ສະຫະປະຊາຊາດສະແດງຄວາມຍິນດີຕໍ່ທ່ານ ໄບເດນ – ນາງ ແຮຣິສ ທີ່ຊະນະການເລືອກຕັ້ງ ເນັ້ນການພົວພັນ UN-US ເປັນເສົາຫລັກສຳຄັນ
ໃນວັນທີ 9 ພະຈິກນີ້, ທ່ານ ອັນໂຕນິໂອ ກູເຕີເຣສ ເລຂາທິການສະຫະປະຊາຊາດ ສະແດງຄວາມຍິນດີຕໍ່ທ່ານ ໂຈ ໄບເດນ ແລະ ນາງ ຄາມາລາ ແຮຣິສ ທີ່ຊະນະການເລືອກຕັ້ງ ກຽມກ້າວຂຶ້ນດຳລົງຕຳແໜ່ງປະທານາທິບໍດີ ແລະ ຮອງປະທານາທິບໍດີສະຫະລັດອາເມລິກາຄົນໃໝ່ໃນຕົ້ນປີ 2021 ໂດຍໄດ້ເນັ້ນເຖິງການພົວພັນລະຫວ່າງ UN-US ທີ່ຖືເປັນເສົາຫລັກສຳຄັນຂອງການຮ່ວມມືລະຫວ່າງປະເທດທີ່ຈຳເປັນຕ້ອງຮ່ວມມືກັນແກ້ໄຂບັນຫາຄວາມທ້າທາຍຕ່າງໆໃນປະຊາຄົມໂລກທຸກມື້ນີ້.
ຂະນະທີ່ທ່ານ Volkan Bozkir ປະທານສະມັດຊາໃຫຍ່ສະຫະປະຊາຊາດ (UNGA) ກ່າວວ່າ: ທ່ານ ໂຈ ໄບເດນ ສະໜັບສະໜູນວຽກຂອງສະຫະປະຊາຊາດມາໂດຍຕະຫລອດ. ຂະນະທີ່ນາງ ແຮຣິສ ກໍຖືເປັນກຳລັງສຳຄັນໃນການຂັບເຄື່ອນບັນຫາຄວາມເທົ່າທຽມທາງເພດ ເຊິ່ງທ່ານ Bozkir ເປີດເຜີຍວ່າ: ທ່ານຕ່າງຕັ້ງຕາລໍຖ້າທີ່ UN-US ຈະເຮັດວຽກຮ່ວມກັນຢ່າງໃກ້ຊິດ ແລະ ຂັບເຄື່ອນໂລກທີ່ໝັ້ນຄົງ ແລະ ປອດໄພອີກເທື່ອໜຶ່ງ.
ທາງດ້ານທ່ານ Phumzile Mlambo Ngcuka ຜູ້ອຳນວຍການ UN Women ລະບຸວ່າ: ໄຊຊະນະໃນຄັ້ງນີ້ທີ່ອາເມລິກາກຳລັງຈະມີຮອງປະທານາທິບໍດີແມ່ຍິງຄົນທຳອິດຂອງປະເທດ ຖືເປັນໄລຍະເວລາຍົກລະດັບຄັ້ງສຳຄັນກ່ຽວກັບບັນຫາຂອງແມ່ຍິງ ແລະ ເດັກຍິງທົ່ວໂລກ ໂດຍສະເພາະແມ່ຍິງຜິວສີ ໃຫ້ກ້າວເຂົ້າມາມີບົດບາດໃນພື້ນທີ່ທາງການເມືອງ. ຂະນະທີ່ນາງເອງກໍສະແດງຄວາມຍິນດີຕໍ່ ດຣ. ຈິລ ໄບເດນ ວ່າທີ່ແມ່ຍິງໝາຍເລກໜຶ່ງຄົນທຳອິດຂອງອາເມລິກາ ທີ່ເປັນຄູ/ອາຈານ ໂດຍນາງ ຈິລ ວາງແຜນຈະເຮັດວຽກໃນຖານະຜູ້ປະສິດປະສານວິຊາຕໍ່ໄປ ເຖິງວ່າຜົວຂອງນາງຈະກ້າວຂຶ້ນດຳລົງຕຳແໜ່ງຜູ້ນຳອາເມລິກາໃນອະນາຄົດແລ້ວກໍຕາມ.
