ນປົວຫາຍແລ້ວ 99%, ເສຍຊີວິດແລ້ວ 28 ຄົນ. ຂະນະທີ່ຮົງກົງມີຜູ້ຕິດເຊື້ອສະສົມ 5.390 ຄົນ, ປິ່ນປົວຫລາຍແລ້ວ 95%, ເສຍຊີວິດແລ້ວ 108 ຄົນ ເຊິ່ງຖືເປັນສະຖິຕິທີ່ຍັງໜ້ອຍ ເມື່ອທຽບໃສ່ຫລາຍປະເທດໃນເອີຣົບ ແລະ ອາເມລິກາ ໃນເວລານີ້ ທີ່ກຳລັງຜະເຊີນກັບການລະບາດຮຸນແຮງຮອບໃໝ່.
ແຕ່ເຖິງຢ່າງໃດກໍຕາມ, ຜູ້ໂດຍສານທີ່ຈະເດີນທາງຜ່ານ Air Travel Bubble ນີ້ ຈະຕ້ອງກຽມເອກະສານຢືນຢັນ ບໍ່ວ່າຈະເປັນຜົນການກວດການຕິດເຊື້ອກ່ອນໜ້າຂຶ້ນບິນບໍ່ເກີນ 72 ຊົ່ວໂມງ, ຍື່ນແບບສະແດງເຈດຈຳນົງໃນການເດີນທາງຜ່ານຊ່ອງທາງອອນລາຍຢ່າງໜ້ອຍ 7 ວັນກ່ອນເດີນທາງ ຖ້າຜູ້ໂດຍສານຄົນໃດກວດພົບການຕິດເຊື້ອໂຄວິດ-19 ຂະນຢູ່ພາຍໃນສິງກະໂປ ຫລື ຮົງກົງ ຈະຕ້ອງຮັບຜິດຊອບຄ່າໃຊ້ຈ່າຍໃນການປິ່ນປົວເອງທັງໝົດ, ແຕ່ຄາດວ່າຄ່າຊຸດກວດ ແລະ ຄ່າປິ່ນປົວຈະຢູ່ໃນເກນທີ່ຜູ້ໂດຍສານສ່ວນຫລາຍສາມາດຈ່າຍໄດ້ ເພາະຖ້າບໍ່ເປັນແບບນັ້ນ ການກະຕຸ້ນເສດຖະກິດ ແລະ ການທ່ອງທ່ຽວຜ່ານ Air Travel Bubble ນີ້ອາດຈະບໍ່ປະສົບຜົນສຳເລັດ.
