ຊົມເຊີຍລັດຖະບານລາວຕັດສິນໃຈຢຸດຕິການກູ້ຢືມເງິນຕ່າງປະເທດ ເພື່ອຊຳລະໜີ້ສາທາລະນະ

ໂດຍ: ລູກເມືອງພວນ

ວັນທຳອິດຂອງການໄຂກອງປະຊຸມສາມັນເທື່ອທີ 10 ສະພາແຫ່ງຊາດຊຸດທີ 8 ໃນວັນທີ 27 ຕຸລາຜ່ານມາ, ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ລາຍງານຕໍ່ສະພາວ່າ ຈະຢຸດຕິການກູ້ຢືມເງິນຈາກຕ່າງປະເທດ ເພື່ອຊຳລະໜີ້ສາທາລະນະ. ອັນນີ້ເປັນສັນຍານເຕືອນທີ່ດີ ເພາະລາວເຮົາໄດ້ເປັນໜີຕ່າງປະເທດເພີ່ມຂຶ້ນແຕ່ລະປີ ນັບແຕ່ປີ 2014 ເປັນຕົ້ນມາ.

ອີງຕາມບົດລາຍງານການເງິນແຫ່ງລັດ ປະຈຳປີ 2019, ວັນທີ 31 ຕຸລາທີ່ຜ່ານມາ, ສປປ ລາວ ມີມູນຄ່າ GDP 164,017 ຕື້ກີບ, ລວມຍອດພະລິດຕະພັນພາຍໃນສະເລ່ຍຕໍ່ຫົວຄົນປະມານ 2,650 ໂດລາສະຫະລັດ.

ຊຶ່ງໜີ້ສິນຕ່າງປະເທດຂອງ ສປປ ລາວ ນັບແຕ່ປີ 2014-2019 ມີທ່າອ່ຽງເພີ່ມຂຶ້ນທຸກໆປີ ໂດຍໃນປີ 2019 ນີ້ສິນຕ່າງປະເທດຂອງ ສປປ ລາວ ມີປະມານ 51,5% ຂອງ GDP  ຊຶ່ງໃນນັ້ນປະກອບດ້ວຍເງິນກູ້ຢືມສອງຝ່າຍ 34.1% ຂອງ GDP, ເງິນກູ້ຢືມຫຼາຍຝ່າຍ 8.7% ຂອງ GDP ແລະ ພັນທະບັດ 8.3% ຂອງ GDP.

ໃນດ້ານບົດລາຍງານເສດຖະກິດຂອງ ສປປ ລາວ ຂອງທະນາຄານໂລກ ລະບຸວ່າ: ໜີ້ສິນສາທາລະນະຕໍ່ GDP ຂອງ ສປປ ລາວ ຢູ່ໃນລະດັບ 58% ຂອງ GDP ໃນປີ 2019 ເພີ່ມຂຶ້ນເລັກນ້ອຍຈາກ 57.2% ຂອງ GDP ໃນປີ 2018 ແຕ່ອັດຕາສ່ວນຂອງໜີ້ສິນສາທາລະນະຕໍ່ GDP ຄາດວ່າຈະຫຼຸດລົງຕໍ່າກ່ວາ 56% ເມື່ອຮອດປີ 2021 ແລະ ຄວາມສ່ຽງດ້ານໜິ້ສິນສາທາລະນະຍັງມີສູງຢູ່.

ນອກນີ້ທະນາຄານໂລກຍັງລະບຸວ່າ: ຕໍ່ກັບສະພາບການດັ່ງກ່າວ ລັດຖະບານລາວມີຄວາມຕັ້ງໃຈຈະຫຼຸດຜ່ອນການກູ້ຢືມ ໂດຍຈຳກັດການກູ້ຢືມແບບຜ່ອນຜັນ ເພື່ອມາຈັດຕັ້ງປະຕິບັດໂຄງການ ທີ່ຄາດວ່າຈະມີຜົນໄດ້ຮັບທາງເສດຖະກິດ ແລະ ສັງຄົມສູງ. ພ້ອມນັ້ນລັດຖະບານຍັງຄົງສືບຕໍ່ ໂຈະການລົງທຶນຂອງລັດທີ່ມີຜົນໄດ້ຮັບທາງເສດຖະກິດຕໍ່າ ທີ່ຍັງບໍ່ທັນໄດ້ລິເລີ່ມການໃຊ້ຈ່າຍເທື່ອ, ອີກດ້ານໜຶ່ງເພື່ອຫຼຸດຜ່ອນຄວາມຈຳເປັນໃນການກູ້ຢືມຈາກພາຍນອກ ແລະ ເພື່ອປະເມີນຄືນ ແລະ ເພີ່ມຄວາມເຂັ້ມແຂງໃຫ້ແກ່ການຄຸ້ມຄອງກວດກາຄວາມປອດໄພຂອງເຂື່ອນໄຟຟ້າ ລັດຖະບານໄດ້ປະຕິບັດການໂຈະໂຄງການສ້າງເຂື່ອນໃໝ່.

ອັນເນື່ອງຈາກເຫດຜົນດັ່ງກ່າວ ລັດຖະບານລາວ ຈຶ່ງຕັດສິນໃຈທີ່ຈຳເປັນຕ້ອງໄດ້ຢຸດຕິການກູ້ຢືມເງິນຈາກປະເທດ ເພື່ອຊຳລະໜີ້ສິນສາທາລະນະ ເພື່ອປັບປຸງຕົນເອງໃຫ້ເຂັ້ມແຂງເທື່ອລະກ້າວ ແລະ ໂຈະການປະຕິບັດບາງໂຄງການທີ່ເຫັນວ່າບໍ່ທັນມີຄວາມຈຳເປັນ ຫຼື ມີຜົນທາງເສດຖະກິດໜ້ອຍ. ນີ້ແມ່ນມູມມອງທີ່ຖືກຕ້ອງ ແລະ ທັນເວລາ ກ່ອນຈະຫຼ້າສວາຍເກີນໄປ ແລະ ໜີສິນເພີ່ມຂຶ້ນຫຼາຍກ່ວານີ້.