ເສດຖະກິດອິນໂດເນເຊຍຫລຸດຖອຍເປັນຄັ້ງທຳອິດໃນຮອບ 20 ກວ່າປີ
ອິນໂດເນເຊຍກຳລັງຜະເຊີນສະພາບເສດຖະກິດຫລຸດຖອຍເປັນຄັ້ງທຳອິດໃນຮອບ 20 ກວ່າປີ ໃນໄຕມາດທີ 3 ຂອງປີນີ້. ຂະນະທີ່ປະຊາຊົນຫລາຍລ້ານຄົນຕົກງານໃນໄລຍະປີຜ່ານມາ ທ່າມກາງການລະບາດຂອງພະຍາດຕິດເຊື້ອໄວຣັສໂຄໂຣນາ 2019 ຫລື ໂຄວິດ-19.
ກົມສະຖິຕິອິນໂດເນເຊຍ ລາຍງານວ່າ: ລວມຍອດຜະລິດຕະພັນພາຍໃນ ຫລື GDP ໃນໄຕມາດທີ 3 ຫລຸດລົງ 3,49% ເຊັ່ນດຽວກັບການບໍລິໂພກພາກຄົວເຮືອນ ແລະ ການລົງທຶນ. ກ່ອນໜ້ານີ້, ບັນດານັກເສດຖະສາດຄາດວ່າ: GDP ຈະຫລຸດລົງ 3% ຫລັງຈາກຫລຸດລົງເຖິງ 5,32% ໃນໄຕມາດທີສອງ. ຂະນະດຽວກັນມີລາຍງານວ່າ: ໃນໄລຍະຕົ້ນປີຈົນຮອດເດືອນສິງຫາຜ່ານມາ ມີປະຊາຊົນຕົກງານເນື່ອງຈາກໂຄວິດ-19 ເຖິງ 2,67 ລ້ານຄົນ. ເຖິງຢ່າງໃດກໍຕາມ, ນັກເສດຖະສາດໄດ້ອອກມາຮຽກຮ້ອງໃຫ້ລັດຖະບານອອກມາດຕະການເພື່ອຊ່ວຍກະຕຸ້ນເສດຖະກິດເປັນການເພີ່ມຕື່ມ.
ລາຍງານລະບຸວ່າ: ການບໍລິໂພກພາກຄົວເຮືອນ ເຊິ່ງເປັນຕົວຫລັກໃນການຂັບເຄື່ອນການເຕີບໃຫຍ່ທາງເສດຖະກິດ ປັບຫລຸດລົງ 4% ແລະ ການລົງທຶນຫລຸດລົງ 6,5%. ຂະນະທີ່ການສົ່ງອອກຕົກລົງເຖິງ 10,8% ເນື່ອງຈາກອຸປະສົງຍັງເສີຍຊາ ເນື່ອງຈາກການລະບາດຂອງໂຄວິດ-19.
