ເດັກນ້ອຍ 3 ປີ ລອດປະຕິຫານ ກ້ອງຊາກຫັກພັງຈາກແຜ່ນດິນໄຫວຢູ່ຕວກກີ
ເຈົ້າໜ້າທີ່ກູ້ໄພຂອງຕວກກີພົບເດັກນ້ອຍເພດຍິງອາຍຸພຽງ 3 ປີ ລອດຊີວິດຢູ່ກ້ອງຊາກຫັກພັງ ຈາກເຫດແຜ່ນດິນໄຫວຮຸນແຮງໃນທ້າຍອາທິດຜ່ານມາ ເຊິ່ງຈຳນວນຜູ້ເສຍຊີວິດເພີ່ມເປັນຢ່າງໜ້ອຍ 81 ຄົນ ໃນຈຳນວນນີ້ 2 ຄົນຢູ່ເກຣັກ.
ສຳນັກຂ່າວຕ່າງປະເທດລາຍງານຈາກເມືອງອິສຕັນບູລ ປະເທດຕວກກີ ໃນວັນທີ 2 ພະຈິກ ກ່ຽວກັບຄວາມຄືບໜ້າຂອງເຫດແຜ່ນດິນໄຫວຮຸນແຮງ 7,0 ແມກນິຈູດ ນອກແຄມຝັ່ງແຂວງອິດມີ ທີ່ຢູ່ທາງຕາເວັນຕົກຂອງຕວກກີ ໃນວັນທີ 30 ຕຸລາຜ່ານມາ ແລະ ນະຄອນຫລວງເອເທນ ເມືອງຫລວງຂອງເກຣັກເຊັ່ນກັນ.
ພາລະກິດຄົ້ນຫາຜູ້ສູນຫາຍຢູ່ຕວກກີຍັງດຳເນີນໄປຢ່າງຕໍ່ເນື່ອງ ໂດຍໃນຕອນເຊົ້າວັນທີ 2 ພະຈິກນີ້ ເຈົ້າໜ້າທີ່ກູ້ໄພສາມາດຊ່ວຍເຫລືອນາງ ອີລິບ ເດັກຍິງອາຍຸ 3 ປີ ອອກມາຈາກກ້ອງຊາກຫັກພັງ ເຊິ່ງການຄົ້ນພົບເດັກນ້ອຍເກີດຂຶ້ນຫລັງໄພພິບັດຄັ້ງນີ້ຜ່ານພົ້ນໄປແລ້ວ 65 ຊົ່ວໂມງ.
ຂະນະທີ່ສຳນັກງານປ້ອງກັນ ແລະ ບັນເທົາສາທາລະນະໄພຂອງຕວກກີລາຍງານຈຳນວນຜູ້ເສຍຊີວິດໄວ້ຢ່າງໜ້ອຍ 79 ຄົນ ແລະ ມີຜູ້ໄດ້ຮັບບາດເຈັບອີກເກືອບ 1.000 ຄົນ ຖືເປັນແຜ່ນດິນໄຫວຮຸນແຮງທີ່ສຸດໃນຮອບ 9 ປີຂອງຕວກກີ ນັບແຕ່ເຫດແຜ່ນດິນໄຫວຢູ່ເມືອງແວນ ເມື່ອປີ 2011 ຂ້າຊີວິດປະຊາຊົນຫລາຍກວ່າ 500 ຄົນ, ສ່ວນລັດຖະບານເກຣັກລາຍງານຈຳນວນຜູ້ເສຍຊີວິດຢ່າງໜ້ອຍ 2 ຄົນ.
