ຄົນລວຍຫລິ້ນຫຸ້ນ ຄົນທຸກຫລິ້ນເລກ ແທ້ບໍ່ ?
November 7, 2020 - 1:45 PM
ທຸກທ່ານອາດເຄີຍໄດ້ຍິນປະໂຫຍກນີ້ມາແລ້ວ ທ່ານເຄີຍຄິດບໍ່ວ່າ ແທ້ ຫລື ບໍ່ ແລະ ຖ້າເປັນຄວາມຈິງແລ້ວ ແມ່ນຫຍັງເປັນເຫດ ແລະ ແມ່ນຫຍັງເປັນຜົນ. ຫລິ້ນຫຸ້ນເຮັດໃຫ້ລວຍ ຫລື ຕ້ອງລວຍຈຶ່ງຈະຫລິ້ນໄດ້. ມື້ນີ້ເຮົາຈະມາລົງເລິກເລື່ອງນີ້ກັນ.
ສາເຫດທີ່ປະໂຫຍກນີ້ມີທີ່ມາ ໃນອະດີດມີຫລາຍເລື່ອງ ແຕ່ມື້ນີ້ສະຖານະການປ່ຽນໄປແລ້ວ ເຊິ່ງຈະສະຫລຸບໄດ້ດັ່ງນີ້:
- ໃນອະດີດຫລາຍສິບປີກ່ອນ ການເປີດບັນຊີກັບບໍລິສັດຫລັກຊັບ ຈຳເປັນຕ້ອງມີເງິນຝາກທະນາຄານຈຳນວນຫລາຍ ເພື່ອຈະສະແດງໃຫ້ບໍລິສັດຫລັກຊັບເຫັນວ່າມີເງິນທຶນພຽງພໍໃນການລົງທຶນ ແລະ ກຸ້ມຄ່າກັບການທີ່ຈະມີໜ້າທີ່ການຕະຫລາດ (Marketing) ມາຊ່ວຍຊື້ຂາຍຫລັກຊັບໃຫ້. ໃນປັດຈຸບັນ ການເປີດບັນຊີບໍ່ໄດ້ເປັນພຽງແບບນັ້ນອີກແລ້ວ ດ້ວຍການປັບຕົວຂອງສະຖາບັນການເງິນເຂົ້າສູ່ຍຸກດິຈີຕອນ ບໍ່ວ່າຈະເປັນການຊື້ຂາຍຫລັກຊັບຜ່ານທາງອິນເຕີເນັດ ແລະ ມືຖືເຊັ່ນ: ບໍລິການຂອງເຊັດເທຣດ ແລະ ການເປີດບັນຊີຫລັກຊັບອອນລາຍ ໂດຍບໍ່ມີຈຳນວນເງິນຂັ້ນຕໍ່າ ແລະ ໃຊ້ເອກະສານບໍ່ຫລາຍ ເຮັດໃຫ້ເລື່ອງເຫລົ່ານີ້ງ່າຍຂຶ້ນ.
- ໃນອະດີດ ນັກລົງທຶນຕ້ອງລົງທຶນຊື້ຫລັກຊັບ (ຫຸ້ນ) ໂດຍກົງເທົ່ານັ້ນ. ປັດຈຸບັນ ມີທາງເລືອກໃນການລົງທຶນໃນຕະຫລາດຫລັກຊັບທີ່ຫລາກຫລາຍ ບໍ່ວ່າຈະເປັນກອງທຶນລວມທີ່ຫລາຍໆບໍລິສັດຈັດການກອງທຶນລວມອະນຸຍາດໃຫ້ລົງທຶນ ໂດຍບໍ່ຈຳກັດເງິນລົງທຶນຂັ້ນຕໍ່າ.
- ຫລາຍຄົນອາດເຄີຍຄິດວ່າ ການລົງທຶນເປັນເລື່ອງຍາກ ແລະ ຕ້ອງໃຊ້ຄວາມຮູ້ສູງ ຄົນທຸກບໍ່ມີໂອກາດຈະຮຽນຮູ້, ແຕ່ຄວາມຈິງແລ້ວ ຖ້ານັກລົງທຶນບໍ່ມີເວລາສຶກສາ ໃນມື້ນີ້ມີທາງເລືອກຫລວງຫລາຍ ບໍ່ວ່າຈະລົງທຶນຜ່ານທາງກອງທຶນລວມທີ່ມີຜູ້ຈັດການລົງທຶນບໍລິຫານໃຫ້ ຫລື ETF ເຊິ່ງເປັນກອງທຶນທີ່ຜົນຕອບແທນເປັນໄປຕາມດັດຊະນີຂອງຕະຫລາດຫລັກຊັບ ຫລື ບໍລິການ Robo Advisor ທີ່ມີຫລາຍໆ ທີ່ໃຫ້ບໍລິການໂດຍມີເງິນລົງທຶນຂັ້ນຕໍ່າຕໍ່ເດືອນພຽງເລັກໜ້ອຍເທົ່ານັ້ນ.
ຄວາມຈິງມັນພັດກາຍເປັນວ່າ: ຫຸ້ນຄວນຈະເປັນສິ່ງທີ່ທຸກຄົນມີໄວ້ຕິດກະເປົາຂອງທຸກຄອບຄົວຕ່າງຫາກ ຈາກເກືອບຈະເປັນປັດໄຈທີ່ຫ້າ ເພາະ
- ຈາກສະພາບທາງເສດຖະກິດໃນປັດຈຸບັນທີ່ໂລກມີອັດຕາການເຕີບໃຫຍ່ທາງເສດຖະກິດຕໍ່າ ລວມເຖິງບັນຫາປະຊາກອນອາຍຸສູງ ເຮັດໃຫ້ອັດຕາຜົນຕອບແທນຂອງສິນຊັບຕົກຕໍ່າລົງ ໂດຍສະເພາະອັດຕາດອກເບ້ຍເງິນຝາກ ແລະ ອັດຕາດອກເບ້ຍພັນທະບັດລັດຖະບານ ຍິ່ງເຮັດໃຫ້ພວກເຮົາບໍ່ສາມາດເອົາແຕ່ຝາກເງິນອີກແລ້ວ. ການລົງທຶນໃນຕະຫລາດຫລັກຊັບໃນໄລຍະຍາວຈະໃຫ້ຜົນຕອບແທນທີ່ສູງກວ່າ ແຕ່ຕ້ອງແລກກັບຄວາມສ່ຽງໃນໄລຍະສັ້ນທີ່ສູງຂຶ້ນ.
- ກຳໄລຈາກການຊື້ຂາຍຫລັກຊັບໃນຕະຫລາດຫລັກຊັບ ລວມເຖິງການຊື້ຂາຍກອງທຶນລວມ ໃນປັດຈຸບັນຍັງໄດ້ຮັບການຍົກເວັ້ນພາສີເງິນໄດ້ນຳອີກ ຈຶ່ງເພີ່ມໂອກາດໃນການສ້າງລາຍໄດ້, ສ່ວນເງິນປັນຜົນຈະເສຍພາສີຫັກຢູ່ຈຸດທີ່ຈ່າຍໃນອັດຕາ 10% ແຕ່ອາດຈະຂໍຄືນພາສີບາງສ່ວນໄດ້ເວລາທີ່ຍື່ນພາສີທ້າຍປີ.
- ການລົງທຶນໃນຕະຫລາດຫຸ້ນມີຜົນຕອບແທນໂດຍສະເລ່ຍສູງກວ່າອັດຕາເງິນເຟີ້ ຈຶ່ງເປັນການລົງທຶນທີ່ດີໃນໄລຍະຍາວ, ແຕ່ການລົງທຶນຝາກເງິນໃນທະນາຄານ ຫລື ຊື້ພັນທະບັດໃນປັດຈຸບັນມັກໃຫ້ຜົນຕອບແທນຕໍ່າ ຈົນບາງເທື່ອຕໍ່າກວ່າອັດຕາເງິນເຟີ້ອີກ ເຊິ່ງຈະເຮັດໃຫ້ມູນຄ່າຂອງເງິນເກັບຫລຸດລົງໃນໄລຍະຍາວ.
