ສສຊ ຊຽງຂວາງ ສະເໜີໃຫ້ລັດຖະບານຫັນສູ່ຍຸກດີຈີຕອນ

ທ່ານ ວິໄລສຸກ ພິມມະສອນ ສະມາຊິກສະພາແຫ່ງຊາດ ເຂດ 9 ແຂວງຊຽງຂວາງ ໄດ້ປະກອບຄຳຄິດເຫັນໃສ່ບົດລາຍງານຂອງລັດຖະບານຢູ່​ກອງ​ປະຊຸມ​ສະ​ໄໝ​ສາມັນ ​ເທື່ອ​ທີ 10 ຂອງ​ສະພາ​ແຫ່ງ​ຊາດ ສະ​ໄໝ​ທີ VIII ​ໃນ​ວັນ​ທີ 28 ຕຸລານີ້​ວ່າ: ຢາກໃຫ້ລັດຖະບານພິຈາລະນາຕື່ມກ່ຽວກັບແຜນໄລຍະ 5 ປີ ເທື່ອທີ 9 ເຊິ່ງກໍໄດ້ມີການປັບປຸງ, ປ່ຽນແປງການຈັດຕັ້ງ, ໃນຍຸກປັດຈຸບັນເຫັນວ່າ ການປະຕິວັດອຸດສາຫະກຳ 4.0 ນີ້ ກໍາລັງມາແຮງທົ່ວໂລກ. ສະນັ້ນ, ພວກເຮົາຄວນຄົ້ນຄວ້າພິຈາລະນາໂດຍໃສ່ຊື່ວ່າ: ແຜນພັດທະນາເສດຖະກິດ-ສັງຄົມດີຈີຕອນ ໂດຍການຂະຫຍາຍການປະຕິບັດຊຸກຍູ້ສົ່ງເສີມຂະບວນການປະຕິວັດອຸດສາຫະກຳ 4.0 ຢ່າງແຂງແຮງຮອບດ້ານ, ມີຈຸດສຸມ ແລະ ມີຄຸນນະພາບຕາມທິດສີຂຽວ ສະອາດ ແລະ ຍືນຍົງ, ສົ່ງເສີມ ແລະ ຊຸກຍູ້ເສດຖະກິດຂະໜາດນ້ອຍ-ຂະໜາດກາງຢ່າງແຂງແຮງຕາມທິດດີຈີຕອນ. ຫັນເປັນທັນສະໄໝຮີບດ່ວນ ເພື່ອຄຸ້ມຄອງການຈັດເກັບລາຍຮັບຈາກການບໍລິການທັນສະໄໝຂອງສັງຄົມ, ເພາະທຸກມື້ນີ້ ການຂາຍອອນລາຍແມ່ນມີທົ່ວປະເທດ. ພ້ອມກັນນີ້, ລັດຖະບານເຮົາຕ້ອງເອົາໃຈໃສ່ລົງທຶນໃນການສ້າງລະບົບຄຸ້ມຄອງດີຈີຕອນ, ຄຸ້ມຄອງເກັບລາຍຮັບ ເພາະເຫັນວ່າປະຊາຊົນພວກເຮົາແມ່ນຫັນໄປຕາມຍຸກສະໄໝກວ່າລັດຖະບານ ເຮົາແລ້ວ.

ທ່ານ ວິໄລສຸກ ພິມມະສອນ ຍັງສະເໜີໃຫ້ລັດຖະບານເອົາໃຈໃສ່ປັບປຸງ ແລະ ຫັນບັນດາຫົວໜ່ວຍລັດວິສາຫະກິດເປັນຮູບການອື່ນດ້ວຍການຂາຍຮຸ້ນ ຫລື ການຫັນການລົງທຶນໄປສູ່ຍຸກຈີດີພີ ຕາມທ່ານນາຍົກສະເໜີ, ຊຸກຍູ້ສົ່ງເສີມການຊົມໃຊ້ຍານພາຫະນະໄຟຟ້າ ຫລື ສ້າງຕັ້ງໂຮງງານປະກອບຍານພາຫະນະໄຟຟ້າ ໂດຍສະເໜີໃຫ້ລັດຖະບານມີນະໂຍບາຍຜ່ອນຜັນດ້ານພາສີອາກອນ ແລະ ອື່ນໆ ເພາະວ່າໄລຍະຜ່ານມາເຫັນວ່າມີການເຊັນບົດບັນທຶກສ້າງໂຮງງານປະກອບລົດຈັກໄຟຟ້າ ເພື່ອເຮັດໃຫ້ລັດຖະບານມີລາຍຮັບໂດຍທາງອ້ອມ ໂດຍສະເພາະແມ່ນການນຳໃຊ້ລົດໄຟຟ້ານີ້.

ເຫດຜົນທີ່ສະເໜີວ່າ ໃຫ້ຫັນເປັນເສດຖະກິດດີຈີຕອນ ເນື່ອງຈາກວ່າມັນຢູ່ໃນສະພາບໂຄວິດ-19 ຮັບປະກັນໄລຍະຫ່າງຈາກການແຜ່ລະບາດຂອງພະຍາດດັ່ງກ່າວ ເຊິ່ງມັນຈະເປັນການບໍ່ສິ້ນເປືອງງົບປະມານ, ການພັດທະນາພື້ນຖານໂຄງລ່າງການສຶກສາ ແລະ ການທ່ອງທ່ຽວ, ພ້ອມກັນນີ້ ຍັງເປັນການປະຢັດເວລາ ແລະ ການຫລຸດຜ່ອນມົນລະພິດຈາກການສັນຈອນນຳອີກ.

ສຳລັບສະຕິການເອົາໃຈໃສ່ໃນການສຶກສາຮໍ່າຮຽນຂອງນັກຮຽນ-ນັກສຶກສານັ້ນ ຂໍສະເໜີໃຫ້ລັດຖະບານປະຕິຮູບລະບົບການສຶກສາປັດຈຸບັນຫັນໄປສູ່ການສຶກສາແບບດີຈີຕອນໃນທຸກຂົງເຂດ ແລະ ທຸກຂະແໜງການ, ເລັ່ງລັດລົງທຶນກໍ່ສ້າງຊັບພະຍາກອນມະນຸດດີຈີຕອນໃຫ້ໄດ້ທັງປະລິມານ ແລະ ຄຸນນະພາບ ເພື່ອຈັດຕັ້ງປະຕິບັດຂະບວນປະຕິວັດອຸດສາຫະກຳ 4.0, ຊຸກຍູ້ສົ່ງເສີມການຄົ້ນຄວ້າວິທະຍາສາດ ເພື່ອຫັນໄປສູ່ລະບົບດີຈີຕອນ ລະຫວ່າງກະຊວງກ່ຽວຂ້ອງ ເປັນຕົ້ນແມ່ນກະຊວງສຶກສາທິການ ແລະ ກິລາ, ກະຊວງວິທະຍາສາດ ແລະ ເຕັກໂນໂລຊີ, ກະຊວງໄປສະນີໂທລະຄົມມະນາຄົມ ແລະ ການສື່ສານ, ກະຊວງອຸດສາຫະກຳ ແລະ ການຄ້າ ຄ່ອຍກ້າວໄປສູ່​ການສ້າງມະຫາວິທະຍາໄລຈິນຕະນາ ຫລື ໄຊເບີ ຢູນີເວີຊີຕີ, ຫັນຄົນລາວເຮົາໃຫ້ເປັນຄົນດີຈີຕອນໃນອະນາຄົດ.