ຕວກກີແຜ່ນດິນໄຫວ ເສຍຊີວິດຢ່າງໜ້ອຍ 64 ສົບ
ສຳນັກຂ່າວ ແຊນແນລນິວສ ເອເຊຍ ລາຍງານວ່າ ຈຳນວນຜູ້ເສຍຊີວິດຈາກເຫດແຜ່ນດິນໄຫວຮຸນແຮງໃນປະເທດຕວກກີ ເພີ່ມຂຶ້ນເປັນຢ່າງໜ້ອຍ 64 ສົບແລ້ວ ໃນວັນທີ 1 ພະຈິກ ແຕ່ຄວາມຫວັງໃນການພົບຜູ້ເສຍຊີວິດ ຍັງບໍ່ທັນໄດ້ໝົດ ຫຼ້າສຸດເຈົ້າໜ້າທີ່ກູ້ໄພ ສາມາດຊ່ວຍເຫຼືອຜູ້ເຖົ້າອາຍຸ 70 ປີ ທີ່ຕິດຄ້າງຢູ່ໃຕ້ຊາກສະຫຼັກຫັກພັງ ດົນກ່ວາ 34 ຊົ່ວໂມງອອກມາໄດ້.
ທ່ານ ຟູອາດ ໂອຄະທາຍ ຮອງປະທານາທິບໍດີ ຕວກກີ ເປີດເຜີຍວ່າ ຈຳນວນຜູ້ເສຍຊີວິດໃນເມືອງ ອິສເມຍ ເມືອງໃຫ່ຍອັນດັບ 3 ຂອງປະເທດ ເພີ່ມຂຶ້ນເປັນ 62 ສົບແລ້ວ ຫຼັງເຈົ້າໜ້າທີ່ດຶງສົບອອກຈາກຊາກສະຫຼັກຫັກພັງ ນອກຈາກນີ້ຍັງມີຜູ້ເສຍຊີວິດອີກ 2 ສົບທີ່ເມືອງ ຊາມອສ ແລະ ມີຜູ້ໄດ້ຮັບບາດເຈັບທົ່ວປະເທດເກືອບ 900 ຄົນ.
ແຜ່ນດິນໄຫວຄັ້ງນີ້ເກີດຂຶ້ນ ເມື່ອຊ່ວງບ່າຍຂອງວັນທີ 30 ຕຸລາ ມີຄວາມຮຸນແຮງລະຫວ່າງ 6.6-7.0 ຣິກເຕີ. ເຮັດໃຫ້ເກີດຄື່ນສືນາມິຂະໜາດນ້ອຍຫຼາຍຄັ້ງຊັດເຂົ້າໃນເມືອງ ອິສເມຍ.
ຫຼ້າສຸດເຈົ້າໜ້າທີ່ກູ້ໄພສາມາດເອົາຕົວຜູ້ເຖົ້າຄົນໜຶ່ງອາຍຸ 70 ປີອອກຈາກຊາກສະຫຼັກຫັກພັງອອກມາໄດ້ສຳເລັດ. ມາເຖິງເວລານີ້ ມີເຈົ້າໜ້າທີ່ກູ້ໄພແລ້ວຫຼາຍກ່ວາ 6,400 ຄົນ ຊ່ວຍເຫຼືອຜູ້ລອດຊີວິດໄດ້ຫຼາຍກ່ວາ 100 ຄົນ ໂດຍສ່ວນໃຫ່ຍແມ່ນຢູ່ໃນອາພາດເມັ້ນ 2 ແຫ່ງໃນເມືອງ ອິສເມຍ.
