ສະຫລຸບບັນຫາໜ້າສົນໃຈທົ່ວໂລກ ວັນທີ 28 ຕຸລາ 2020
1. Advanced Micro Devices (AMD) ໄດ້ຕົກລົງຈະຊື້ກິດຈະການຂອງ Xilinx ເຊິ່ງເປັນບໍລິສັດຄູ່ແຂ່ງດ້ານການຜະລິດຊິບຈາກແຄລິຟໍເນຍດ້ວຍມູນຄ່າ 3,5 ໝື່ນລ້ານໂດລາ.
ການຊື້ກິດຈະການຄັ້ງນີ້ຄືການລວມກິດຈະການຄັ້ງຫລ້າສຸດໃນປີ 2020 ລະຫວ່າງບໍລິສັດຜູ້ຜະລິດຊິບ ເຊິ່ງຫລັງຈາກທີ່ລວມກັນ ພວກເຂົາຈະມີວິສະວະກອນ 13.000 ຄົນ ແລະ ຈະມີຄ່າໃຊ້ຈ່າຍຫລາຍກວ່າ 2,7 ພັນລ້ານໂດລາຕໍ່ປີໃນການວິໄຈ ແລະ ພັດທະນາ.
2. ອົງການສະຫະປະຊາຊາດ (United Nations : UN) ກ່າວວ່າ: ການຂາດສານອາຫານຂອງເດັກໃນເຢເມນທີ່ເກີດຈາກສົງຄາມຢ່າງຮຸນແຮງໄດ້ເພີ່ມຂຶ້ນສູ່ລະດັບສູງສຸດເປັນປະຫວັດສາດ ເນື່ອງຈາກການລະບາດຂອງ COVID-19, ອຸທົກກະໄພ ແລະ ຄວາມຂັດແຍ່ງຕ່າງໆທີ່ທະວີຄວາມຮຸນແຮງຂຶ້ນ.
UN ກ່າວວ່າ: ຈໍານວນຜູ້ທີ່ຖືກຈັດຢູ່ໃນກຸ່ມເດັກທີ່ມີການຂາດສານອາຫານຢ່າງຮຸນແຮງ ແລະ ເປັນອັນຕະລາຍເຖິງຊີວິດໃນປີ 2020 ເພີ່ມຂຶ້ນເຖິງ 15,5% ເປັນ 98.000 ຄົນ ສາເຫດຕົ້ນຕໍຂອງສະພາບຂາດເຂີນອາຫານເຊັ່ນກັນເກີດຂຶ້ນນັບແຕ່ປີ 2015 ເມື່ອກຸ່ມພັນທະມິດຂອງປະເທດອາຣັບນິກາຍສຸນີ (Sunni Arab) ເຊິ່ງນຳໂດຍຊາອຸດິອາຣະເບຍໄດ້ເຮັດສົງຄາມກັບກຸ່ມ Houthis ແລະ ເຮັດໃຫ້ປະຊາກອນປະມານ 80% ຂອງປະເທດຕ້ອງອາໄສການຊ່ວຍເຫລືອຈາກລັດຖະບານ.
3. ຜູ້ປະທ້ວງຫລາຍໝື່ນຄົນໄດ້ລວມຕົວກັນຢູ່ນະຄອນຫລວງ Dhaka ເຊິ່ງເປັນເມືອງຫລວງຂອງບັງກະລາເທດ ເພື່ອຮຽກຮ້ອງໃຫ້ຂວ້ຳບາດສິນຄ້າຝຣັ່ງ ແລະ ມີການຈູດເຜົາຫຸ່ນຈຳລອງຂອງ Emmanuel Macron ປະທານາທິບໍດີຝຣັ່ງ ເຊິ່ງຖືກວິພາກວິຈານວ່າປົກປ້ອງຮູບກາຕູນຮຽນແບບຂອງສາສະດາມູຮຳໝັດແຫ່ງສາສະໜາອິສລາມ ຫລັງຈາກຄູຄົນໜຶ່ງຖືກຕັດຫົວຈາກການສະແດງຮູບກາຕູນດັ່ງກ່າວໃຫ້ລູກສິດເບິ່ງ.
ນອກຈາກນີ້ ໃນວັນທີ 26 ຕຸລາຜ່ານມາ Recep Tayyip Erdogan ປະທານາທິບໍດີຂອງຕຸຣກີ ໄດ້ຮຽກຮ້ອງໃຫ້ຊາວເຕິກຂວ້ຳບາດສິນຄ້າຝຣັ່ງເຊັ່ນກັນ.
4. ອາເມລິກາ ແລະ ອິນເດຍ ໄດ້ລົງນາມໃນຂໍ້ຕົກລົງເພື່ອແບ່ງປັນຂໍ້ມູນດາວທຽມທີ່ເປັນປະໂຫຍດໃນການກຳນົດເປົ້າໝາຍທີ່ແນ່ນອນຂອງລະບົບອາວຸດຕ່າງໆ.
ຂໍ້ຕົກລົງເຊິ່ງລົງນາມໂດຍລັດຖະມົນຕີກະຊວງປ້ອງກັນປະເທດ ແລະ ກະຊວງຕ່າງປະເທດຂອງທັງ 2 ຝ່າຍໄດ້ຮັບການອອກແບບມາ ເພື່ອເສີມສ້າງການພົວພັນທາງທະຫານຂອງພວກເຂົາເມື່ອຕ້ອງຜະເຊີນກັບຄູ່ແຂ່ງຮ່ວມກັນ.
5. ຜູ້ພິພາກສາຂອງລັດຖະບານກາງອາເມລິກາໄດ້ປະຕິເສດຄຳຂໍຂອງກະຊວງຍຸຕິທຳ ສຳລັບການຂໍອຳນາດເພື່ອຕັດສິນຄະດີທີ່ທ່ານ ໂດນັລ ທຣຳ ເປັນຈຳເລີຍໃນຂໍ້ຫາໝິ່ນປະໝາດ ໂດຍຝ່າຍໂຈດຄື E. Jean Carroll ເຊິ່ງເປັນອະດີດນັກຂຽນຂອງວາລະສານ Elle ທີ່ກ່າວຫາວ່າ ປະທານາທິບໍດີໄດ້ປະຕິເສດຢ່າງຜິດໆໃນການຂົ່ມຂືນນາງເມື່ອກາງທົດສະວັດທີ 1990 ຂະນະທີ່ການພິຈາລະນາຄະດີຂອງລັດຖະບານກາງຄາດວ່າຈະປ້ອງກັນ ທຣຳ ຈາກຂໍ້ກ່າວຫານີ້.
6. ບໍລິສັດ BP ເຊິ່ງເປັນຍັກໃຫຍ່ທາງດ້ານພະລັງງານຂອງໂລກໄດ້ເປີດເຜີຍຜົນກຳໄລເລັກໜ້ອຍແບບບໍ່ຄາດຄິດໃນໄຕມາດທີ 3 ຫລັງຈາກຂາດດູນສູງເຖິງ 6,7 ພັນລ້ານໂດລາ ໃນໄຕມາດກ່ອນໜ້າ.
ເຖິງຢ່າງໃດກໍຕາມ, ຄວາມຕ້ອງການເຊື້ອໄຟທີ່ອ່ອນແອເນື່ອງຈາກການລະບາດຂອງ COVID-19 ຍັງເປັນບັນຫາໃຫຍ່ສຳລັບພວກເຂົາ ໂດຍຫຸ້ນຂອງບໍລິສັດພະລັງງານຍັກໃຫຍ່ສັນຊາດອັງກິດແຫ່ງນີ້ຫລຸດລົງຫລາຍກວ່າ 50% ໃນປີນີ້ ແລະ ຢູ່ໃນລະດັບຕໍ່າສຸດໃນຮອບເກືອບ 25 ປີ.
7. ເຫດການໄຟໄໝ້ປ່າ 2 ຄັ້ງໃນທາງຕອນໃຕ້ຂອງແຄລິຟໍເນຍໄດ້ບັງຄັບໃຫ້ລັດຖະບານຕ້ອງອົບພະຍົບປະຊາຊົນເກືອບ 100.000 ຄົນອອກຈາກພື້ນທີ່.
ໜ່ວຍງານມອດໄຟຂອງລັດຖະບານລາຍງານວ່າ: ເຊົ້າວັນທີ 27 ຕຸລາຜ່ານມາ ເຫດໄຟໄໝ້ຄັ້ງທຳອິດໄດ້ກິນເນື້ອທີ່ປ່າ 48,53 ຕາກິໂລແມັດ ແລະ ອີກ 32,37 ຕາກິໂລແມັດ ຈາກເຫດໄຟໄໝ້ຄັ້ງທີ 2.
ໃນປີນີ້ ແຄລິຟໍເນຍປະສົບກັບໄຟໄໝ້ປ່າຄັ້ງຮ້າຍແຮງທີ່ສຸດໃນຮອບ 18 ປີ ເຊິ່ງຂ້າຊີວິດປະຊາຊົນໄປແລ້ວ 30 ກວ່າຄົນ ແລະ ເຮັດໃຫ້ອີກຫລາຍພັນຄົນຕ້ອງປະຖິ້ມເຮືອນຊານຂອງຕົນ.
