ສະຫະພາບເອີຣົບເດີນໜ້າເອົາຜິດ Amazon ຖານຜູກຂາດການຄ້າ ເອົາປຽບຜູ້ຂາຍ ເອົາຂໍ້ມູນມາສ້າງຜົນປະໂຫດຍຕໍ່ໃຫ້ຕົນເອງ
ເບິ່ງຄືວ່າ Amazon ຈະຕ້ອງຜະເຊີນສະພາບລຳບາກ ເມື່ອຄະນະກຳມາທິການເອີຣົບໄດ້ຖະແຫລງກໍລະນີທີ່ພວກເຂົາພົບວ່າ: ແພກຟອມອີຄອມເມີດຈາກອາເມລິກາລາຍນີ້ໄດ້ລະເມີດກົດການເຮັດຜິດໃນບັນຫາການຜູກຂາດການຄ້າ ຫລັງຈາກນຳເອົາຂໍ້ມູນຂອງຜູ້ຂາຍ Third Party Sellers ໃນແພກຟອມມາໃຊ້ປະໂຫຍດຕໍ່ໃນການເຮັດທຸລະກິດຂອງຕົນເອງໃນຖານະຣີເທລ ໂດຍກຽມດຳເນີນການເປີດສາກສອບສວນໃນຄັ້ງທີສອງ.
ຄະນະກຳມາທິການເອີຣົບໄດ້ແຈ້ງໃຫ້ Amazon ຮູ້ເຖິງການກະທຳຂອງພວກເຂົາທີ່ເຂົ້າຂ່າຍການລະເມີດການຜູກຂາດໃນການດຳເນີນທຸລະກິດໃນສະຫະພາບເອີຣົບ ດ້ວຍການເຮັດໃຫ້ການແຂ່ງຂັນໃນຕະຫລາດຂາຍຍ່ອຍອອນລາຍບິດບ້ຽວຜິດແປກໄປຈາກປົກກະຕິ ຫລັງຈາກຕັ້ງຂໍ້ສັງເກດວ່າ: Amazon ອາໄສຂໍ້ມູນທຸລະກິດທີ່ບໍ່ເປັນສາທາລະນະຈາກຜູ້ຂາຍທົ່ວໄປທີ່ເຂົ້າມາຂາຍສິນຄ້າໃນແພກຟອມຂອງພວກເຂົາຢູ່ເຢຍລະມັນ ແລະ ຝຣັ່ງ ເຊິ່ງຖືເປັນສອງຕະຫລາດໃຫຍ່ທີ່ສຸດຂອງ Amazon ຢູ່ເອີຣົບ (70% ແລະ 80% ຂອງຄົນຊື້ຢູ່ຝຣັ່ງ ແລະ ເຢຍລະມັນຊື້ສິນຄ້າຈາກ Amazon ຢ່າງໜ້ອຍ 1 ຢ່າງໃນໄລຍະ 12 ເດືອນຫລ້າສຸດ).
ກ່ອນຈະນຳເອົາຂໍ້ມູນດັ່ງກ່າວມາໃຊ້ສ້າງປະໂຫຍດຕໍ່ຍອດການດຳເນີນທຸລະກິດຂອງຕົນເອງແລ້ວແຂ່ງຂັນກັບຜູ້ຄ້າເຫລົ່ານັ້ນອີກ ເຊິ່ງໃນແງ່ໜຶ່ງ ຄະນະກຳມາທິການເອີຣົບເບິ່ງວ່າການກະທຳໃນລັກສະນະນີ້ຖືເປັນການຕັ້ງໃຈເອົາປຽບຜູ້ຄ້າລາຍຍ່ອຍໂດຍກົງ.
Margrethe Vestager ຮອງປະທານບໍລິຫານຝ່າຍດຳເນີນງານຄະນະກຳມາທິການເອີຣົບ ທີ່ມີອຳນາດເບິ່ງແຍງດ້ານການແຂ່ງຂັນໃນແພກຟອມດິຈີຕອນ ກ່າວວ່າ: ພວກເຮົາຕ້ອງການກວດສອບໃຫ້ແນ່ໃຈວ່າ ແພກຟອມທີ່ດຳເນີນງານແບບຄູ່ຂະໜານ (ເປັນທັງແພກຟອມ ແລະ ຜູ້ຂາຍດ້ວຍຕົນເອງ) ແລະ ມີອຳນາດໃນຕະຫລາດສູງຄື Amazon ບໍ່ໄດ້ເຮັດໃຫ້ການແຂ່ງຂັນໃນຕະຫລາດບິດບ້ຽວ.
ກ່ອນໜ້ານີ້ ຄະນະກຳມາທິການເອີຣົບໄດ້ເລີ່ມສອບສວນ Amazon ດ້ວຍຂໍ້ຫາລະເມີດການຜູກຂາດການຄ້າມາແຕ່ວັນທີ 17 ກໍລະກົດ 2019 ໂດນນັບແຕ່ນີ້ເປັນຕົ້ນໄປ ຄະນະກຳມາທິການເອີຣົບຈະເດີນໜ້າສອບສວນທາງເລິກຕໍ່ Amazon ໃນຄັ້ງທີສອງ ໂດຍບອກພຽງວ່າ: ພວກເຂົາຍັງບໍ່ມີ “ກອບເວລາ” ທີ່ຈະແຈ້ງວ່າການສອບສວນໃນຄັ້ງນີ້ຈະສຳເລັດໃນຕອນໃດ ຂຶ້ນຢູ່ກັບປັດໄຈຮອບດ້ານ, ຄວາມສັບຊ້ອນຂອງກໍລະນີທີ່ເກີດຂຶ້ນ ລວມທັງຂອບເຂດການໃຊ້ສິດການປ້ອງກັນທີ່ໜ່ວຍງານກ່ຽວຂ້ອງຮ່ວມມືກັບຄະນະກຳມາທິການ.
