ສະພາແຫ່ງຊາດ ຮັບຮອງເອົາບົດລາຍງານການເຄື່ອນໄຫວວຽກງານຂອງອົງການກວດສອບແຫ່ງລັດ

ໃນ​ວາລະ​ດຳ​ເນີນ​ກອງ​ປະຊຸມສະ​ໄໝສາ​ມັນ ​ເທື່ອ​ທີ 10 ຂອງ​ສະພາ​ແຫ່ງ​ຊາດ ຊຸດ​ທີ VIII ​ໃນ​ວັນ​ທີ 6 ພະຈິກນີ້ ​ໂດຍ​ການ​ເປັນ​ປະທານ​ຂອງ ທ່າ​ນ ບຸນ​ປອນ ບຸດ​ຕະນະ​ວົງ ຮອງ​ປະທານ​ສະພາ​ແຫ່ງ​ຊາດ, ​ບັນດາ​ສະມາຊິກ​ສະພາ​ແຫ່ງ​ຊາດ (ສສຊ) ​ໄດ້​ສຸມ​ໃສ່​ປະກອບ​ຄຳ​ຄິດ​ຄຳ​ເຫັນ​ໃສ່​​ບົດ​ລາຍງານ​ການ​ເຄື່ອນ​ໄຫວ​ວຽກ​ງານປະຈຳ​ປີ 2020 ​ແລະ ທິດ​ທາງ​​ແຜ​ນການ​ ປີ 2021 ຂອງອົງການກວ​ດສອບ​ແຫ່ງ​ລັດ ທີ່​ສະ​ເໜີ​​ໂດຍທ່ານ ນາງ​ ວຽງທອງ ສີ​ພັນ​ດອນ ປະທານ​ອົງການ​ດັ່ງກ່າວ. ຫລັງ​ຈາກ​ນັ້ນ ບັນດາ ສສຊ ​ໄດ້​ພ້ອມ​ກັນລົງ​ຄະ​ແນນ​ສຽງຮັບຮອງ​ເອົາ​ຮ່າງ​ບົດ​ລາຍ​ງານ​ດັ່ງ​ກ່າວ ດ້ວຍ​ຄະ​ແນນ​ສຽງ​ເຫັນ​ດີ​ເປັນ​ສ່ວນ​ຫລາຍ.

​      ເນື້ອໃນບົດລາຍງານດັ່ງກ່າວໄດ້ຍົກໃຫ້ເຫັນຜົນສໍາເລັດ, ຂໍ້ຄົງຄ້າງ, ສາເຫດທີ່ພາໃຫ້ມີຜົນສໍາເລັດ ແລະ ບົດຮຽນທີ່ຖອດຖອນໄດ້​ ເພື່ອ​ນຳ​ໄປປັບປຸງແກ້ໄຂວຽກງານກວດສອບໃນຕໍ່ໜ້າໃຫ້ດີຂຶ້ນກວ່າເກົ່າ. ພ້ອມ​ທັງເຫັນດີເປັນເອກະພາບຕໍ່ທິດທາງແຜນການເຄື່ອນໄຫວວຽກງານປະຈໍາປີ 2021 ຂອງອົງການກວດສອບແຫ່ງລັດ ​ເຊິ່ງໄດ້ກໍານົດ 5 ທິດທາງ, 5 ຄາດໝາຍ, 4 ແຜນວຽກຈຸດສຸມ ແລະ 6 ມາດຕະການຈັດຕັ້ງປະຕິບັດ ​ໂດຍ​ສະ​ເພາະໄດ້ກໍານົດແຜນການກວດສອບ ຈໍານວນ 137 ເປົ້າໝາຍ, ໃນນັ້ນ 30 ເປົ້າໝາຍ ແມ່ນເລື່ອນມາຈາກແຜນດັດແກ້ ປີ 2020 ​ເຊິ່ງ​ໄດ້ກຳນົດ​ໃຫ້​ອົງການ​ກວດ​ສອບ​ປະຈຳ​ສູນ​ກາງ 90 ເປົ້າໝາຍ ແລະ ອົງການ​ກວດ​ສອບ​ປະຈຳ​ພາກ 47 ເປົ້າໝາຍ.

ພ້ອມ​ນີ້, ກອງ​ປະຊຸມ​ໄດ້ສະເໜີບາງທັດສະນະໃຫ້ທີ່ປະຊຸມພິຈາລະນາຄື: ຕໍ່ລັດຖະບານ​ໃຫ້​ຄົ້ນຄວ້າຈັດສັນງົບປະມານຢ່າງເໝາະສົມ ລວມທັງປະກອບເຄື່ອງມືອຸປະກອນໃນການກວດກາມີຄຸນນະພາບ ແລະ ມີມາດຕະຖານ ເພື່ອອໍານວຍຄວາມສະດວກໃນການຈັດຕັ້ງປະຕິບັດໜ້າທີ່ຂອງອົງການກວດສອບແຫ່ງລັດມີປະສິດທິພາບ ແລະ ປະສິດທິຜົນ; ຕໍ່ອົງການກວດສອບແຫ່ງລັດ​ໃຫ້ລົງເລິກການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (SDG), ໂຄງການທີ່ຕິດພັນກັບສິ່ງແວດລ້ອມ-ທໍາມະຊາດ, ໂຄງການກໍ່ສ້າງຕາຝັ່ງເຈື່ອນຕາມລໍາແມ່ນ້ຳຂອງ ແລະ ສາຂາ, ໂຄງການເຊົ່າ-ສໍາປະທານທີ່ດິນລັດ, ການສ້າງແຜນຊໍາລະໜີ້ສິນຂອງລັດ, ດ້ານລາຍຮັບພາສີ-ອາກອນ, ການປະຕິບັດມາດຕະການແກ້ໄຂຜົນການກວດສອບ ເພື່ອເກັບກູ້ຄືນລາຍຮັບ, ໜີ້ຕ້ອງຮັບທີ່ກວດເຫັນ, ການແກ້ໄຂການລະເມີດວິ​ໄນແຜນການ-ການເງິນ; ຍົກສູງຄຸນນະພາບການກວດສອບດ້ວຍການວິເຄາະ, ວິໄຈ, ແຍກໃຫ້ເຫັນດ້ານດີທີ່ຄວນສົ່ງເສີມ ແລະ ຍົກໃຫ້ເຫັນສາເຫດຂອງການລະເມີດ ເພື່ອມີມາດຕະການແກ້ໄຂຢ່າງຖືກຕ້ອງ ແລະ ທັນການ, ແຍກລະອຽດບັນຫາການລະເມີດທາງດ້ານບໍລິຫານ, ທາງແພ່ງ, ທາງອາຍາ ເພື່ອເປັນບ່ອນອີງໃຫ້ຂະແໜງການກ່ຽວຂ້ອງໃນການແກ້ໄຂຜົນການກວດສອບໃຫ້ສອດຄ່ອງຕາມກົດໝາຍກ່ຽວຂ້ອງ; ຕໍ່ອົງການກວດກາລັດສືບຕໍ່ຈັດຕັ້ງປະຕິບັດການແກ້ໄຂຜົນການກວດກາຕາມຜົນການກວດສອບໃຫ້ຄົບຖ້ວນຕາມກົດໝາຍວ່າ ດ້ວຍການກວດກາລັດ ມາດຕາ 23 ແລະ 24 ໃຫ້ມີຜົນສັກສິດຫລາຍຂຶ້ນ; ຕໍ່ສະພາແຫ່ງຊາດຊຸດທີ IX ແລະ ສະພາປະຊາຊົນຂັ້ນແຂວງຊຸດທີ່ II ​ໃຫ້ເກັບກໍາຄໍາຄິດຄໍາເຫັນຈາກປະຊາຊົນ, ການຈັດຕັ້ງ, ຜູ້ແທນປະຊາຊົນ ໃຫ້ເຫັນໄດ້ເປົ້າໝາຍທີ່ມີຄວາມສ່ຽງທີ່ຈະຕ້ອງໄດ້ມີການກວດສອບ ເພື່ອເປັນບ່ອນອີງໃຫ້ອົງການກວດສອບແຫ່ງລັດກໍານົດເປົ້າໝາຍ ແລະ ບັນຈຸເຂົ້າແຜນການກວດສອບຕາມກົດໝາຍວ່າດ້ວຍກວດສອບແຫ່ງລັດ ມາດຕາ 11.