ນະຄອນຫລວງດຳເນີນກອງປະຊຸມໃຫຍ່ຜູ້ແທນອົງຄະນະພັກ ຄັ້ງທີ VII
ກອງປະຊຸມໃຫຍ່ຜູ້ແທນອົງຄະນະພັກນະຄອນຫລວງວຽງຈັນ ຄັ້ງທີ VII ໄຂຂຶ້ນຢ່າງເປັນທາງການ ໃນວັນທີ 28-29 ຕຸລານີ້ ໂດຍການໃຫ້ກຽດເຂົ້າຮ່ວມຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ພ້ອມບັນດາຜູ້ແທນສົມບູນ ຈຳນວນ 357 ສະຫາຍ, ຍິງ 53 ສະຫາຍ ເຊິ່ງເປັນຕົວແທນໃຫ້ສະມາຊິກພັກທົ່ວນະຄອນຫລວງວຽງຈັນ ຈຳນວນ 21.800 ກວ່າສະຫາຍ ເຂົ້າຮ່ວມ.
ກອງປະຊຸມດຳເນີນໄປເປັນເວລາ 2 ວັນ ໂດຍພາຍໃຕ້ຄຳຂວັນທີ່ວ່າ: “ຍົກສູງຄວາມຮັບຜິດຊອບ ແລະ ຄວາມສາມາດນຳພາຂອງອົງຄະນະພັກ; ເພີ່ມທະວີຄວາມສັກສິດ ແລະ ປະສິດທິພາບຂອງການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ; ຮັບປະກັນສະຖຽນລະພາບທາງດ້ານການເມືອງຢ່າງໜັກແໜ້ນ; ເຕົ້າໂຮມທຸກກຳລັງແຮງຂອງສັງຄົມເຂົ້າໃນການພັດທະນາເສດຖະກິດ, ຫລຸດພົ້ນອອກຈາກຄວາມດ້ອຍພັດທະນາ ແລະ ຍົກລະດັບຄຸນນະພາບຊີວິດການເປັນຢູ່ຂອງປະຊາຊົນໃຫ້ສູງຂຶ້ນ; ສ້າງການຫັນປ່ຽນຢ່າງແຂງແຮງໃນການພັດທະນານະຄອນຫລວງວຽງຈັນໃຫ້ສົມເປັນເມືອງຫລວງຂອງປະເທດ”.
ໃນກອງປະຊຸມ, ສະຫາຍ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ເລ ຂາຄະນະພັກ, ເຈົ້າຄອງນະຄອນຫລວງວຽງຈັນ ໄດ້ຂຶ້ນຜ່ານບົດລາຍງານການເມືອງ ໂດຍທ່ານໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ຜົນງານ ທີ່ນະຄອນຫລວງວຽງຈັນ (ນວ) ຍາດມາໄດ້ ໃນໄລຍະຜ່ານມາ ເຊິ່ງມີຫລາຍວຽກງານໃນຫລາຍຂະແໜງການໄດ້ຮັບການພັດທະນາ ແລະ ປະສົບຜົນສຳເລັດເປັນກ້າວໆມາ ອັນໄດ້ເຮັດໃຫ້ນະຄອນຫລວງວຽງຈັນມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດສືບຕໍ່ຂະຫຍາຍໃນທ່ວງທ່າດີ ແລະ ຖືກທິດ; ຖານະເສດຖະກິດຂອງ ນວ ຢືນຢູ່ແຖວໜ້າຂອງບັນດາທ້ອງຖິ່ນທົ່ວປະເທດ, GDP ກວມເອົາ 30% ແລະ ການຈັດເກັບລາຍຮັບທີ່ເກີດຂຶ້ນຢູ່ ນວ ກວມເອົາຫລາຍກວ່າ 40% ຂອງທົ່ວປະເທດ. ລະດັບຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນໄດ້ຮັບການຍົກລະດັບນັບມື້ດີຂຶ້ນ, ປະຊາກອນມີລາຍໄດ້ສະເລ່ຍຫລາຍກວ່າ 2 ເທົ່າຂອງລາຍໄດ້ສະເລ່ຍທົ່ວປະເທດ, ຄອບຄົວທຸກຍາກຢູ່ ນວ ຖືກແກ້ໄຂໂດຍພື້ນຖານ, ຕົວເມືອງ ແລະ ຊານເມືອງໄດ້ຮັບການພັດທະນາ ແລະ ມີໂສມໜ້າໃໝ່ ເຊິ່ງຜົນສໍາເລັດທັງໝົດນັ້ນເປັນປັດໄຈພື້ນຖານຍູ້ດັນໃຫ້ການຫັນປ່ຽນຢ່າງແຂງແຮງ ເພື່ອກ້າວຂຶ້ນໃນຊຸມປີຕໍ່ໜ້າຢ່າງຈະແຈ້ງ, ຈະນໍາພາ ນວ ກ້າວເດີນຕາມເສັ້ນທາງ ແລະ ກ້າວສູ່ຈຸດໝາຍສັງຄົມນິຍົມ.
ຄຽງຄູ່ກັນນັ້ນ, ແຕ່ການຈັດຕັ້ງປະຕິບັດບາງໂຄງການ ເປັນຕົ້ນໂຄງການບຸກທະລຸສ້າງຖານະການເງິນຍັງເຮັດໄດ້ໜ້ອຍ, ໜີ້ສິນສາທາລະນະຍັງຫລາຍສົມຄວນ, ຂັ້ນເມືອງ ແລະ ບ້ານບໍ່ທັນສາມາດສ້າງລາຍຮັບພູດທ້ອງຖິ່ນ ເພື່ອດູນລາຍຈ່າຍຂອງຕົນເອງໄດ້, ການຈັດຫາງົບປະມານເພື່ອບູລະນະສ້ອມແປງ-ກໍ່ສ້າງເສັ້ນທາງໃນຕົວເມືອງ ແລະ ຊານເມືອງບໍ່ໄດ້ຕາມຄວາມຮຽກຮ້ອງຕ້ອງການຕົວຈິງ, ຕົວເມືອງເຖິງວ່າມີການພັດທະນາ ແຕ່ພື້ນຖານໂຄງລ່າງເສັ້ນທາງ, ສາທາລະນຸປະໂຫຍດ ແລະ ການບໍລິການຮັບໃຊ້ປະຊາຊົນຍັງພົບຄວາມຫຍຸ້ງຍາກຫລາຍອັນ; ສາລະບານງົບປະມານຮັບໃຊ້ການບໍລິການຕົວເມືອງບໍ່ທັນມີ, ການຄຸ້ມຄອງ ແລະ ບໍລິຫານຈັດການຕົວເມືອງປະສິດທິພາບບໍ່ທັນສູງ, ການສ້າງເມືອງສີຂຽວບໍ່ທັນເຮັດໄດ້ດີ; ການຂຸດຄົ້ນຊັບພະຍາກອນທໍາມະຊາດ, ພັດທະນາທີ່ດິນບໍ່ທັນມີມາດຕະການກວດກາແກ້ໄຂທີ່ເຂັ້ມງວດ ແລະ ອື່ນໆ.
ໃນກອງປະຊຸມຍັງຈະມີການປ່ອນບັດຄັດເລືອກເອົາຄະນະບໍລິຫານງານຊຸດໃໝ່ຕື່ມອີກ.
