10 ປີແຫ່ງການເຕີບໃຫຍ່ຂະຫຍາຍຕົວຂອງຕະຫລາດທຶນລາວ
ໃນວັນທີ 30 ຕຸລານີ້, ຄະນະກໍາມະການຄຸ້ມຄອງຫລັກຊັບລາວ ໄດ້ຈັດພິທີສະຫລຸບຜົນງານ 10 ປີ ຕະຫລາດທຶນລາວ (10/10/2010-10/10/2020) ໂດຍການເຂົ້າຮ່ວມຂອງທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ປະທານຄະນະກໍາມະການຄຸ້ມຄອງຫລັກຊັບ, ມີທ່ານ ເອກອັກຄະລັດຖະທູດ ສ.ເກົາຫລີ ປະຈໍາລາວ ແລະ ຜູ້ຕາງຫນ້າອົງການຈັດຕັ້ງສາກົນ ປະຈໍາລາວ ເຂົ້າຮ່ວມນຳດ້ວຍ.
ໃນພິທີ, ທ່ານ ນາງ ສາຍສະໝອນ ຈັນທະຈັກ ຫົວໜ້າ ສໍານັກງານຄະນະກໍາມະການຄຸ້ມຄອງຫລັກຊັບລາວ ໃຫ້ຮູ້ວ່າ: ຕະຫລອດໄລຍະ 10 ປີທີ່ຜ່ານມາ, ທ່າມກາງສະພາບການຂອງໂລກມີການຜັນແປຢ່າງສະຫລັບສັບຊ້ອນ, ແຕ່ພາຍໃຕ້ການຊີ້ນໍາ-ນໍາພາຂອງຄະນະກໍາມະການຄຸ້ມຄອງຫລັກຊັບ, ຄະນະບໍລິຫານຂອງຜູ້ມີສ່ວນຮ່ວມໃນຕະຫລາດທຶນລາວ, ບວກກັບຄວາມເປັນເອກະພາບ ແລະ ຄວາມຕັດສິນໃຈສູງໃນການປະຕິບັດໜ້າທີ່ຂອງສະມາຊິກພັກ-ພະນັກງານໃນຂະແໜງຕະຫລາດທຶນລາວ ແລະ ສິ່ງທີ່ຂາດບໍ່ໄດ້ແມ່ນການຮ່ວມມືຈາກບັນດາກະຊວງ, ຂະແໜງການ ແລະ ການຊ່ວຍເຫລືອຂອງທຸກພາກສ່ວນທັງພາຍໃນ ແລະ ຕ່າງປະເທດຈຶ່ງເຮັດໃຫ້ຕະຫລາດທຶນຂອງລາວໄດ້ເຕີບໃຫຍ່ຂະຫຍາຍຕົວ ແລະ ສາມາດເຄື່ອນໄຫວໄດ້ຢ່າງຄ່ອງຕົວ, ສ້າງເງື່ອນໄຂໃຫ້ລັດຖະບານ ແລະ ວິສາຫະກິດຂອງລາວສາມາດລະດົມແຫລ່ງທຶນໄລຍະຍາວໂດຍຜ່ານການອອກຈໍາໜ່າຍພັນທະບັດລັດຖະບານ, ອອກຮຸ້ນຢູ່ພາຍໃນປະເທດ ແລະ ອອກຮຸ້ນກູ້ຢູ່ຕ່າງປະເທດ ເຊິ່ງສາມາດລະດົມ ທຶນໄດ້ ທັງໝົດ 24.502 ຕື້ກີບ ກວມເອົາ 15% ຂອງ GDP, ເພິ່ງແຫລ່ງທຶນດັ່ງກ່າວ ໄດ້ໝູນໃຊ້ເຂົ້າໃນການທຸລະກິດ ແລະ ການບໍລິການ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ແລະ ແກ້ໄຂຊີວິດການເປັນຢູ່ຂອງປະຊາຊົນດີຂຶ້ນເທື່ອລະກ້າວ, ທັງເປັນກົນໄກສ້າງຄວາມເຂັ້ມແຂງໃຫ້ແກ່ວິສາຫະກິດທີ່ມາລະດົມທຶນຜ່ານຕະຫລາດທຶນລາວ.
ໃນໂອກາດນີ້, ທ່ານຮອງນາຍົກລັດຖະມົນຕີ ສົມດີ ດວງດີ ໄດ້ຮຽກຮ້ອງໃຫ້ຜູ້ມີສ່ວນຮ່ວມໃນຕະຫລາດທຶນລາວ ແລະ ທຸກພາກສ່ວນທີ່ກ່ຽວຂ້ອງທັງພາຍໃນ ແລະ ຕ່າງປະເທດ, ໂດຍສະເພາະແມ່ນ ຕະຫລາດຫລັກຊັບ ສ.ເກົາຫລີ ຈົ່ງສືບຕໍ່ໃຫ້ການຮ່ວມມື ແລະ ປະກອບສ່ວນພັດທະນາຕະຫລາດທຶນລາວໃຫ້ກາຍເປັນຂໍກຸນແຈໃນການຈັດສັນແຫລ່ງທຶນທີ່ໜ້າເຊື່ອຖື ແລະ ມີມາດຕະຖານສາກົນຕາມທີ່ໄດ້ກໍານົດໄວ້ໃນວິໄສທັດການພັດທະນາຕະຫລາດທຶນລາວ ຮອດປີ 2030.
