ສະຖານທູດຈີນມອບເງິນຊ່ວຍເຫຼືອຜູ້ປະສົບໄພນໍ້າຖ້ວມຢູ່ພາກໃຕ້ລາວ

ຕອນເຊົ້າວັນທີ 4 ພະຈິກນີ້ ສະຖານທູດຈີນປະຈໍາລາວ ໄດ້ມອບເງິນສົດໃຫ້ອົງການກາແດງລາວ ຈໍານວນ 5.000$ ເພື່ອປະກອບສ່ວນເຂົ້າໃນການຊ່ວຍເຫຼືອຜູ້ປະສົບໄພນໍ້າຖ້ວມຢູ່ພາກໃຕ້. ຊຶ່ງພິທີມອບຮັບໄດ້ມີຂຶ້ນທີ່ສຳນັກງານອົງການກາແດງລາວໃນນະຄອນຫລວງວຽງຈັນ ລະຫ່ວາງ ທ່ານ ຄໍາຮຸ່ງ ເຮືອງວົງສີ ປະທານອົງການກາແດງດັ່ງກ່າວ ແລະ ທ່ານ ຈ່ຽງ ຈ້າຍຕົ່ງ ເອກອັກຄະລັດຖະທູດຈີນ ປະຈໍາລາວ.

ໃນພິທີ ທ່ານ ຄໍາຮຸ່ງ ຍັງໄດ້ສະແດງຄວາມຂອບໃຈຢ່າງສູງຕໍ່ການຊ່ວຍເຫລືອອັນລໍ້ຄ່ານີ້, ພ້ອມຈະນຳໄປຊ່ວຍເຫລືອຜູ້ປະສົບໄພນໍ້າຖ້ວມຄັ້ງນີ້ໃຫ້ທົ່ວເຖິງ, ພ້ອມໄດ້ແລກປ່ຽນ ວຽກງານການພົວພັນຮ່ວມມື ຢ່າງສະໝໍ່າສະເໝີມາ ລະຫວ່າງອົງການກາແດງລາວ ແລະສະພາກາແດງຈີນ ແລະ ກໍ່ໄດ້ຝາກຄວາມສະແດງຄວາມຂອບໃຈໄປສະພາກາແດງຈີນ ກໍ່ຄືລັດຖະບານ ແລະ ປະຊາຊົນຈີນ ຊຶ່ງຍາມໃດກໍມີຄວາມເປັນຫ່ວງເປັນໃຍຕໍ່ປະຊາຊົນລາວໂດຍໄດ້ບິແບ່ງວັດຖຸ, ປັດໄຈຊ່ວຍເຫລືອລາວຕະຫລອດມາ.