ປີ 2016 ຍອດມູນຄ່າການຄ້າ ລາວ-ຫວຽດນາມບັນລຸໄດ້ຫລາຍກວ່າ 800 ລ້ານໂດລາສະຫະລັດ

ກະຊວງອຸດສາຫະກຳ-ການຄ້າ ໃຫ້ຮູ້ວ່າ: ເນື່ອງຈາກລັດຖະບານຫວຽດນາມໄດ້ໃຫ້ 3 ສິດພິເສດດ້ານການຄ້າແກ່ ສປປ ລາວ ເພື່ອເອື້ອອຳນວຍຄວາມສະດວກ ແລະ ທັບມ້າງສິ່ງກີດຂວາງບາງຂອດການຄ້າລະຫວ່າງສອງຝ່າຍ ອັນໄດ້ຊ່ວຍເຮັດໃຫ້ການຄ້າສອງຝ່າຍບັນລຸໄດ້ຫລາຍກວ່າ 800 ລ້ານໂດລາສະຫະລັດ ໃນປີ 2016 ຜ່ານມາ, ໃນນັ້ນສິນຄ້າສົ່ງອອກຂອງລາວໄປຍັງ ສສ ຫວຽດນາມ ບັນລຸໄດ້ຫລາຍເຖິງ 345 ລ້ານໂດລາສະຫະລັດ. ຕົວເລກນີ້ໄດ້ຮັບການເປີດເຜີຍຢູ່ກອງປະຊຸມສຳມະນາສົ່ງເສີມການຄ້າ ແລະ ການພົບປະນັກທຸລະກິດ ລາວ-ຫວຽດນາມ ໃນວັນທີ 30 ມິຖຸນານີ້ ທີ່ນະຄອນຫລວງວຽງຈັນ ໂດຍການເປັນປະທານຂອງທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ເພື່ອແນໃສ່ເຜີຍແຜ່ລະບຽບການຕ່າງໆໃນການສົ່ງເສີມການຄ້າ, ການລົງທຶນ ແລະ ການດຳເນີນທຸລະກິດຮ່ວມກັນຂອງສອງປະເທດໃຫ້ນັບມື້ຂະຫຍາຍຕົວຫລາຍຂຶ້ນ.

ທ່ານ ສົມຈິດ ອິນທະມິດ ກ່າວວ່າ: ການສຳມະນາຄັ້ງນີ້ເນັ້ນເຖິງການຜັນຂະຫຍາຍເນື້ອໃນສັນຍາການຄ້າສອງຝ່າຍ ແລະ ສິດພິເສດທີ່ລາວໄດ້ຮັບຈາກສັນຍາການຄ້າຊາຍແດນລະຫວ່າງ ລາວ-ຫວຽດນາມ ທີ່ລະບຸໄວ້ວ່າ: 1. ສິນຄ້າທີ່ຜະລິດ, ສັດທີ່ລ້ຽງ ແລະ ພືດອຸດສາຫະກຳທີ່ປູກໂດຍປະຊາຊົນທີ່ອາໄສຢູ່ຕາມເມືອງຊາຍແດນຂອງ ສປປ ລາວ ແລະ ໄດ້ຮັບການຢັ້ງຢືນໂດຍເຈົ້າໜ້າທີ່ທີ່ກ່ຽວຂ້ອງຂອງລາວ ລວມທັງການຢັ້ງຢືນສຸຂາອະນາໄມພືດ ແລະ ສັດແມ່ນໄດ້ຮັບການຍົກເວັ້ນພາສີນຳເຂົ້າ ແລະ ອາກອນອື່ນໆເມື່ອນຳເຂົ້າຫວຽດນາມ. 2. ສິນຄ້າກະສິກຳທີ່ຜະລິດ ແລະ ຍັງບໍ່ທັນປຸງແຕ່ງ, ສັດທີ່ລ້ຽງ ແລະ ພືດອຸດສາຫະກຳທີ່ປູກໂດຍປະຊາຊົນ ແລະ ນັກທຸລະກິດທີ່ອາໄສຢູ່ແຂວງຊາຍແດນຂອງລາວ ພາຍໃຕ້ການລົງທຶນຂອງນັກລົງທຶນຫວຽດນາມ ໂດຍສອດຄ່ອງກັບກົດໝາຍ ແລະ ລະບຽບການຂອງແຕ່ລະຝ່າຍຕ້ອງໄດ້ຮັບການຍົກເວັ້ນອັດຕາພາສີນຳເຂົ້າ ແລະ ອາກອນມູນຄ່າເພີ່ມເມື່ອນຳເຂົ້າຫວຽດນາມ. 3. ຫວຽດນາມໃຫ້ບູລິມະສິດອັດຕາພາສີ 0% ແກ່ສິນຄ້າທີ່ມີແຫລ່ງກຳເນີດຈາກ ສປປ ລາວ ທີ່ລະບຸຢູ່ໃນເອກະສານຊ້ອນທ້າຍຂອງສັນຍາ ແລະ ເຈົ້າໜ້າທີ່ການຄ້າຂອງ ສປປ ລາວ ຕ້ອງອອກໃບຢັ້ງຢືນແຫລ່ງກຳເນີດສິນຄ້າທີ່ນຳເຂົ້າໄປຫວຽດນາມໃຫ້ຖືກຕ້ອງ.