ສົ່ງເສີມການທ່ອງທ່ຽວຕ້ອງເຮັດທົ່ວສັງຄົມ

ສະບາຍດີເພື່ອນຜູ້ອ່ານ, ກໍນັບວ່າມີຄວາມພາກພູມໃຈເປັນຢ່າງຍິ່ງເມື່ອຊຸມປີຜ່ານມານີ້ ການທ່ອງທ່ຽວລາວເຮົານັບ ມື້ໄດ້ຮັບການສົ່ງເສີມ ແລະ ມີການພັດທະນາດີຂຶ້ນນັບທັງຂອດກໍ່ສ້າງພື້ນຖານໂຄງລ່າງໄປເຖິງການວາງແຜນຍຸດທະສາດຕ່າງໆ ເພື່ອສາມາດດຶງດູດນັກທ່ອງທ່ຽວເຂົ້າມາປະເທດເຮົານັບມື້ຫລາຍຂຶ້ນໃນປີ 2016 ຜ່ານມາ ກໍບັນລຸໄດ້  ແຕ່ 3-4 ລ້ານເທື່ອຄົນ, ຖ້າທຽບໃສ່ພົນລະເມືອງລາວແລ້ວກໍກວມເກືອບເຄິ່ງ ແລະ ກໍສາມາດນຳລາຍຮັບມາສູ່ປະເທດນັບທັງທາງກົງ ແລະ ທາງອ້ອມເປັນຈຳນວນບໍ່ໜ້ອຍ ແລະ ໄປຄຽງຄູ່ກັນນັ້ນສິ່ງຮອງຮັບຕ່າງໆເຊັ່ນ: ໂຮງແຮມ, ເຮືອນພັກ, ຮ້ານອາຫານ ແລະ ສິ່ງອຳນວຍຄວາມສະດວກອື່ນໆກໍນັບມື້ໄດ້ຮັບການພັດທະນາກວ້າງຂວາງຍິ່ງຂຶ້ນນັບ ທັງຢູ່ຕົວເມືອງໃຫຍ່ ແລະ ທ້ອງຖິ່ນຕ່າງໆ.

ແຕ່ຄຽງຄູ່ກັນນັ້ນ, ໃນບົດແຜນພັດທະນາການທ່ອງທ່ຽວ 2016-2020 ກໍໄດ້ຕີລາຄາວ່າ: ວຽກງານດັ່ງກ່າວຍັງມີຈຸດອ່ອນ ແລະ ຂໍ້ຄົງຄ້າງຫລາຍອັນທີ່ພວກເຮົາຈະຕ້ອງໄດ້ຮັບການປັບປຸງແກ້ໄຂເຊັ່ນ: ພື້ນຖານໂຄງລ່າງ ແລະ ການບໍລິການຍັງບໍ່ທັນໄດ້ຮັບການພັດທະນາໃຫ້ຕອບສະໜອງກັບຄວາມຮຽກຮ້ອງຕ້ອງການຂອງການເຕີບໃຫຍ່ຂະຫຍາຍຕົວຂອງວຽກງານດັ່ງກ່າວ, ການຈັດບູລິມະສິດພັດທະນາການທ່ອງທ່ຽວຢູ່ແຕ່ລະແຂວງຍັງບໍ່ທັນໄດ້ຮັບການຈັດຕັ້ງ ປະຕິບັດ ແລະ ການພັດທະນາຍັງເຮັດແບບກະແຈກກະຈາຍ ບໍ່ທັນມີຈຸດສຸມຄົບວົງຈອນ, ການໂຄສະນາການທ່ອງທ່ຽວຍັງເຮັດບໍ່ເລິກເຊິ່ງ ແລະ ກວ້າງຂວາງ, ສິ່ງພິມໂຄສະນາບໍ່ທັນຫລາກຫລາຍ, ຂໍ້ກຳນົດກົດລະບຽບກ່ຽວກັບການທ່ອງທ່ຽວມີບາງອັນບໍ່ແທດເໝາະກັບການຂະຫຍາຍຕົວຂອງວຽກງານ, ຍັງຂາດເຂີນບຸກຄະລາກອນ, ການຕອບສະ ໜອງອຸປະກອນ ແລະ ພາຫະນະຮັບໃຊ້ບໍ່ພຽງພໍ.

ເພື່ອແກ້ໄຂສະພາບດັ່ງກ່າວ ຂະແໜງການຕ້ອງໄດ້ເພີ່ມທະວີສ້າງຄວາມເຂັ້ມແຂງດ້ານການຈັດຕັ້ງ, ປະກອບບຸກຄະລາກອນທີ່ມີຄວາມຮູ້ຄວາມສາມາດດ້ານວິຊາສະເພາະໃຫ້ພຽງພໍ ແລະ ຕ້ອງເອົາໃຈໃສ່ເລິກເຊິ່ງຕໍ່ວຽກງານໂຄສະນາໃຫ້ດີກວ່າເກົ່າ, ພ້ອມເອົາໃຈໃສ່ວາງແຜນການພັດທະນາແຫລ່ງທ່ອງທ່ຽວຢ່າງມີຈຸດສຸມຕາມທິດພັດທະນາການທ່ອງທ່ຽວທຳມະຊາດ, ວັດທະນະທຳ ແລະ ປະຫວັດສາດໃຫ້ແຂງແຮງກວ່າເກົ່າ, ພ້ອມເພີ່ມທະວີການປະສານງານກັບຂະແໜງການ ແລະ ທ້ອງຖິ່ນຕ່າງໆໃນການໂຄສະນາປູກຈິດສຳນຶກດ້ານການທ່ອງທ່ຽວຂອງປວງຊົນໃຫ້ມີປະສິດທິພາບ, ບົນຈິດໃຈສົ່ງເສີມການທ່ອງທ່ຽວດ້ວຍການມີສ່ວນຮ່ວມຂອງທົ່ວສັງຄົມທຸກຄົນເປັນເຈົ້າການສົ່ງເສີມຜະລິດຕະພັນສິນຄ້າ, ເຄື່ອງທີ່ລະນຶກ, ງານເທດສະການ ແລະ ບຸນປະເພນີຕ່າງໆໃຫ້ເປັນຈຸດດຶງດູການທ່ອງທ່ຽວຢ່າງແທ້ຈິງ ແລະ ຄຽງຄູ່ກັນນັ້ນ, ໃນເບື້ອງນິຕິກຳ ແລະ ຂໍ້ກຳນົດກົດລະບຽບຕ່າງໆ ຕ້ອງໄດ້ເອົາໃຈໃສ່ປັບປຸງ ເພື່ອເປັນເງື່ອນໄຂໃຫ້ແກ່ການຄຸ້ມຄອງ ແລະ ພັດທະນາການທ່ອງທ່ຽວລາວເຮົາໃຫ້ສອດຄ່ອງກັບສະພາບແວດລ້ອມໃນການພັດທະນາ ເສດຖະກິດ-ສັງຄົມຂອງຊາດເຕີບໃຫຍ່ຂະຫຍາຍຕົວ.